Fa‘ata‘oto 8 - O LE TUSI PA'IA - Ekalesia Katoliko Roma

O le Silisili o le Aogā o le Poto

¹ E lē ‘ua vala‘au ‘ea le poto ma leo tele mai le fa‘autauta?

² O lo‘o tu o ia i le tumutumu o mea maualuga i tafatafa ane o le ala, i le fetaulaigāala.

³ ‘Ua ‘alaga o ia i le itū o le puipui, i le ala o le ‘a‘ai, i le mea e ui atu ai i le faitoto‘a.

⁴ “‘Ou te vala‘au ‘iā te ‘outou tagata; ma ‘ou leo tele atu i le fānau a tagata.

⁵ ‘Outou ē faigofie e, ‘ia ‘outou iloa le fa‘autauta; ma ‘outou ē vālelea, ‘ia loto matala ‘outou.

⁶ ‘Ia ‘outou fa‘alogologo mai, auā ‘ou te tautalatala i mea sili; e tautala o‘u laugutu i mea tonu.

⁷ Auā e tautala lo‘u gutu ma le fa‘amaoni; a o le amio leaga, e ‘inosia lea i o‘u laugutu.

⁸ O ‘upu uma a lo‘u gutu ‘ua tonu ia; e lē o i ai se ‘upu fa‘a‘ole‘ole ma le fa‘api‘opi‘o.

⁹ E sa‘o uma lava ia i lē ‘ua lagona; e tonu fo‘i i ē ‘ua maua le poto.

¹⁰ ‘Ia ‘outou talia la‘u a‘oa‘o atu, ‘ae ‘aua i le ario; ma ia talia le poto e sili i le auro e aupito lelei.

¹¹ Auā e sili ‘ona lelei le poto i penina; ma mea fa‘afiafia uma lava e lē tusa ma ia.

¹² O a‘u o le poto ma te mau ma le fa‘autauta; ‘ou te maua fo‘i le poto i mafaufau.

¹³ O le mata‘u i le ALI‘I, o le ‘ino‘ino lea i le leaga; o le fa‘amaualuga ma le loto fefete, ma le amio leaga, ma le gutu fa‘api‘opi‘o, ‘ou te ‘ino‘ino i ai.

¹⁴ ‘Ua ‘iā te a‘u le mafaufau ma le poto; o a‘u nei lē atamai, ‘ua ‘iā te a‘u le malosi.

¹⁵ O a‘u e tupu ai tupu; e pule tonu ai fo‘i ali‘i.

¹⁶ O a‘u e ali‘i ai ali‘i sili ma ali‘i, o fa‘amasino uma o le lalolagi.

¹⁷ ‘Ou te alofa atu ‘iā i latou o ē alofa mai ‘iā te a‘u; o ē sā‘ili‘ili mai fo‘i ‘iā te a‘u, latou te maua a‘u.

¹⁸ O lo‘o ‘iā te a‘u le ‘oloa ma le mamalu; o le ‘oloa ‘anagatā ma le amiotonu.

¹⁹ O la‘u fua e sili ‘ona lelei lea i le auro, o le auro lelei lava; o mea fo‘i e tupu mai ‘iā te a‘u, e sili ‘ona lelei ia i le ario sili.

²⁰ ‘Ou te savali i le ala o le amiotonu, i magāala o le fa‘amasinoga.

²¹ ‘Ina ‘ia ‘ou avatua le ‘oloa i ē ‘ua alofa ‘iā te a‘u, ‘ia fai mo latou; ‘ou te fa‘atumuina fo‘i mea e teu ai o latou ‘oa.

²² O le ALI‘I e ona lava a‘u, o le amataga o lona ala, e muamua i ana galuega anamua.

²³ Na fa‘au‘uina a‘u mai le vavau, mai le amataga, a o leai se lalolagi.

²⁴ Na fānaua a‘u, a o leai ni mea loloto; a o leai fo‘i ni puna e puna tele mai ai le vai.

²⁵ Sa fānaua a‘u, a o le‘i fa‘avaeina mauga, e leai fo‘i ni mauga iti;

²⁶ a o le‘i faia e ia le lau‘ele‘ele ma le vao, ma le tumutumu o le efu o le lalolagi.

²⁷ A o fa‘atumauina e ia le lagi na ‘ou i ai, ‘ina o tusi fa‘ata‘ali‘oli‘o e ia i luga o le fogātai.

²⁸ A o fa‘amauina e ia o ao i luga; a o fa‘amauina e ia o puna o le moana.

²⁹ A o tofia e ia le tuā‘oi o le sami, ‘ia lē sopo‘ia e lona suāsami lona matāfaga; a o tusia e ia fa‘avae o le lalolagi;

³⁰ na ‘ou i ai ma ia, o a‘u o le tufuga; na fai fo‘i a‘u mōna fiafia i lea aso ma lea aso; sa ‘ou ‘oli‘oli i ona luma i aso uma lava.

³¹ Sa ‘ou ‘oli‘oli i mea e mau ai tagata i lona lalolagi; o lo‘u fiafia fo‘i, sa i le fānau o tagata lea.

³² “O lenei, le fānau e, fa‘alogologo mai ia ‘iā te a‘u; ‘amu‘ia lava i latou o ē tausi i o‘u ala.

³³ ‘Ia ‘outou fa‘alogologo i mea e a‘oa‘o atu, ‘ia ‘outou popoto ai; ‘aua fo‘i le te‘ena.

³⁴ ‘Amu‘ia le tagata ‘ua fa‘alogologo mai ‘iā te a‘u; o lo‘o mataala i ‘ou puipui i lea aso ma lea aso; o lo‘o leoleo i pou o o‘u faitoto‘a.

³⁵ Auā o lē ‘ua maua a‘u, ‘ua maua e ia le ola; e maua fo‘i e ia le alofa mai i le ALI‘I.

³⁶ A o lē agasala mai ‘iā te a‘u, ‘ua fa‘asaunoa e ia lona lava ola; ‘atoa uma o ē ‘ino‘ino ‘iā te a‘u, ‘ua latou manana‘o i le oti.”