Mareko 12 - O LE TUSI PA'IA - Ekalesia Katoliko Roma

O le Fa‘ata‘oto i le Tōvine

¹ ‘Ona fetalai atu lea o Iesu ‘iā te i latou i fa‘ata‘oto, “Na totō e le tasi tagata le tōvine, ‘ua ia si‘osi‘oina i le pā, ‘ua ‘eli fo‘i le mea e tali ai le suāvine, ‘ua fai fo‘i le ‘olo, ‘ua tu‘uina atu i ē galulue i vine, ‘ona alu malaga lea o ia i le nu‘u ‘ese.

² ‘Ua fai le fuata, ‘ona ‘auina atu lea e ia le ‘au‘auna i ē galulue i vine, ‘ina ‘ia maua ni fua o le tōvine i ē galulue i vine.

³ A ‘ua latou pu‘e ‘iā te ia, ma sasa, ma toe ‘auina mai o ia.

⁴ ‘Ona toe ‘auina atu lea e ia o le tasi ‘au‘auna ‘iā te i latou; ‘ona latou fetogi lea ‘iā te ia i ma‘a, ‘ua foa lona ulu, ma ‘auina mai o ia ma agaleagaina.

⁵ ‘Ua toe ‘auina atu fo‘i e ia le tasi; ‘ua latou fasiotia lava o ia; o isi fo‘i e to‘atele, ‘ua latou sasaina nisi, a ‘ua fasioti nisi.

⁶ ‘Ona toe lea ‘iā te ia na o lona atali‘i e to‘atasi, ‘ua fa‘apelepeleina e ia, ‘ua mulia‘i ‘auina atu o ia ‘iā te i latou, ‘ua fa‘apea ane, ‘Latou te āva mai i lo‘u atali‘i.’

⁷ A o ia tagata galulue i vine, ‘ua latou fetautalatala‘i, ‘O le suli lenei; ‘inā ō mai ia, tatou fasioti ‘iā te ia, ‘ona fai ai lea o le fanua mo i tatou.’

⁸ ‘Ona latou pu‘e lea ‘iā te ia, ma fasioti, ma lafo i tua o le tōvine.

⁹ “O lenei, se a se mea e faia e le ali‘i e ona le tōvine? E sau o ia, ma fa‘aumatia na tagata galulue i vine, ma tu‘u ane le tōvine i nisi.

¹⁰ ‘Ua ‘outou lē faitau ‘ea lenei ‘upu a le Tusi: ‘O le ma‘a na lafoa‘iina e tufuga fai fale, ‘ua fai lea ma ma‘a tulimanu aupitoaluga;

¹¹ o le mea lea na faia e le Ali‘i, tatou te ofo ai pe a tatou va‘ava‘ai atu i ai?’”

¹² ‘Ona latou fia pu‘e ai lea ‘iā te ia, a ‘ua latou matata‘u i le vao tagata; auā ‘ua latou iloa, na ia fa‘atū le fa‘ata‘oto ‘iā te i latou; ‘ua latou tu‘ua o ia, ‘ae ō ‘ese.

O le Fesili i le Totōgiina o Taulaga

¹³ ‘Ona latou ‘a‘auina mai lea ‘iā te ia nisi o le ‘au faresaio ma nisi o le ‘au Herotiano, latou te mailei ‘iā te ia i ana ‘upu.

¹⁴ ‘Ua latou o‘o mai, ‘ona fa‘apea mai lea ‘iā te ia, “Le a‘oa‘o e, ‘ua matou iloa ‘ua e fa‘amao‘i lava, ma ‘ua e lē mata‘u i se tasi, auā ‘ua e lē fa‘ailogaina se tagata; ‘ae peita‘i ‘ua e a‘oa‘o fa‘amaoni lava, i le ala o le Atua; pe sā ‘ea ‘ona avatu le taulaga ‘iā Kaisara pe leai? A matou avatu ‘ea? Pe matou te lē avatu?”

¹⁵ A ‘ua silafia e ia lo latou fa‘afiaamiotonu, ‘ona fetalai atu ai lea ‘iā te i latou, “Se a le mea tou te tofotofo mai ai ‘iā te a‘u? ‘Inā ‘aumai ia ‘iā te a‘u se tenari, se‘i ‘ou matamata i ai.”

¹⁶ ‘Ona latou avane lea. ‘Ona fetalai atu lea o ia ‘iā te i latou, “O ai ‘ea e ona lenei fa‘atagata, ma lenei tusi?” ‘Ona latou fai mai lea ‘iā te ia, “O Kaisara.”

¹⁷ ‘Ona tali atu lea o Iesu ‘iā te i latou, “‘Inā avatu ia o mea a Kaisara ‘iā Kaisara; ‘ia avatu fo‘i mea a le Atua i le Atua.” ‘Ona latou ofo ai lea ‘iā te ia.

O le Fesili e Uiga i le Toetū A‘e

¹⁸ ‘Ona ō mai lea ‘iā te ia o satukaio, o ē tāofi, e leai se toetū; ‘ua latou fesili mai ‘iā te ia ‘ua fa‘apea mai,

¹⁹ “Le a‘oa‘o e, ‘ua tusi mai Mose ‘iā te i matou, ‘Pe a oti le uso o le tasi tagata, ma tu‘u ai lana avā ‘ae leai se fānau, ‘ona fai lea o lana avā ma avā a lona uso, e fa‘atupuina ai se gafa mo lona uso.’

²⁰ ‘Ia, sa i ai le ‘au uso e to‘afitu; na fai avā le ulumatua, ‘ua oti fo‘i, ‘ua leai se fānau.

²¹ ‘Ona fai avā lea ‘iā te ia o lē aupito ane i ai, ‘ua oti fo‘i ia, ‘ua leai fo‘i sana fānau; ‘ua fa‘apea fo‘i lona to‘atolu.

²² ‘Atoa uma le to‘afitu ‘ua fai avā ‘iā te ia, a ‘ua leai lava se fānau ‘ae mulimuli ane oti le fafine.

²³ O lenei, a o‘o i le toetū, Pe a toe tutū mai i latou, O ai so latou e ana le avā; auā sa fai avā le to‘afitu ‘iā te ia?”

²⁴ ‘Ona tali atu lea o Iesu ‘iā te i latou, “E lē o lenei ‘ea ‘ua ‘outou sesē ai, ‘ina ‘ua ‘outou lē iloa ‘upu o Tusi ma le mana o le Atua?

²⁵ Auā pe a latou toe tutū mai i ē ‘ua oti, latou te lē fai avā pe nofo tane; ‘ae peita‘i latou te fa‘apei o agelu o i le lagi.

²⁶ A o ē ‘ua oti, ma lo latou toetū, ‘ua ‘outou lē faitau ai ‘ea i le tusi a Mose, i le la‘au talatala, na fetalai mai le Atua ‘iā te ia, ‘ua fa‘apea, ‘O a‘u o le Atua o Aperaamo, o le Atua fo‘i o Isaako, o le Atua fo‘i o Iakopo?’

²⁷ E lē o le Atua o ia o ē ‘ua oti, a o le Atua o ē ola; o lea, ‘ua tele ai lava lo ‘outou sesē.”

O le Poloa‘iga Sili

²⁸ ‘Ua sau fo‘i le tasi o le ‘au tusi‘upu, ‘ua fa‘alogo ane i la latou fesilisili, ‘ua na iloa ‘ua mālie ana sa tali atu ai ‘iā te i latou, ‘ona fesili mai lea o ia ‘iā Iesu, “Po o le fea poloa‘iga e sili i poloa‘iga uma?”

²⁹ ‘Ona tali atu lea o Iesu ‘iā te ia, “E sili lenei, ‘Fa‘alogo mai ia Isaraelu e; o le Ali‘i lo tatou Atua o le Ali‘i e to‘atasi ia.

³⁰ ‘ia e alofa fo‘i i le Ali‘i lou Atua ma lou loto ‘atoa, ma lou agaga ‘atoa, ma lou manatu ‘atoa, ma lou malosi ‘atoa.’

³¹ O lona lua lenei, ‘‘Ia e alofa atu i lē lua te tuā‘oi, ‘ia pei o oe lava ‘iā te oe.’ E leai lava se tasi poloa‘iga e sili i na poloa‘iga.”

³² ‘Ona fai mai lea o le tusi‘upu ‘iā te ia, “Mālie a oe le a‘oa‘o e, o le tonu lea ‘ua e fetalai mai ai; ‘auā e to‘atasi lava le Atua; e leai lava se tasi ‘ua nā o ia.’

³³ ‘‘Ia alofa fo‘i ‘iā te ia ma le loto ‘atoa, ma le manatu ‘atoa, ma le malosi ‘atoa;’ ma ‘‘ia alofa i lē lā te tuā‘oi e pei o ia lava ‘iā te ia,’ e sili lea i taulaga mū ‘atoa, ma taulaga uma.”

³⁴ ‘Ua silafia e Iesu ‘ua tali mai o ia ma le atamai, ‘ona fetalai atu lea ‘iā te ia, “‘E te lē vāvā mamao oe ma le mālō o le Atua.” Talu ai ‘ua lē toe fa‘amalosi se tasi e fesili ‘iā te ia.

O le Fesili e Uiga i le Mesia

³⁵ ‘Ua a‘oa‘o Iesu i le malumalu, ‘ona fetalai atu lea o ia, “Pe fa‘apefea ‘ona fai mai o le ‘au tusi‘upu, o le Keriso o le atali‘i ia o Tavita?

³⁶ Auā ‘ua fai mai Tavita lava a o i ai o ia i le Agaga Pa‘ia, ‘‘Ua fetalai mai le Ali‘i i lo‘u Ali‘i, “‘Ia e nofo i lo‘u itū taumatau, se‘ia ‘ou faia ē ‘ua ita mai ‘iā te oe ma mea e tu ai ou vae.”’

³⁷ O lenei, ‘ua ta‘ua o ia e Tavita lava, o le Ali‘i; pe fa‘apefea ‘ona ‘avea o ia mōna atali‘i?” ‘Ua fa‘alogo fo‘i ma le fiafia le motu o tagata e to‘atele ‘iā te ia.

O Lapata‘iga a Iesu i le ‘au Tusi‘upu

³⁸ ‘Ua fetalai atu fo‘i o ia ‘iā te i latou i lana a‘oa‘o atu, “‘Ia ‘outou i le ‘au tusi‘upu, o ē ‘ua fia evaeva ma ‘ofu tātapuvae, ma ‘ia alofaina i latou i malae,

³⁹ ‘ua fia maua fo‘i nofoa sili i sunako, ma mea sili e ta‘oto ai i faigā‘ai.

⁴⁰ ‘Ua latou fa‘auma fale a fafine ‘ua oti a latou tane, ma fa‘alevaleva le tatalo e fai ma ufiufi, e atili ai ‘ona fa‘asalaina o i latou.”

O le Taulaga a le Fafine ‘ua oti lana Tane

⁴¹ Sa nofo Iesu e feagai ma le mea e teu ai tupe, ‘ua silafia fo‘i e ia le vao tagata o lafo tupe i le mea e teu ai tupe; e to‘atele fo‘i o ē mau‘oa, ‘ua tele a latou ‘ua lafo i ai.

⁴² ‘Ua alu ane fo‘i le tasi fafine mativa ‘ua oti lana tane, ‘ua lafo ane ai tupe iti e lua, o le kotane e tasi ia.

⁴³ ‘Ona vala‘au atu lea o ia i ona so‘o, ‘ua fetalai atu ‘iā te i latou, “E moni, ‘ou te fai atu ‘iā te ‘outou, o mea a lenā fafine mativa ‘ua oti lana tane ‘ua lafo i le mea e teu ai tupe, ‘ua sili ia ‘iā latou uma na lafo i ai.

⁴⁴ Auā o i latou uma, ‘ua latou lafo nisi mea mai a latou mea ‘ua tele; a o ia ‘ua mativa ‘ua ia lafo ana mea uma sa ‘iā te ia, o ana mea uma e ola ai.”