Fa‘ata‘oto 9 - O LE TUSI PA'IA - Ekalesia Katoliko Roma

O le Amio a le Poto

¹ O le poto ‘ua faia e ia lona fale; ‘ua ia talai ona pou e fitu.

² ‘Ua na fasia ana manu; ‘ua na suia lana uaina; ‘ua na laulau atu fo‘i mea i lana la‘o‘ai.

³ ‘Ua ia ‘auina atu lona galu teine; ‘ua tala‘i i mea maualuluga o le ‘a‘ai,

⁴ “‘Ai se faigofie, ‘ia afe mai o ia ‘i‘inei;” o lē ‘ua leai sona mafaufau, ‘ua ia fa‘apea atu i ai,

⁵ “Ō mai ia, ‘inā ‘a‘ai la‘u areto ma inu i la‘u uaina ‘ua ‘ou suia.

⁶ ‘Ia ‘outou tu‘ulafoa‘i atu i ē vālelea, tou te ola ai, ma ‘ia ‘outou ui atu i le ala e atamai ai.”

⁷ O lē na te a‘oa‘i atu i lē tauemu e maua o ia le fa‘amāina; ma lē la te finau ma le tagata amio leaga e maua e ia le ila.

⁸ ‘Aua ne‘i a‘oa‘i atu i le tauemu, ne‘i ‘inosia oe e ia; a‘oa‘i atu i lē ‘ua poto, ‘ona alofa mai lea o ia ‘iā te oe.

⁹ A‘oa‘o atu i lē ‘ua poto e atili poto ai o ia; a‘oa‘o atu i lē ‘ua amiotonu e tupu ai pea lona poto.

¹⁰ O le mata‘u i le ALI‘I, o le amataga o le poto lea; ‘ia iloa fo‘i lē Pa‘ia, o le atamai lava lea.

¹¹ Auā o a‘u e fa‘ateleina ai ou aso; e fa‘aopoopoina ai fo‘i tausaga i lou olaga.

¹² ‘Āfai ‘e te poto mo oe lava ‘e te poto ai; ‘āfai ‘e te tauemu, na o oe lava e nofo sala ai.

O le tu a lē ‘ua Valea

¹³ O le fafine valea, ‘ua leoleoā lava ia, e faigofie lava o ia, na te lē iloa se mea.

¹⁴ ‘Ua nofo o ia i le faitoto‘a o lona fale, i luga lava o le nofoa i mea maualuga i le ‘a‘ai;

¹⁵ ‘ina ‘ia vala‘au i ē ui ane i le ala, o ē sāvavali tonu i o latou ala.

¹⁶ “O sē faigofie, ‘ia afe mai o ia ‘i‘inei;” o lē ‘ua leai sona mafaufau, ‘ua ia fa‘apea atu i ai,

¹⁷ “E suamalie le vai ‘ua gaoia, e manogi fo‘i le areto ‘ua natia.”

¹⁸ A ‘ua lē iloa e ia o i lea mea agaga o ē ‘ua oti; ‘ua i mea maulalo o seoli ē ‘ua vala‘auina e ia.