Pese 8 - O LE TUSI PA'IA - Ekalesia Katoliko Roma

¹ E! ‘Ana fai oe mo‘u tuagane, ana e susu i susu o lo‘u tinā. ‘Ona tā feasogi ai lea ma oe, pe a ‘ou iloa oe i fafo, ‘ae latou te lē ‘inosia ai a‘u.

² ‘Ona ‘ou ta‘ita‘i ai lea ‘iā te oe, ma ‘ou ‘aumaia oe i le fale o lo‘u tinā, ‘e te a‘oa‘o mai ‘iā te a‘u. ‘Ou te avatu ‘iā te oe le uaina manogi ma le sua o la‘u rimoni ‘e te inu ai.

³ ‘Ua i lalo o lo‘u ulu lona lima tauagavale, ‘ua fusi mai fo‘i ‘iā te a‘u lona lima taumatau.

⁴ Tama fafine e Ierusalema e, ‘ou te fai atu ‘iā te ‘outou, ‘ia tautō mai, tou te lē tātātuli pe fafagu i la‘u pele, se‘ia faitalia lava o ia.

O le Ono o Pese O Fafine

⁵ O ai ‘ea lenā, o lo‘o alu a‘e mai le vao, o lo‘o fa‘alagolago i lona manamea? Na ‘ou fafagu ‘iā te oe i lalo o le moli; na ‘o‘ono ai lou tinā ‘iā te oe i lea mea; na ia ‘o‘ono ai ma fānau mai ai e ia o oe i lea mea.

Tama‘ita‘i

⁶ ‘Ia tu‘uina a‘u i lou loto e fa‘apei o se fa‘amaufa‘ailoga, e fa‘apei o se fa‘amaufa‘ailoga i lou lima. Auā ‘ua malosi le alofa e pei o le oti; ‘ua fa‘auluulumamau le tu‘inanau e fa‘apei o le tu‘ugamau; o lona mumū, o le mumū lea o le afi mū saesae.

⁷ E lē mafaia i vai e tele ‘ona tineia le alofa, e lē mafai ‘ona lofia i vaitafe. A avatu e se tagata le ‘oloa uma o i lona fale ‘ia alofaina o ia e ta‘ufa‘atauva‘aina lava.

O Tuagane a le Tama‘ita‘i.

⁸ O lo‘o i ai lo tatou tuafafine la‘ititi ma e le‘i popoga ona susu. Se a se mea tatou te faia mo lo tatou tuafafine pe a sau se taule‘ale‘a e fia nofo ‘iā te ia?

⁹ ‘Āfai o se pā o ia, ‘ona tatou ati a‘e ai lea i ona luga o se ‘olo ario. ‘Ae ‘āfai o se faitoto‘a o ia, ‘ona tatou pupuni ai lea o ia i laupapa arasi.

Tama‘ita‘i.

¹⁰ O a‘u nei o le pā o o‘u susu fo‘i ‘ua pei oni ‘olo; a va‘ai mai la‘u manamea i ai, ‘ona filemū ai lea o ia.

Ali‘i.

¹¹ Na ‘iā Solomona le tōvine i Paala-amoni; na ia tu‘uina atu le tōvine i leoleo; e ta‘ito‘atasi o i latou ma ‘aumai tupe e afe i ona fua.

¹² O lo‘u tōvine, o lo‘u lava ia, ‘ua i o‘u luma, Solomona e, mā oe le afe; a ‘ia lua selau ma ē o leoleo i ona fua.

¹³ O oe na lē e nofo i fa‘ato‘aga, ‘ua fa‘alogologo ē ‘ua fa‘atasi ma oe i lou si‘ufofoga, ‘ou te fia fa‘alogo fo‘i i lou leo.

Tama‘ita‘i.

¹⁴ Lo‘u manamea e, ‘inā sola ia oe, ‘ia pei o le sevi, po o le tama‘i ‘aila i luga o mauga o i ai mea manogi.