Isaia 5 - O LE TUSI PA'IA - Ekalesia Katoliko Roma

O le Fa‘ata‘oto i le Tōvine

¹ Se‘ia ‘ou pese atu i la‘u pele, o le pese i la‘u pele i lana tōvine. Sa i la‘u pele le tōvine i le mauga lafulemū lava.

² Na ia matuā ‘eli ai ma aoao ai ma‘a, na ia totō ai fo‘i le vine Soreka. Na ia fai fo‘i le ‘olo i ona totonu, na ia foa‘iina ai le tu‘ugāuaina. ‘Ona fa‘atalitali ai lea o ia, ‘ia fua mai ni vine, a ‘ua fua mai ai vine leaga.

³ O lenei, o ‘outou o ē nonofo i Ierusalema, ‘atoa ma tagata o Iuta, ‘inā fa‘amasino mai ia ‘iā te a‘u ma la‘u tōvine.

⁴ Se a ‘ea se mea e toe faia i la‘u tōvine ‘ou te le‘i faia? Se a fo‘i le mea ‘ua fua mai ai vine leaga, a ‘ua ‘ou fa‘atalitali ‘ia fua mai ai vine lelei.

⁵ O lenei, ‘ou te fa‘ailoa atu ‘iā te ‘outou le mea ‘ou te faia i la‘u tōvine, ‘ou te ‘ave‘eseina lona ai, ‘ona ‘aina ai lava lea, ‘ou te sōloia lona ‘aupā, ‘ona solia lava lea.

⁶ ‘Ou te fa‘atafunaina ia, e lē salaina, e lē teuteua; ‘ae tutupu ai la‘au tuitui ma la‘au talatala; ‘ou te fai atu fo‘i i ao, ‘aua ne‘i totō i ai ni timu.

⁷ Auā o le tōvine a le ALI‘I o ‘au, o le ‘āiga o Isaraelu lea, O tagata o Iuta fo‘i, o lona fa‘ato‘aga lea na ia fiafia i ai. Na ia fa‘atalitali i le fa‘amasinoga, fa‘auta fo‘i, o le fasi tagata; na ia fa‘atalitali i le amiotonu, fa‘auta fo‘i, o le uiō.

O Amioga Leaga a Tagata

⁸ ‘Oi talofa ‘iā te i latou o ē fa‘aopoopo mai lea fale ma lea fale, o ē fa‘asoso‘o ane lea fanua ma lea fanua, ‘ua lē toe ai se mea, ‘ua na o ‘outou lava e nonofo i totonu o le nu‘u.

⁹ ‘Ua fetalai mai i o‘u taliga le ALI‘I o ‘au: E moni, e fa‘atafunaina fale e tele, o fale tetele ma le lelei, e leai sē nofo ai.

¹⁰ Auā e sefulu ekere o le tōvine e fua mai ai le paita e tasi, o le somera o saito fo‘i, e fua mai ai le efa.

¹¹ ‘Oi talofa ‘iā te i latou o ē ala usu e matuā sā‘ili ‘ava, ma ‘ua nonofo pea ‘ua o‘o i le po, se‘ia fa‘avalemalolosi ai i latou i le uaina.

¹² O lo‘o i ai ‘iā latou faigā‘ai o le kitara ma le napeli ma le topa, o le fagufagu fo‘i, ‘atoa ma le uaina; a ‘ua latou le mafaufau i le galuega a le ALI‘I, ‘ua latou le va‘ai fo‘i i mea ‘ua faia e ona ‘a‘ao.

¹³ O le mea lea ‘ua ‘ave ai lo‘u nu‘u fa‘atagataotau‘a, ‘ina ‘ua vālelea i latou; o latou ali‘i fo‘i ‘ua oge i latou ma le to‘atele o le nu‘u ‘ua lailoa i le fia inu.

¹⁴ O le mea lea ‘ua fa‘alauteleina ai seoli o ia e ia, ‘ua matuā fa‘amaga tele lava lona gutu, ‘ua ō ifo ai o latou ali‘i ma le to‘atele o le nu‘u, o le vao tagata fo‘i ‘ua pisapisaō ai, ‘atoa ma lē ‘ua mitamita ‘iā te ia.

¹⁵ ‘Ua lafotūina le tagata nu‘u, ‘ua fa‘amaulaloina le ali‘i, ‘ua fa‘amaulaloina fo‘i mata o ē fa‘amaualuluga.

¹⁶ A o le ALI‘I o ‘au e vi‘ia o ia ‘ona o le fa‘amasinoga, o le Atua pa‘ia fo‘i e ta‘upa‘iaina o ia ‘ona o le amiotonu.

¹⁷ E ‘a‘ai fa‘asa‘oloto tama‘i mamoe; o mea gaogao fo‘i ‘ae pepeti e ‘aina ia e tagata ‘ese.

¹⁸ ‘Oi talofa ‘iā te i latou o ē toso le amio leaga i maea o le pepelo, ‘ua toso fo‘i le agasala peiseaī i maea o le fata fa‘ata‘avalevale;

¹⁹ o ē fa‘apea mai, “‘Ia fa‘ata‘alise o ia, ‘ia fa‘avave mai e ia lana galuega ‘ina ‘ia matou va‘ava‘ai i ai; ‘ia fa‘alatalata mai le pule a le Pa‘ia o Isaraelu, ma ‘ia o‘o mai lava, se‘i matou iloa.”

²⁰ ‘Oi talofa ‘iā te i latou o ē fai mai, ‘ua lelei le mea leaga, ‘ae leaga le mea lelei; o ē fai ma malamalama le pouliuli, ‘ae fai fo‘i ma pouliuli le malamalama; o ē fai ma mea suamalie le mea ‘o‘ona, ‘ae fai ma mea ‘o‘ona le mea suamalie.

²¹ ‘Oi talofa i ē ‘ua popoto i o latou lava manatu, ma ē ‘ua fai ma tagata mafaufau i o latou lava tāofi.

²² ‘Oi talofa i ē malolosi e inu uaina, o ē fai ma tagata totoa fo‘i e palu ai le ‘ava.

²³ O ē ta‘uamiotonuina le pagotā ‘ona o le taui, ‘ae ‘ave‘eseina le amiotonu a ē amiotonu.

²⁴ O lenei, fa‘apei ‘ona ‘aina o tagutugutu saito i le mumū o le afi, e pei ‘ona pa‘u‘ū fo‘i le mutia magumagu ‘ua mū, e fa‘apea fo‘i ‘ona pala o latou a‘a. E pusa a‘e fo‘i lo latou fuga e pei o le efuefu; auā ‘ua latou lafoa‘i le tulafono a le ALI‘I o ‘au, ‘ua latou ‘ino‘ino fo‘i i le afioga a le Pa‘ia o Isaraelu.

²⁵ O le mea lea ‘ua tele ai le to‘asā o le ALI‘I i lona nu‘u, ma ‘ua fa‘aloaloa ai lona ‘a‘ao i luga ‘iā te i latou, ma ‘ua fasia i latou, ‘ua gatete ai mauga, o latou tino oti fo‘i ‘ua pei o otaota i le moa o le ala. E ui lava i nā mea uma, ‘ae le‘i liliu ‘ese lona to‘asā, ‘ae fa‘aloaloa pea lona ‘a‘ao.

²⁶ E si‘i i luga fo‘i e ia le tagāvai i nu‘u ‘ese o mamao, na te mapumapu atu fo‘i ‘iā te i latou i tulu‘iga o le lalolagi; fa‘auta fo‘i, latou te fa‘ata‘alise ‘ona vave ō mai.

²⁷ E leai so latou e vaivai, e leai fo‘i se tasi e tautevateva; e le tulemomoe i latou, latou te lē momoe lava; e le tatalaina fusi o latou sulugātiti, e le motusia fo‘i nonoa o latou se‘evae.

²⁸ E ma‘ama‘ai a latou ū fanafana, e lolo‘u fo‘i a latou ‘aufana uma; e fa‘atusaina atigivae o a latou solofanua i alā, o a latou mea ta‘avavale fo‘i e pei o le asiosio.

²⁹ O lo latou tagi e pei o le leona fafine, latou te tagi pei o leona ta‘anoa; latou te tagi ma pupu‘e manu, latou te ‘avea ai lava, e leai fo‘i sē na te lavea‘iina.

³⁰ O lea aso latou te u ai ‘iā te i latou, e pei o le u o le sami, a va‘ai fo‘i se tasi i le lau‘ele‘ele, fa‘auta, o le pouliuli e puapuagātia ai, ‘ua fa‘apouliuligia fo‘i le malamalama i ona ao.