Fa‘ata‘oto 7 - O LE TUSI PA'IA - Ekalesia Katoliko Roma

O Togafiti a le Fafine Mulilua

¹ Lo‘u atali‘i e, ‘ia e tausi a‘u ‘upu ma e teu a‘u poloa‘iga ‘iā te oe.

² ‘Ia e tausi a‘u poloa‘iga, ‘e te ola ai ma a‘u tulafono e pei o lou tamatama‘imata;

³ ‘ia e fusi ai i ou tamatama‘i lima; ‘ia e tusi ai i le papa o lou loto;

⁴ ‘ia e fai atu i le poto, “O oe o lo‘u tuafafine;” ma ‘ia e ta‘ua le atamai, o lou ‘āiga lea.

⁵ ‘Ina ‘ia leoleo ‘iā te oe a‘i le fafine ‘ese, o le fafine ‘ese na te fa‘a‘ole‘ole i ana ‘upu.

O le Fafine Fa‘a‘ole‘ole

⁶ Auā o le fa‘amalama o lo‘u fale na ‘ou va‘ava‘ai atu ai i le mea fa‘amata‘upega;

⁷ ‘ona ‘ou va‘ai atu ai lea i ē faigofie; na ‘ou iloa ‘ua i taulele‘a le tasi tama, ‘ua leai sona mafaufau;

⁸ na ui ane o ia i le ala e lata ane i le fetaulaigāala e nofo ai le fafine; na ia alu ane i le ala i lona fale,

⁹ i le segisegi, i le afiafi, i le tulua o po, i le pouliuli;

¹⁰ fa‘auta fo‘i, na fetaia‘i ma ia le fafine ‘ua ‘ofu i le ‘ofu o le fafine talitane, ‘ua ‘iā te ia fo‘i le loto pepelo;

¹¹ ‘ua leoleoā o ia ma le vaogatā; ‘ua lē nofo tumau ona vae i lona fale.

¹² Se itū aso ‘ua i fafo, se itū aso ‘ua i malae; na te lamalama fo‘i e lata ane i fetaulaigāala uma lava.

¹³ Na ia pu‘e atu fo‘i ‘iā te ia ma sogi ‘iā te ia ‘ua mata fa‘alēmā; ma ‘ua fa‘apea atu ‘iā te ia,

¹⁴ “‘Ua ‘iā te a‘u taulaga fa‘afetai; o le aso nei, ‘ua ‘ou avatu ai mea na ‘ou tautō ai;

¹⁵ o le mea lea na ‘ou sau ai e fa‘afetaia‘i ‘iā te oe; e sā‘ili lava ‘iā te oe, ‘ua ‘ou maua fo‘i oe.

¹⁶ ‘Ua fofola lo‘u moega i ‘ie ‘afu, o le ‘ie pulepule mai Aikupito.

¹⁷ ‘Ua ‘ou lūlūina lo‘u moega i le muro ma aloe, ma le kinamomi;

¹⁸ sau ia, ‘inā tā fa‘amalilie i le alofa, se‘ia o‘o i le taeao, ‘ia tā fiafia lava i le fealofani.

¹⁹ Auā e lē i ai la‘u tane i lona fale; ‘ua alu o ia i le malaga mamao.

²⁰ ‘Ua alu ma ia le taga tupe; e sau o ia i lona ‘āiga i le masina e fa‘ato‘ā va‘aia.”

²¹ Na ia fa‘asesē ‘iā te ia i le tele o ana togafiti; na ia tōsina o ia i ona laugutu fa‘a‘ole‘ole.

²² ‘Ua mulimuli loa o ia ‘iā te ia, e pei o le povi ‘ua alu a fasia; e pei o le vale ‘ua alu i le a‘oa‘iga o noanoaga;

²³ se‘ia ati le u i lona ate, e pei ‘ona fa‘avave atu le manu i le mailei; na te lē iloa ‘ua saunia lea e mate ai o ia.

²⁴ O lenei, le fānau e, ‘ia ‘outou fa‘alogo mai ‘iā te a‘u; ‘ia ua‘i mai o ‘outou taliga i ‘upu a lo‘u gutu;

²⁵ ‘aua ne‘i afe lou loto i ona ala; ‘aua ne‘i e sesē atu i ona magāala.

²⁶ Auā e to‘atele ‘ua lafotūina e ia ‘ua manunu‘a; o ē malolosi lava o i latou uma o ē ‘ua fasiotia e ia.

²⁷ O lona fale, o le ala i seoli lea, e alu ifo ai i ana o le oti.