Kenese 49 - O LE TUSI PA'IA - Ekalesia Katoliko Roma

‘Ua Fa‘amanuia Iakopo i ona Atali‘i

¹ ‘Ona ‘a‘ami lea o Iakopo ona atali‘i, ma na fa‘apea atu, “Fa‘apotopoto mai ia ‘outou, a a‘u fa‘aali atu ‘iā te ‘outou o mea e o‘o ‘iā te ‘outou i aso amulī.

² Fa‘apotopoto mai ia ma fa‘alogologo mai ‘outou atali‘i o Iakopo; Ma fa‘alogologo mai ia i lo ‘outou tamā o Isaraelu.

³ O Reupena, o la‘u ulumatua lava oe o lo‘u malosi, ma lē na amata mai ai lo‘u mamalu, o lē ‘ua silisili ‘ona mamalu, ‘ua silisili ‘ona malosi.

⁴ ‘Ua e oso vale pei o le vai, e lē fa‘asili lava oe, auā na e alu a‘e i le moega o lou tamā i le ‘ua leaga ‘iā te oe; na alu a‘e ia i lo‘u moega.

⁵ O Simeona ma Levi o le uso i lā‘ua; ‘ua fai a lā‘ua pelu ma ‘au‘upega e fa‘asauā ai.

⁶ ‘Aua ne‘i usita‘i lo‘u loto i la lā‘ua taupulepulega nanā; ‘aua ne‘i fa‘atasi lo‘u mamalu i lo lā‘ua potopotoga; auā na la fasioti le tagata i lo lā‘ua ita, o lo lā‘ua fīnau vale fo‘i na la fa‘apipili ai o vae o le povi.

⁷ ‘Ia fetu‘uina lo la ita ‘ina ‘ua silisili, mo la ita tele lava ‘ina ‘ua la fīnau vale ai; ‘ou te vavaeina i lā‘ua i le nu‘u o Iakopo, ‘ou te fa‘ata‘ape‘apeina i lā‘ua i Isaraelu.

⁸ O oe na Iuta, e vi‘ia oe e ou uso. E o‘o lou lima i ua o ē ita ‘iā te oe, e ifo ‘iā te oe le fānau a lou tamā.

⁹ O le tama‘i leona Iuta; lo‘u atali‘i e, ‘ua e alu a‘e nai le mea ‘ua saeia; na ia ta‘oto, na ia fa‘apuga pei o le leona, e pei o se leona fafine. O ai sē na te fa‘alili ‘iā te ia?

¹⁰ E lē ‘avea le to‘oto‘o ‘iā Iuta, po o le faipule a‘i ona vae se‘ia maliu mai Sailo, e usiusita‘i fo‘i atunu‘u ‘iā te ia.

¹¹ O lo‘o nonoa lana asini i le vine, ma lana tama‘i asini i le vine lelei; o lo‘o ta ona ‘ofu i le uaina, ma lona ‘ie pulupulu i le toto o le fua o le vine.

¹² E mūmū ona mata i le uaina, e sisina ona nifo i le suāsusu.

¹³ O Sepulona e tu matāfaga le mea e mau ai o ia. E i ai fo‘i o ia i le mea e tau ai va‘a; e o‘o fo‘i lona tuā‘oi i Saitonu.

¹⁴ O Isakara e pei o le asini malosi o ia. O lo‘o ta‘oto i le vā o avega e lua.

¹⁵ ‘Ua iloa atu e ia le mālōlōga ‘ua lelei, ma le fanua ‘ua matagofie, ‘ona tu‘uina atu lea o lona ua i le ‘amoga, ‘ua fai fo‘i ma pologa e fai taulaga.

¹⁶ E fa‘amasino e Tanu lona nu‘u. Pei o le tasi itū‘āiga o Isaraelu.

¹⁷ E fai Tanu ma gata i le ala o le mālō, o le gata fe‘ai i le ala, e utia ai mulivae o le solofanua, e pa‘ū ai i tua lē ti‘eti‘e ai.

¹⁸ Le ALI‘I e, ‘ua ‘ou fa‘amoemoe i le olataga mai ‘iā te oe.

¹⁹ O Kato, e mālō se ‘au ‘iā te ia; a o ia, e i‘u ‘ina mālō lava ia.

²⁰ Mai ‘iā Asera o mea lololo, o lana mea e ‘ai lea; o ia fo‘i na te avatua o mea e fa‘afiafia a‘i tupu.

²¹ O Nafatali o le ‘aila ‘ua tatalaina atu ia, o lē na te talatalaina atu i ‘upu lelei.

²² O Iosefa o le la la‘au o ia e fua, o le la la‘au e fua i tafatafa o le vaipuna, e sosolo ‘ona la i luga i le pā.

²³ Na fa‘atigāina o ia e i latou o ē fanafana u; na latou fanafana atu ‘iā te ia ma ita ‘iā te ia.

²⁴ A ‘ua tumau pea le malosi o lana ‘aufana, o ona lima fo‘i ‘ua fa‘amalosia ia e ‘a‘ao o lē Malosi o Iakopo; o lo‘o tupu mai ai fo‘i le leoleo mamoe o le ma‘a lea o Isaraelu.

²⁵ E a le Atua o lou tamā o le fesoasoani ‘iā te oe, o Lē e ona le malosi uma lava na te fa‘amanuia oe i manuia mai le lagi i lugā, ma manuia mai le mea loloto o lo‘o i lalō, e manuia o susu ma le manava.

²⁶ O manuia o lou tamā ‘ua sili lava ia i manuia o o‘u tupuga, ‘ua o‘o i le tuā‘oi lava o mauga o le vavau; e o‘o pea lava ia i luga o le ulu o Iosefa, ma le tumua‘i o lē na sili i ona uso.

²⁷ O Peniamina o le luko na te saeia; o le taeao e ‘ai ai e ia le mea ‘ua maua; o le afiafi e vavaeina ai e ia o mea ‘ua faoa.”

²⁸ O i latou ‘atoa nei o itū‘āiga e sefulu ma le lua o Isaraelu; o ‘upu fo‘i ia a lo latou tamā ‘iā i latou. ‘Ua ia fa‘amanuia ai fo‘i i latou, e ta‘ito‘atasi ma lona manuia ‘ua ia fa‘amanuia ai i latou.

O le Oti o Iakopo

²⁹ ‘Ua fai atu fo‘i o ia ‘iā te i latou, o lo‘o fa‘apea atu ‘iā te i latou, “O le a fa‘aopoopoina atu a‘u i lo‘u nu‘u, ‘ia ‘outou tanu lava a‘u fa‘atasi ma o‘u tamā i le ana o lo‘o i le fanua o Eferona o le sa Hetī.

³⁰ O le ana lea o lo‘o i le fanua o Makapelu, o lo‘o i luma o Mamere i le nu‘u o Kanana, sa fa‘atauina lea fanua e Aperaamo mai ‘iā Eferona o le sa Hetī e fai ma tu‘ugamau.

³¹ O le mea lea na latou tanumia ai Aperaamo ma lana avā o Sara, o le mea fo‘i lea na latou tanumia ai Isaako ma lana avā o Repeka, o le mea fo‘i lea na ‘ou tanumia ai Lea.

³² O le fa‘atauga o le la fanua ‘atoa ma le ana o lo‘o i ai mai le fānauga a Hetī lea.”

³³ ‘Ua uma atu fo‘i le mavaega a Iakopo i ona atali‘i, ‘ona fa‘apupu‘u a‘e lea ona vae i lona moega, ‘ona tō lea o lana mānava, ‘ua fa‘aopoopoina o ia i lona nu‘u.