Pese 3 - O LE TUSI PA'IA - Ekalesia Katoliko Roma

¹ ‘Ua ‘ou i luga o la‘u moega i le po, na ‘ou sā‘ili ai i lē ‘ua mana‘o i ai lo‘u loto, ‘ua ‘ou sā‘ili ‘iā te ia, ‘ae le‘i maua o ia.

² “‘Ou te tula‘i ma fealualua‘i i le ‘a‘ai, i ala ma malae. ‘Ou te sā‘ili‘ili ai i lē ‘ua mana‘o i ai lo‘u loto,” ‘ua ‘ou sā‘ili‘ili ‘iā te ia, ‘ae le‘i maua.

³ Na maua a‘u e leoleo e feoa‘i i le ‘a‘ai, ‘ua ‘ou fa‘apea atu i ai, “‘Ua ‘outou iloa ‘ea lē ‘ua mana‘o i ai lo‘u loto?”

⁴ E le‘i leva ‘ona ‘ou tu‘ua i latou, ‘ae ‘ou maua loa lē ‘ua mana‘o i ai lo‘u loto. Na ‘ou tāofi ‘iā te ia, ‘ou te le‘i toe tu‘uina o ia, se‘ia ta‘ita‘iina atu ‘iā te ia i le fale o lo‘u tinā, i le potu o lē na fānaua a‘u.

⁵ Tama fafine a Ierusalema e, ‘ou te fai atu ‘iā te ‘outou, ‘ia tautō mai i sevi ma ‘aila o le vao, tou te lē tātātuli pe fafagu i la‘u pele, se‘ia faitalia o ia.

O le Tolu o Pese Tama‘ita‘i.

⁶ O ai ‘ea lenā o lo‘o alu a‘e nai le vao e fa‘apei o le asu fa‘aniutū, o lo‘o nanamu i le pulu muro ma le pulu lipano, ma mea manogi uma ‘ua nutilili‘ia a le tagata fa‘atau‘oa?

⁷ Fa‘auta mai ia, o lona moega, o le moega o Solomona, ‘ua vagavagaia i toa e to‘aonogafulu, nai le ‘au totoa o Isaraelu.

⁸ ‘Ua ta‘itasi uma ma u‘u i lana pelu, ‘ua a‘oa‘oina i le tau‘a. O le tagata ma lana pelu i lona sulugatiti, ‘ona o le mata‘u i le po.

⁹ ‘Ua faia e le tupu o Solomona le fata mōna i la‘au mai Lepanona.

¹⁰ ‘Ua ia faia ona pou i le ario, o ona fa‘alava i le auro, o lona nofoa i le ‘ie pāuli. ‘Ua folasia fa‘amatagofie i totonu i mea alofa, mai tama fafine a Ierusalema.

¹¹ Tama fafine a Siona e, ō atu ia, ‘inā matamata i le tupu o Solomona, ma le pale na fa‘apaleina ai o ia e lona tinā, i le aso na fai avā ai o ia, i le aso fo‘i na fiafia ai lona finagalo.