Hosea 11 - O LE TUSI PA'IA - Ekalesia Katoliko Roma

O le Alofa o le Atua ‘iā Isaraelu

¹ O ona po na tamaitiiti ai Isaraelu, na ‘ou alofa atu ‘iā te ia, na ‘ou vala‘auina fo‘i lo‘u atali‘i nai Aikupito.

² Na latou‘alalaga ‘iā te i latou, a ‘ua latou ō ‘ese ‘iā te i latou. na latou fai taulaga ‘iā Paala ma fa‘amū mea manogi i tupua ‘ua ta.

³ Na ‘ou a‘oa‘oina Efaraima ‘ia savali, o lo‘o ‘ou tauta‘ita‘i ‘iā te i latou i o latou lima; a ‘ua lē iloa e i latou ‘ona ‘ou fa‘amālōlōina o i latou.

⁴ Na ‘ou tosoina i latou i maea a le tagata, o maea alofa lava; na ‘ou i ai ‘iā te i latou e pei o ē si‘i a‘e e amo a‘i o latou ‘aulamu, na a‘u tu‘uina atu fo‘i mea e ‘ai ‘iā te i latou.

⁵ E lē toe fo‘i o ia i le nu‘u o Aikupito, ‘ae ‘avea le Asuria mōna tupu; auā ‘ua lē mafafai i latou ‘ona toe fo‘i atu.

⁶ E tumau le pelu i ona ‘a‘ai, e fa‘aumatia ai fo‘i ‘ona la ma fano ai, auā o a latou lava filifiliga.

⁷ ‘Ua naunau lo‘u nu‘u e liliu ‘ese ‘iā te a‘u; latou te vala‘au i ai e ō mai i lē Silisili‘ese, ‘ae leai se tasi e vivi‘i atu ‘iā te ia.

⁸ Efaraima e, ‘ou te mafai fa‘apefea ‘ona tu‘u atu ‘iā te oe? Isaraelu e, ‘ou te tu‘uina atu oe fa‘apefea? ‘Ou te mafai fa‘apefea ‘ona tu‘uina atu o oe e pei o Atama? ‘ou te tu‘uina atu oe fa‘apefea e pei o Sepoima? ‘Ua liua lo‘u loto i totonu ‘iā te a‘u; ‘atoa fo‘i ma lo‘u alofa mutimutivale ‘ua tupu.

⁹ ‘Ou te lē fa‘ao‘o lo‘u ita tele; ‘ou te lē toe fa‘aumatia Efaraima; Auā o a‘u o le Atua, ‘ae lē se tagata, o le Pa‘ia o lo‘o i totonu ‘iā te oe; ‘ou te lē alu atu ma le ita.

¹⁰ Latou te mulimuli atu i le ALI‘I, e tagi lava ia e pei o se leona; a tagi o ia, ‘ona ta‘alise mai ai lea o le fānau mai sisifo.

¹¹ Latou te ta‘alise mai e pei o se manulele mai Aikupito, e pei o se lupe fo‘i mai le nu‘u o Asuria; ‘ou te fa‘anonofo fo‘i ‘iā te i latou i o latou fale, ‘ua fa‘apea mai ai le ALI‘I.

¹² ‘Ua si‘osi‘o Efaraima ‘iā te a‘u i le pepelo, o le ‘āiga fo‘i o Isaraelu ‘ua si‘osi‘o ‘iā te a‘u i le ‘ole‘ole; a ‘ua pule pea Iuta fa‘atasi ma le Atua, ‘ua fa‘amaoni ia fa‘atasi ma le ‘au pa‘ia.