Pese 7 - O LE TUSI PA'IA - Ekalesia Katoliko Roma

Ali‘i.

¹ Le tausala e, e matagofie na‘uā ou vae i se‘evae. O le fa‘iga o ou suilapalapa ‘ua pei o se asoa ‘ua faia e lima o le tufuga.

² O lou pute ‘ua pei o se ipu lapotopoto ‘ua i ai le uaina ‘ua suia. O lou manava ‘ua pei o le fa‘aputuga saito ‘ua afei i susana.

³ O ou susu e lua ‘ua pei o tama‘i sevi e lua, ‘ua pei o le ui lua a le sevi.

⁴ O lou ua ‘ua pei o se ‘olo o nifo o elefane. O ou mata ‘ua pei o vailepa i Hesepona e latalata ane i le faitoto‘a o Peterepima. O lou isu ‘ua pei o le ‘olo o Lepanona, e feagai ma Tamaseko.

⁵ O lou ulu i ou luga ‘ua pei o Karamelu ma lou lauulu ‘ua pei o ‘ie pauli; ‘ua tōsina i ai le tupu.

⁶ Le pele e, ‘ua matuā lālelei oe, ‘ua matuā matagofie oe, e fa‘afiafia ai.

⁷ ‘Ua fa‘apea lou maualuga, ‘ua tusa ma le pama; o ou susu fo‘i e pei o fuifui vine.

⁸ Na ‘ou fa‘apea ifo, ‘Ou te a‘e i le pama, ma ‘ou tago atu i ona lau. O ou susu ‘iā te a‘u ‘ua pei o fuifui vine ma le nanamu o lou isu e pei o moli.

⁹ O lou fofoga fo‘i e pei o le uaina lelei. ‘Ua tafe malie e fa‘agaganaina ai laugutu o ē momoe.

Tama‘ita‘i

¹⁰ ‘Ua fai a‘u mo lo‘u manamea, ‘ua ua‘i mai fo‘i lona mana‘o ‘iā te a‘u.

¹¹ Lo‘u manamea e, ‘inā sau ia, ‘inā tā ō atu ia i le vao ma momoe i faoa ‘a‘ai.

¹² ‘Ia tā ala usu atu i tōvine, ma tā matamata ai po o ‘ua fuga vine, po o ‘ua matala ona fuga, po o ‘ua tupu olaola rimoni. ‘Ou te alofa atu ‘iā te oe i lea mea.

¹³ ‘Ua pua‘iina mai le nanamu o tutaima; e latalata ane fo‘i i o tatou faitoto‘a o fua uma e sili ‘ona lelei. O fua ‘ua fa‘ato‘ā tau ‘atoa ma fua ‘ua loa, ‘ua ‘ou fa‘aputuina mā oe, lo‘u manamea e.