Pese 5 - O LE TUSI PA'IA - Ekalesia Katoliko Roma

Ali‘i.

¹ Lo‘u tuafafine e, la‘u avā e, ‘ua ‘ou sau i la‘u fa‘ato‘aga. ‘Ua ‘ou tau lo‘u muro ‘atoa ma la‘u mea manogi; ‘ua ‘ou ‘aina la‘u meli ‘ua sisina ifo ma la‘u meli; ‘ua ‘ou inu la‘u uaina ma la‘u suāsusu. A‘u uō e, ‘inā taumamafa ia; a‘u uō pele e, ‘inā feinu ia ‘outou, feinu ia, ‘ia malilie.

O Fafine. O le Fa o Pese Tama‘ita‘i.

² ‘Ua ‘ou moe a‘u, ‘ae ala lo‘u loto. O le leo o lo‘u manamea o lo‘o tu‘itu‘i mai o ia. ‘Ua fa‘apea mai, “Lo‘u tuafafine e, la‘u uō e, la‘u lupe e, lē ‘ua sao ‘ona lelei, tatala mai ia le faitoto‘a ‘iā te a‘u, auā ‘ua susū lo‘u ulu i le sau, ‘ou lauulu fo‘i i le ma‘ulu o le sau i le po.”

Ali‘i Tama‘ita‘i.

³ ‘Ua ‘ou tō ‘ese lo‘u ‘ofu, pe fa‘apefea ‘ona ‘ou toe ‘ofu ai? ‘Ua ‘ou mulumulu i o‘u vae, pe fa‘apefea ‘ona ‘ou toe fa‘a‘ele‘elea ai?

⁴ Na tu‘uina mai e lo‘u manamea lona lima i le pū o le faitoto‘a, ‘ona mutimutivale lea o lo‘u loto ‘iā te ia.

⁵ Na ‘ou tula‘i e tatala le faitoto‘a i lo‘u manamea. Na sisina ifo fo‘i le muro ai o‘u lima, ma le muro sisina nai ‘ou tamatama‘i lima i le ‘au o le fa‘amau.

⁶ ‘Ua ‘ou tatala le faitoto‘a i lo‘u manamea, a ‘ua liliu lo‘u manamea, ‘ua alu ‘ese. Na segia lo‘u mauli ‘ina o tautala mai o ia. ‘Ua ‘ou sā‘ili ‘iā te ia, ‘ae le‘i maua; na ‘ou vala‘au atu ‘iā te ia, ‘ae le‘i tali mai o ia ‘iā te a‘u.

⁷ Na maua a‘u e leoleo o ē na feoa‘i i le ‘a‘ai, na latou fasi ‘iā te a‘u ‘ua ‘ou manu‘a ‘iā te i latou, na faoa e leoleo ‘aupā lo‘u ‘ie e ufita‘i ai lo‘u tino.

⁸ Tama fafine a Ierusalema e, ‘ou te fai atu ‘iā te ‘outou ‘ia tautō mai, ‘āfai tou te iloa lo‘u manamea, tou te ta‘u atu ‘iā te ia, ‘ua ‘ou vaivai i lo‘u alofa atu.

O Fafine.

⁹ O oe na, lē sili ‘ona lālelei i fafine, se a se mea e sili ai lou manamea i se isi manamea? Se a se mea e tāua ai lou manamea i isi manamea, ‘ina ‘ua e fai mai, matou te tautō?

Tama‘ita‘i.

¹⁰ O lo‘u manamea, e ‘aulelei ma malosi, e silisili ‘ese o ia i le to‘atele.

¹¹ O lona ulu ‘ua pei o le auro ‘ua fa‘amamāina; o ona lauulu ‘ua fa‘apuloulou, ‘ua uliuli e pei o se oreva.

¹² O ona mata e pei ni mata o se lupe e latalata ane i vaitafe, o lo‘o tā‘e‘ele i le suāsusu ma nonofo i le ‘auvai.

¹³ O ona alafau ‘ua pei o se topasama, ma mea maupu‘epu‘e o i ai la‘au manogi. O ona laugutu o susana ia, ‘ua sisina ifo ai le muro sisina.

¹⁴ O ona lima ‘ua pei o mama auro ‘ua tu‘uina i ai tasesa; o lona manava ‘ua pei o nifo o elefane ‘ua fa‘apupulaina, ma ‘ua ufitia i safaira.

¹⁵ O ona vae o pou sesa ia, ‘ua fa‘atūina i luga o lago auro lelei; ‘ua foliga o ia i Lepanona, ‘ua sili ‘ona lelei e pei o arasi.

¹⁶ O lona fofoga ‘ua matuā leo malie, ‘ua ‘ato‘atoa ‘ona lelei o ia. Tama fafine a Ierusalema e, o lo‘u manamea lava lea, o la‘u uō fo‘i lea.