Isaia 9 - O LE TUSI PA'IA - Ekalesia Katoliko Roma

O le Valo‘aga i le Mesia

¹ ‘Ae le pouliuli pea i le nu‘u ‘ua puapuagātia; fa‘apei ‘ona ia fa‘alēaogāina anamua o le nu‘u o Sepulona ma le nu‘u o Nafatali; e fa‘apea ‘ona ia fa‘amamaluina ai i ona po amulī; o le ala i le vai, o le mea i tala ane o Ioritana, o Kalilaia o nu‘u ‘ese.

² O le nu‘u sa sāvavali i le pouliuli, ‘ua latou iloa le malamalama tele. O ē sa nonofo i le nu‘u o le ata o le oti, ‘ua pupula mai ‘iā te i latou le malamalama.

³ ‘Ua e fa‘ato‘ateleina le nu‘u, ‘ua e fa‘ateleina lo latou fiafia. Latou te fiafia i ou luma, e pei ‘ona fiafia i le seleselegāsaito, e pei ‘ona ‘oli‘oli o i latou o ē tufatufa vete.

⁴ Auā ‘ua e gauia le amo o lana avega, ma le sasa na i lona ua. O le to‘oto‘o o lē na sauā ‘iā te ia, pei ‘ona fai i le aso o Mitiana.

⁵ Auā o se‘evae uma o ē ‘ua fa‘ase‘eina, ‘ua ta‘alili i le tau‘a, ma le ‘ofu ‘ua liloia i le toto, e susunuina ia mea, e fai fo‘i ma fafie o le afi.

⁶ Auā ‘ua fānau mai mo i tatou le tama, ‘ua foa‘iina mai mo i tatou le atali‘i, e i lona ‘ua lē mālō. E igoa fo‘i o ia, o le Silisili‘ese, o le Faipule, o le Atua malosi, o le Tama o le fa‘avavau, o le Ali‘i o le filemū.

⁷ E leai se mea e gata mai ai ‘ona tele o lona mālō ma le filemū o lona mālō i le nofoāli‘i o Tavita ma lona mālō. E fa‘atumauina ma fa‘amausalī i le fa‘amasinoga ma le amiotonu, e āfua mai i ia ona po e o‘o i le fa‘avavau, e faia lea mea i le mā‘elegā o le ALI‘I o ‘au.

O le a Fa‘asalaina e le Ali‘i ‘iā Isaraelu

⁸ Na tu‘uina mai e le Ali‘i lana afioga ‘iā Iakopo, ‘ua pa‘ū mai fo‘i ‘iā Isaraelu.

⁹ E iloa ai fo‘i e le nu‘u uma, o Efaraima ma ē o nonofo i Samaria, o lo‘o fa‘apea mai i le fa‘amaualuga ma le fa‘afefeteina o latou loto.

¹⁰ “‘Ua solo ma‘a ‘omea, ‘ae matou te ati a‘e i ma‘a talai; ‘ua tatu‘uina sukamoru, ‘ae matou te sui i arasi.”

¹¹ O le mea lea e fa‘aosoina atu ai ‘iā te i latou e le ALI‘I o ē ‘ua ita ‘iā Resina, na te avatua fo‘i ‘au‘upega i ē ‘ua ita ‘iā te i latou;

¹² o Suria i luma ma Filisitia i tua, latou te ‘aina lava Isaraelu ma le gutu ‘ua fa‘amaga. E ui lava i ia mea uma, e le‘i liliu ‘ese lona to‘asā, ‘ae fa‘aloaloa pea lona ‘a‘ao.

¹³ Auā ‘ua lē fo‘i mai le nu‘u i lē na te taia i latou; o le ALI‘I o ‘au fo‘i ‘ua latou le sā‘ili ‘iā te ia.

¹⁴ O le mea lea e vavae‘eseina ai e le ALI‘I le ulu ma le i‘u o Isaraelu, o le lau pama ‘atoa ma le fiso i le aso lava e tasi.

¹⁵ O le toeaina ma le ali‘i mamalu o le ulu lea; o le perofeta ‘ua a‘oa‘o i le pepelo o le i‘u lea.

¹⁶ Auā o ē ‘ua fai ma ta‘ita‘i o lenei nu‘u, latou te fa‘asesēina i latou; o ē ‘ua ta‘ita‘iina fo‘i e i latou, ‘ua fa‘aumatia i latou.

¹⁷ O le mea lea e lē fiafia ai le Ali‘i i o latou taulele‘a, e le alofa fo‘i o ia ‘iā latou tama ‘ua aumatuā ma o latou fafine ‘ua oti a latou tane; auā o i latou uma ‘ua fa‘alēmata‘u ma fai amio leaga, ‘ua tautala fo‘i gutu uma i mea leaga. E ui lava i ia mea uma, e le‘i liliu ‘ese lona to‘asā, ‘ae fa‘aloaloa pea lona ‘a‘ao.

¹⁸ Auā e mū le amio leaga e pei o le afi, e susunuina ai la‘au tuitui ma la‘au talatala; e fa‘amūina fo‘i le vao filifili, ‘ua ō a‘e ai i latou peiseaī se asu fa‘aniutū.

¹⁹ O le to‘asā o le ALI‘I o ‘au e susunu ai le lau‘ele‘ele, e faia fo‘i le nu‘u e pei o fafie o le afi; latou te lē alofa le tasi i le tasi.

²⁰ E saei le tasi i le itū taumatau, a o fia ‘ai pea e ‘ai fo‘i i le itū tauagavale, ‘ae lē mā‘ona lava; e ta‘itasi ma ‘ai le ‘a‘ano o lona lava lima.

²¹ E ‘aina Efaraima e Manase, e ‘aina fo‘i Manase e Efaraima, e fa‘atasi i lā‘ua e fa‘asaga tau ‘iā Iuta. E ui lava i ia mea uma, e le‘i liliu ‘ese lona to‘asā, ‘ae fa‘aloaloa pea lona ‘a‘ao.