Fa‘ata‘oto 28 - O LE TUSI PA'IA - Ekalesia Katoliko Roma

O le Amio Leaga; ma le Fa‘amaoni

¹ E sōsōla o ē amio leaga, a o leai sē tuliloa; a o ē amiotonu, e pei o le leona ta‘anoa i latou ‘ona lē mata‘u.

² O le fouvale o le nu‘u e to‘atele ai ona ali‘i; a o le ali‘i mafaufau ma le poto, e fa‘afualoaina ai le mālō.

³ O le tagata mativa o lē ‘ua fa‘asauā i ē matitiva, o le timuga e palasi ifo lea, ‘ae lē tupu ai ni mea e ‘ai.

⁴ O ē tu‘ulafoa‘i le tulafono, latou te vivi‘i i lē ‘ua amio leaga; a o ē tausiusi i le tulafono, latou te tigā lava ‘iā i latou.

⁵ O tagata amio leaga latou te lē lagona le fa‘amasinoga; a o ē sā‘ili i le ALI‘I ‘ua latou lagona mea uma.

⁶ E sili ‘ona lelei o le tagata mativa ‘ua savali i lana amiotonu, i le tagata mau‘oa ‘ua fa‘api‘opi‘o ona ala.

⁷ O lē ‘ua ‘ana‘ana i le tulafono, o le atali‘i mafaufau o ia; a o lē ‘ua aumea ma ē ‘ai tetele, e mā ai lona tamā ‘ona o ia.

⁸ O lē ‘ua fa‘atele ana ‘oloa i se totogi fa‘asili, po o se mea fa‘asili, na te fa‘aputuina ia mea mo lē ‘ua alofa i ē matitiva.

⁹ O lē ‘ua liliu ‘ese ona taliga ‘ae lē fa‘alogologo i le tulafono, e ‘inosia lana lava tatalo.

¹⁰ O lē ‘ua fa‘asesē i ē amio sa‘o i le ala leaga, e pa‘ū o ia i lana lava lua; a o ē ‘ua sao ‘ona lelei, e fai mo latou tofi mea lelei.

¹¹ O le tagata mau‘oa, e poto o ia i lona manatu; a o le tagata mativa poto, na te su‘esu‘e ‘iā te ia.

¹² A ‘oli‘oli ē amiotonu, e tele ai le manuia; ‘ae a tula‘i mai ē amio leaga, ‘ua lalafi ai tagata.

¹³ O lē ‘ua ufiufi lona solitulafono, e le manuia o ia; a o lē ‘ua fa‘aali ma lafoa‘iina, e alofagia o ia.

¹⁴ ‘Amu‘ia le tagata ‘ua lē aunoa ‘ona mata‘u o ia; a o lē ‘ua fa‘ama‘a‘a lona loto, e pa‘ū o ia i le leaga.

¹⁵ O le leona tagi ma le urosa fia ‘ai, o le ali‘i amio leaga lea ‘ua pule i le nu‘u mativa.

¹⁶ O le ali‘i ‘ua leai sona mafaufau, ‘ua tele ana sauāga; a o lē ‘ino‘ino i le matape‘ape‘a, e fa‘alevalevaina ona aso.

¹⁷ O le tagata ‘ua fa‘asauā ‘ua fasioti ai le tasi, e sola atu lava ia, e o‘o i le lua; ‘aua le tāofia o ia.

¹⁸ O lē ‘ua savali ma lana amio ‘ua sa‘o, e fa‘aolaina o ia; a o lē ‘ua fa‘api‘opi‘o i ala e lua, e pa‘ū o ia i se tasi o ia ala.

¹⁹ O lē galue i lona fanua, e mā‘ona o ia i mea e ‘ai; a o lē mulimuli i tagata fa‘atauva‘a, e mā‘ona o ia i le mativa.

²⁰ O le tagata fa‘amaoni, e tele mea e manuia ai o ia; a o lē ‘ua fa‘ata‘alise ‘ona mau‘oa, e lē fa‘asaoina o ia.

²¹ O le fa‘ailogaina o tagata, e lē lelei lea; e solitulafono lea tagata ‘ona o le fāsi areto.

²² E fa‘ata‘alise i le fia mau‘oa le tagata mataoge; ‘ae lē iloa e ia e o‘o mai le mativa ‘iā te ia.

²³ O lē ‘ua a‘oa‘i i le tagata, e mulimuli ane e alofagia o ia e sili i lē ‘ua tautala fa‘a‘ole‘ole.

²⁴ O lē na te faoa mea a lona tamā ma lona tinā, ‘ae fai ane o ia, “E lē se solitulafono lea;” e fa‘atasia o ia ma le tagata na te fa‘atauma‘oi mea.

²⁵ O lē ‘ua fefete lona loto, na te fa‘atupuina le misa; a o lē fa‘atuatua i le ALI‘I, e matuā mā‘ona lava ia.

²⁶ O lē ‘ua fa‘atuatua i lona lava loto, o le vale ia; a o lē savali ma le poto, e lavea‘iina o ia.

²⁷ O lē ‘ua foa‘i atu i le tagata mativa, e le mativa o ia; a o lē ‘alo ai ona fofoga e lāufetu‘uina o ia.

²⁸ A tula‘i mai ē amio leaga ‘ua lalafi ai tagata, ‘ae a fano i latou ‘ua fa‘ato‘ateleina ē amiotonu.