Fa‘ata‘oto 27 - O LE TUSI PA'IA - Ekalesia Katoliko Roma

O le Uiga o le Alofa; o le Aogā o Galuega

¹ ‘Aua ‘e te mitamita i le aso taeao; auā ‘e te lē iloa se mea e tupu a taeao.

² ‘Ia vi‘ia oe e le tagata ‘ese, ‘ae lē o lou lava gutu, ‘ia vi‘ia e se tasi, ‘ae lē o ou lava laugutu.

³ E mamafa le ma‘a, e mamafa fo‘i le oneone; a o le ita o le vale, e sili ‘ona mamafa lea i ia mea e lua.

⁴ O le lotoa o le sauāga lea; o le ita o le tāfega lea; a o ai sē tu i luma o lē fuā?

⁵ E sili ‘ona lelei o le a‘oa‘iga ‘ua aliali mai, i le alofa ‘ua lilo.

⁶ E mafai ona e talia manu‘a mai lau uō, ‘ae o le tele o sogi o lē e ‘ino‘ino ‘iā te oe, o le pepelo lava lea.

⁷ O le tagata ‘ua mā‘ona e tete‘e atu e ia i le meli; a o le tagata ‘ua mate i le fia ‘ai, e suamalie ‘iā te ia mea ‘o‘ona uma.

⁸ E pei o le manu ‘ua lele ‘ese i lona ōfaga, e fa‘apea le tagata ‘ua ta‘asē ai lona lava nu‘u.

⁹ O le suāu‘u ma le mea manogi e fa‘afiafiaina ai le loto; ‘ae o le popole, e fa‘alavelave i le filemū o le mafaufau.

¹⁰ ‘Aua ‘e te tu‘ulafoa‘iina lau uō, ma le uō a lou tamā; ‘aua fo‘i ‘e te ulu atu i le fale o lou uso i le aso ‘e te tigā ai; auā e sili ‘ona lelei o lē lua te tuā‘oi ‘ua latalata mai, i le uso e mamao.

¹¹ Lo‘u atali‘i e, ‘ia poto oe ma e fa‘afiafia lo‘u loto; ‘ona ‘ou mau tali ai lea i lē fāifai mai.

¹² O lē ‘ua fa‘autauta, na te iloa atu le leaga ma lafi ai; a o ē ‘ua faigofie, e ō atu pea i latou, ‘ona fa‘asalaina ai lea.

¹³ ‘Ia e talia le ‘ofu o lē ‘ua fai ma moni o le tagata ‘ese; ma ‘ia talia lana mea e tu‘u fa‘afa‘atau, ‘ona o le fafine ‘ese.

¹⁴ O lē ‘ua fa‘amanuia i lana uō ma le leo tele, e tula‘i o ia i le taeao lava e ta‘ua lea o le fetu‘u ‘iā te ia.

¹⁵ O le tutulu so‘o i le aso timu ma le fafine fa‘amisa, e tutusa ia;

¹⁶ o lē ‘ua nanā ‘iā te ia, ‘ua nanā e ia le matagi; ma le suāu‘u o lona lima taumatau e ‘alaga mai.

¹⁷ E ma‘ama‘ai le u‘amea i le u‘amea, e fa‘apea fo‘i ‘ona fa‘amafanafana o le tagata i lana uō.

¹⁸ O lē ‘ua leoleo i le mati na te ‘ai i lona fua; o lē ‘ua ‘ana‘ana fo‘i i lona ali‘i e vi‘ia o ia.

¹⁹ E pei ‘ona va‘aia lou ata i le vai; e fa‘apea fo‘i ona va‘aia lou ata i le loto o le tasi tagata.

²⁰ O tu‘ugamau ma le malaia e le mā‘o‘ona i lā‘ua; o mata fo‘i o tagata e le malie i le va‘ai.

²¹ O le ario ma le auro e tofotofoina i le afi; e tofotofoina fo‘i le lelei o le tagata i le ‘onosa‘i.

²² E tusa lava pe ‘e te tu‘imomomo le vale i le mea e tu‘i a‘i le ipu po‘o le mea e tu‘i a‘i saito, e le te‘a ‘ese lona valea mai ‘iā te ia.

²³ ‘Ia e matuā iloa tino o au mamoe, ma e mafaufau i ou lafu;

²⁴ auā e le fa‘avavau le ‘oloa; e lē o‘o fo‘i le paleali‘i i lea tupulaga ma lea tupulaga.

²⁵ ‘Ua tutupu mai le mutia ma ‘ua iloa mai le vao mu‘a, e fa‘aputuina fo‘i le vao iti o mauga.

²⁶ O tama‘i mamoe e maua ai ou ‘ofu; ma ‘oti o le tau lea o le fanua.

²⁷ E lava fo‘i suāsusu o ‘oti, e ‘ai ai oe, e ‘ai ai fo‘i lou ‘āiga; e mā‘o‘ona ai fo‘i ou teine e ‘au‘auna.