Isaia 2 - O LE TUSI PA'IA - Ekalesia Katoliko Roma

O le Valo‘aga i le Mālō o le Mesia

¹ O le mea na va‘aia e Isaia le atali‘i o Amota ‘iā Iuta ma Ierusalema.

² O aso e gata ai, e o‘o ‘ina fa‘atumauina ai o le mauga o i ai le fale o le ALI‘I i tumutumu ō atu mauga, e fa‘amaualugaina fo‘i e sili i mauga, ‘ona gasolo ane ai lea o nu‘u uma i ai.

³ E ō mai lava nu‘u e tele, ma latou fa‘apea ane, “Ō mai ia, tatou ō a‘e ia i le mauga o le ALI‘I, o le fale o le Atua o Iakopo. E a‘oa‘o mai fo‘i e ia ‘iā te i tatou i ona ala, ‘ona tatou sāvavali ai lea i ona ala.” Auā e alu atu le tulafono a‘i Siona, o le afioga fo‘i a le ALI‘I a‘i Ierusalema.

⁴ E fa‘amasino fo‘i o ia i nu‘u ‘ese, ma a‘oa‘i atu i nu‘u e tele; ‘Ona latou tu‘i ai lea ‘iā latou pelu e fai ma u‘amea o suōtosina, o latou tao fo‘i e fai ma polo e teu a‘i vine. E lē si‘i atu le pelu o le tasi nu‘u i le tasi nu‘u, latou te lē toe a‘oa‘o fo‘i i tau‘a.

⁵ Le ‘āiga o Iakopo e, ō mai ia ‘inā tatou sāvavali i le malamalama o le ALI‘I.

⁶ ‘Ua e lafoa‘iina lava lou nu‘u le ‘āiga o Iakopo, auā ‘ua tumu i latou i mea mai sasa‘e ma latou ‘i‘ite ao o le lagi fa‘apei o Filisitia, ‘ua latou osi feagaiga fo‘i ma le fānau a tagata ‘ese.

⁷ ‘Ua tumu fo‘i lo latou nu‘u i ario ma auro, e lē masino fo‘i o latou ‘oloa. ‘Ua tumu fo‘i lo latou nu‘u i solofanua, e lē masino lava o latou kariota.

⁸ ‘Ua tumu fo‘i lo latou nu‘u i tupua; ‘ua latou ifo i galuega a o latou lima, o mea lava na faia i o latou tamatama‘i lima.

⁹ ‘Ua lafotūina le tagata nu‘u, ‘ua fa‘amaulalo fo‘i le ali‘i; ‘e te lē fa‘amāgaloina fo‘i i latou.

¹⁰ Alu ia i totonu o le papa, ‘inā lafi ia i le ‘ele‘ele, ‘ona o le mata‘utia o le ALI‘I ma lona mamalu silisili.

¹¹ E fa‘amaulaloina mata fa‘asiasia o tagata nu‘u; e fa‘amaulaloina fo‘i le fa‘amaualuga o ali‘i; na o le ALI‘I lava e vi‘ia i lea aso.

¹² Auā o le aso o le ALI‘I o ‘au, e o‘o atu lea i ē fa‘asiasia ma ē fa‘amaualuga uma lava, ‘atoa fo‘i ma ē o fa‘afefeteina uma; ‘ona fa‘amaulaloina ai lea.

¹³ E o‘o i arasi uma ‘ua ‘u‘umi ma le maualuluga o Lepanona; e o‘o fo‘i i aluna uma o Vasana;

¹⁴ e o‘o i atu mauga maualuluga uma; e o‘o fo‘i i mauga tetele uma;

¹⁵ e o‘o i ‘olo maualuluga uma; e o‘o fo‘i i pā uma e le ā‘ea;

¹⁶ e o‘o i va‘a uma o Tasesa; e o‘o fo‘i i mea matagofie uma.

¹⁷ E fa‘amaulaloina lava le fa‘asiasia o tagata nu‘u; e fa‘amaulaloina fo‘i le fa‘amaualuga o ali‘i; na o le ALI‘I lava e vi‘ia i lea aso.

¹⁸ E matuā mavae lava tupua.

¹⁹ Latou te ulu atu fo‘i i ana o papa ma lua o le ‘ele‘ele, ‘ona o le mata‘utia o le ALI‘I ma lona mamalu silisili, pe a tula‘i o ia e lūlūina le lau‘ele‘ele.

²⁰ O lea aso e lafoa‘i atu ai e tagata a latou tupua ario ma a latou tupua auro, na latou faia mo i latou e ifo i ai, e lafoa‘iina lava i afora ma pe‘a.

²¹ ‘Ina ‘ia latou ō atu i mavae vae o papa, ‘atoa ma vā i papa, ‘ona o le mata‘utia o le ALI‘I ma lona mamalu silisili, pe a tula‘i o ia e lūlūina le lau‘ele‘ele.

²² O ‘outou na, sōia le fa‘atuatua i tagata, o i ai lona mānava i ona pogaiisu; auā se a le mea e manatua ai o ia?