Pese 4 - O LE TUSI PA'IA - Ekalesia Katoliko Roma

Ali‘i.

¹ La‘u pele e, fa‘auta, ‘ua e lālelei; fa‘auta, ‘ua lālelei oe. ‘Ua ni mata o se lupe ou mata a‘i totonu o lou ‘ie ufimata. O lou lauulu ‘ua pei o fulufulu o le lafu ‘oti ‘ua ta‘o‘oto mai i le mauga o Kiliata.

² O ou nifo ‘ua pei o le lafu mamoe, ‘ua seleina fulufulu ‘ua ō a‘e nai le fulufuluga. E ta‘itasi o i latou uma ma ta‘iuilua, e leai fo‘i se tasi o i latou e pā.

³ O ou laugutu ‘ua pei o le manoa mūmū, ‘ua matagofie lou gutu. ‘Ua pei o se fasi rimoni ou alafau i totonu o lou ‘ie ufimata.

⁴ O lou ua ‘ua pei o le ‘olo o Tavita, na faia e tu‘u ai le ‘au‘upega, ‘ua fa‘atautauina ai o talitā e afe, o talitā uma o toa.

⁵ O ou susu e lua ‘ua pei o tama‘i sevi e lua, o le ui lua a le sevi, o lo‘o tata‘a i totonu o susana.

⁶ ‘Ou te alu atu i le mauga o i ai le muro, ma le mea maupu‘epu‘e o i ai le lipano; se‘ia gafoa le ata, ma mavae le pogisā.

⁷ La‘u uō e, ‘ua sao lou lālelei, e leai lava se ponā ‘iā te oe.

⁸ ‘Inā tā tu‘ua ia o Lepanona, la‘u avā e, ‘inā tā tu‘ua Lepanona. Se‘i e va‘ava‘ai nai le tumutumu o Amana, ma le tumutumu o Senira ma Heremoni, ma ana o leona ma mauga o nameri.

⁹ ‘Ua tōsina lo‘u loto ‘iā te oe, lo‘u tuafafine e, la‘u avā e; ‘ua tōsina lo‘u loto i ou mata, ma le asoa i lou ua.

¹⁰ Lo‘u tuafafine e, la‘u avā e, ‘ua silisili ‘ese lou alofa mai. E sili ‘ona lelei o lou alofa mai i le uaina, o le nanamu fo‘i o ou suāu‘u e sili i mea manogi uma.

¹¹ La‘u avā e, ‘ua sisina ifo meli i ou laugutu, o i lalo o lou laulaufaiva le meli ma le suāsusu, o le nanamu fo‘i o ou ‘ofu ‘ua pei o le nanamu o Lepanona.

¹² O lo‘u tuafafine, o la‘u avā, o le fa‘ato‘aga ‘ua puipuia o ia, o le vaipuna ‘ua puipui, o le punāvai ‘ua fa‘amaufa‘ailogaina,

¹³ O au la‘au muli o le torimoni ia, ma ona fua e sili ‘ona lelei, o le kofera ‘atoa ma le nato.

¹⁴ O le nato ma le keroko; o le kani ma le kinamomi, ‘atoa ma la‘au uma o le lipano. O le muro ma le aloe, ‘atoa ma mea uma e sili ‘ona manogi.

¹⁵ O le punāvai i fa‘ato‘aga, o le punāvai ola, o vaitafe fo‘i mai Lepanona.

Tama‘ita‘i.

¹⁶ Le matagi i matū, ‘inā ala mai ia. Le matagi i saute, ‘inā sau ia, agi mai i la‘u fa‘ato‘aga, ‘ina ‘ia pua‘iina lona manogi. ‘Ia maliu mai lo‘u manamea i lana fa‘ato‘aga, ma taumafa i ona fua e sili ‘ona lelei.