Pese 6 - O LE TUSI PA'IA - Ekalesia Katoliko Roma

O Fafine.

¹ O oe na, le sili ‘ona lālelei i fafine, po o fea ‘ua alu i ai lou manamea? Po o fea ‘ua afe ane i ai lou manamea, ‘ia tatou sā‘ili‘ili ‘iā te ia fa‘atasi ma oe?

Tama‘ita‘i.

² ‘Ua alu ifo lo‘u manamea i lana fa‘ato‘aga, i topasama, e taumafa i ana fa‘ato‘aga ma tau ai susana.

³ O lo‘u manamea ‘ua fai a‘u mōna o ia fo‘i ‘ua fai mo‘u; o lo‘o taumafa o ia i totonu o susana.

O le Lima o Pese Ali‘i.

⁴ La‘u pele e, ‘ua lālelei oe, e pei o Tiresa. ‘Ua ‘aulelei e pei o Ierusalema; ‘ua mata‘utia e pei o le ‘au ‘ua i ai tagāvai.

⁵ ‘Inā liliu ‘ese ia ou fofoga ‘iā te a‘u, auā ‘ua ‘ou mā ‘ou te va‘ai atu i ai i lo lā ‘aulelei. O lou lauulu ‘ua pei o fulufulu o le lafu ‘oti ‘ua ta‘o‘oto mai i Kiliata.

⁶ O ou nifo ‘ua pei o le lafu mamoe ‘ua ō a‘e a‘i le fulufuluga. E leai se tasi o i latou ‘ua pa‘ū, e tutusa uma lo latou matagofie.

⁷ ‘Ua pei o se fāsi rimoni ou alafau i totonu o lou ‘ie ufimata.

⁸ E to‘aonogafulu o masiofo; e to‘avalugafulu o palake; o taupou fo‘i e lē mafaitaulia.

⁹ O la‘u lupe, o lē ‘ua sao ‘ona lelei, e to‘atasi o ia. O le to‘atasi o ia i lona tinā, o le pele a lē na fānaua o ia. Na va‘ava‘ai mai ‘iā te ia o teine, ‘ona latou fa‘a‘amu‘ia mai ai lea ‘iā te ia o masiofo ma palake na latou vivi‘i mai fo‘i ‘iā te ia.

¹⁰ “O ai ‘ea lenā ‘ua sisila mai, e pei o le taeao. E lālelei mai e pei o le masina, e pupula mai e pei o le lā, e mata‘utia e pei o le ‘au ‘ua i ai tagāvai?”

¹¹ Na ‘ou alu ifo i lo‘u toekosi, e matamata ai i mea e tutupu i le vanu; e matamata po o ‘ua fuga le vine, po o ‘ua matala fuga o rimoni.

¹² A o le‘i iloa e a‘u ‘ua tu‘uina ai a‘u e lo‘u loto i kariota o Aminatipo.

Tama‘ita‘i.

¹³ Fo‘i mai ia, ‘inā fo‘i mai ia, le Sulami e; ‘ia e fo‘i mai, fo‘i mai ia, matou te maimoa ai ‘iā te oe. Tou te maimoa i ni a i le Sulami? E peiseaī o le siva o ‘au e lua.