Nauma 3 - O LE TUSI PA'IA - Ekalesia Katoliko Roma

O le Valo‘aga i le Malaia o Nineva

¹ ‘Oi talofa i le ‘a‘ai o ē fasi tagata! ‘ua tumu lava i le pepelo ma le sauā ‘ua lē ‘ave‘eseina ai lava le mea na saeia.

² O le pa‘ō o le sasa, o le ta‘alili o mea ta‘avalevale, o solofanua ‘ua feosofa‘i, ma kariota ‘ua osooso.

³ ‘Ua i ai le oso a‘e o ē ‘ua ti‘eti‘e i solofanua, ma le fepulafi mai o pelu, o le ‘emo‘emo mai fo‘i o tao. O le to‘atele fo‘i o ē ‘ua fasia, ma le faupuega o tagata oti; e lē masino tagata oti, ‘ua latou tautevateva i o latou tagata oti.

⁴ ‘Ona o le tele o le talitane o le fafine talitane o le ‘ua lālelei. O le tama‘ita‘i taulāitu, o lē ‘ua fa‘atau atu nu‘u i lona talitane, ‘atoa ma ‘āiga i ana togafiti fa‘ataulāitu.

⁵ O lo‘o fa‘apea mai le ALI‘I o ‘au: Fa‘auta, ‘ou te fai oe mo‘u fili, ‘ou te susu‘e a‘e fo‘i ou lavalava, ma lafo a‘e i ou mata, ‘ou te fa‘aali atu lou tino i atu nu‘u, e fa‘aali fo‘i lou mā i mālō.

⁶ ‘Ou te lafo mea leaga i luga ‘iā te oe, ‘ou te fa‘a‘inosia fo‘i oe, ma ‘ou faia oe ma mata‘aga.

⁷ ‘Ona o‘o ai lea ‘ina sōsōla ‘ese ‘iā te oe o i latou uma o ē va‘ai atu ‘iā te oe, ma latou fa‘apea ane, “‘Ua fa‘atafunaina Nineva o ai sē fa‘amafanafana i ai? Po ifea ‘ou te sā‘ili ai nisi e fa‘amatalaloto ‘iā te oe?”

⁸ Pe sili ‘ea oe ‘iā Noamoni, o lē sa nofo i vaitafe, sa si‘omia fo‘i i le vai, o lona malosi o le vai tele lea, sa i ai lona pā i le vai tele?

⁹ O Aitiope o lona malosi lea, ‘atoa ma Aikupito, sa lē masino fo‘i ona tagata; o Futu ma Lipua o ou fesoasoani ia.

¹⁰ A ‘ua tāfea o ia, ‘ua alu o ia fa‘atasi ma ē na fa‘atagataotau‘aina; o ana tamaiti fo‘i sa palasi i tulu‘iga o ala uma, sa fai fo‘i le vili i ona ali‘i mamalu, sa nonoa fo‘i ona ali‘i sili uma i maea u‘amea.

¹¹ O oe fo‘i ‘e te inu ‘ia ‘onā; ‘e te lafi lava; o oe fo‘i ‘e te sā‘ili se ‘olo ‘ona o lē ‘ua ita ‘iā te oe.

¹² O ou ‘olo uma ‘ua ni mati ia, o lo‘o i ai fua e mua‘i matua; ‘āfai e lūlūina, ‘ona to‘ulu ai lea i le gutu o lē ‘ai ai.

¹³ Fa‘auta, o lou nu‘u i totonu ‘iā te oe ‘ua ni fafine lava, e matua avanoa faitoto‘a o lou nu‘u i ē e fai oe ma fili, e susunuina au fa‘amaufa‘alava i le afi.

¹⁴ ‘Ia e utuina vai, auā o le a si‘osi‘oina oe, ‘inā teu ia ‘ia malolosi ou ‘olo; alu ia i le palapala, ‘inā soli ia le ‘omea, ‘ia teu ‘ia malosi le mea e tunu ai ma‘a‘omea.

¹⁵ E susunuina oe i le afi i lea mea, e fasia oe i le pelu, na te ‘aina lava oe pei o le sē aleka, ‘ia fa‘ato‘ateleina oe pei o sē aleka, ‘ia fa‘ato‘ateleina oe pei o sē akerise.

¹⁶ ‘Ua e fa‘ato‘ateleina ou tagata fa‘atau e sili i fetū o le lagi; ‘ua salalau sē aleka, ‘ona lele ‘ese ai lea.

¹⁷ O ou ali‘i sili e pei o sē akerise ia ma ou ali‘i e pulea ‘au e pei o sē akerise aupito tetele ia, o ē nonofo i Ai i le aso ma‘alili, ‘ua alu a‘e le lā, ‘ona sōsōla ai lea e lē iloa fo‘i le mea latou te i ai.

¹⁸ Le tupu o Asuria e, o lo‘o momoe ou leoleo mamoe, o ta‘o‘oto ou ali‘i sili, ‘ua fa‘ata‘ape‘apeina lou nu‘u i mauga, e leai fo‘i sē na te fa‘apotopotoina i latou.

¹⁹ E leai sina feoloolo o lou malaia, e matuā leaga lou manu‘a; o latou uma o ē fa‘alogologo i le tala ‘iā te oe, latou te pati lima ‘iā te oe; auā o ai se tasi ‘ua lē o‘o i ona luga lau amio leaga e lē aunoa?