Iona 2 - O LE TUSI PA'IA - Ekalesia Katoliko Roma

O le Tatalo a Iona

¹ Na tatalo fo‘i Iona i le ALI‘I lona Atua i le manava o le i‘a, ‘ua fa‘apea atu,

² “Na a‘u vala‘au atu i le ALI‘I ‘ona o lo‘u puapuagā, ‘ua na fa‘afofoga mai fo‘i ‘iā te a‘u. Na ‘ou ‘alaga atu nai le mea maulalo i tu‘ugamau, ‘ua e fa‘afofoga i lo‘u leo.

³ Na e lafoina a‘u i le moana, i totonu lava o le sami; na si‘osi‘oina lava a‘u e le au; na lofia a‘u i ou galu ma ou peau uma lava.

⁴ ‘Ona ‘ou fa‘apea ai lea, ‘‘Ua lafoa‘iina a‘u a‘i luma o ou fofoga; a ‘ou te toe fa‘asaga atu i lou malumalu pa‘ia.’

⁵ ‘Ua si‘osi‘oina a‘u e le sami, na manū a‘u oti; ‘ua ufitia a‘u i le moana, ‘ua fusia lo‘u ulu i le limu.

⁶ ‘Ua ‘ou alu ifo i ‘auvae mauga; ‘ua fa‘amauina fa‘amau o le lalolagi i luga ‘iā te a‘u e fa‘avavau; ‘ae te ‘aveina a‘e lo‘u ola a‘i le lua, le ALI‘I e lo‘u Atua.

⁷ Na ‘ou manatua le ALI‘I, ‘ina o vaivai o lo‘u loto i totonu ‘iā te a‘u; na o‘o atu fo‘i la‘u tatalo ‘iā te oe i lou malumalu pa‘ia.

⁸ O ē ‘ua ‘ana‘ana i mea fa‘atauva‘a ma le pepelo ‘ua lafoa‘iina e i latou o mea e manuia ai i latou.

⁹ A o a‘u ‘ou te faitaulaga ‘iā te oe ma le ‘upu fa‘afetai; ‘ou te faia le mea na ‘ou tautō ai. Mai le ALI‘I le olataga.”

¹⁰ ‘Ua fetalai atu le ALI‘I i le i‘a, ‘ona luai lea e ia o Iona i le ‘ele‘ele matūtū.