Failauga 11 - O LE TUSI PA'IA - Ekalesia Katoliko Roma

O le Amio Alofa ma le Fa‘autauta Lelei

¹ ‘Inā lafo ia lau mea e ‘ai i luga o le vai; auā a mavae aso e tele ‘e te toe maua.

² Avatu se tufa‘aga i le to‘afitu po o le to‘avalu; auā ‘e te lē iloa pe se a se mea leaga e tupu i le lalolagi.

³ ‘Āfai e tūtūmu ao, e totō ifo ai le timu i le lalolagi; ‘āfai fo‘i e pa‘ū se la‘au i le itū i saute po o le itū i matū, o le mea e pa‘ū i ai le la‘au, e i ai pea ia.

⁴ O lē na te mānatunatu i le matagi e le lūlū saito o ia; o lē na te va‘ava‘ai fo‘i i ao e le selesele lava o ia.

⁵ E pei ‘ona lē iloa e oe le ala o le matagi ma ‘ona tutupu o ivi i le manava o lē ‘ua tō, e fa‘apea fo‘i ‘ona lē iloa e oe le galuega a le Atua, o lē na te faia mea uma lava.

⁶ O le taeao ‘ia e lūlū ai au saito, ‘aua fo‘i le mapu lou lima i le afiafi; auā ‘e te lē iloa po o le fea o manuia, o lenei, po o lenā, pe gatusa ‘ona lelei ia mea e lua.

⁷ E lelei lava le malamalama, o le mea fo‘i e fiafia ai mata pe a iloa atu le lā;

⁸ ‘ae ‘āfai e ola se tagata i tausaga e tele ma ‘oli‘oli i ia tausaga uma; a ‘ia manatu o ia i aso e pouliuli ai, auā e tele ia; o mea uma fo‘i e o‘o mai, o mea fa‘atauva‘a lava ia.

O Fautuaga i Tupulaga Talavou.

⁹ Le taule‘ale‘a e, ‘inā ‘oli‘oli ia i lou tamaitiiti, ‘ia fiafia fo‘i lou loto i aso o lou taule‘ale‘a ma ‘ia e savali i ala ‘ua e loto i ai, ma mea e va‘ai i ai ou mata; a ‘ia e iloa e fa‘amasinoina oe e le Atua ‘ona o na mea uma.

¹⁰ O lenei, ‘inā fa‘ate‘a ‘ese atu ia le tigā i lou loto ma tu‘u ‘ese atu le leaga i lou tino; auā o le tamaitiiti ma le taule‘ale‘a e fa‘atauva‘a ia.