Fa‘ata‘oto 26 - O LE TUSI PA'IA - Ekalesia Katoliko Roma

O ‘Upu i le Vale ma le Paiē ma le Fa‘atuaupua

¹ E pei o le kiona i le tausaga vevela, e pei o le uaga fo‘i ona po o le seleselegāsaito; e fa‘apea lava ‘ona lē onomea o le vi‘iga i le vale.

² E pei o le manulele ‘ua fealua‘i ma le pe‘ape‘a ‘ua felelea‘i e fa‘apea le fetu‘u fai fua e lē taunu‘u auā e leai sona mafua‘aga.

³ O le sasa mo le solofanua, o le fa‘agutu mo le asini, ma le la‘au mo le tua o le vale.

⁴ ‘Aua ne‘i e tali atu i le vale e tusa ma lona valea; ‘ina ne‘i tusa oe ma ia.

⁵ ‘Ia tali atu i le vale e tusa ma lona valea; ‘ina ne‘i poto o ia i lona lava manatu.

⁶ E pei o le vavae ‘ese o le vae ma inu i le mea e tigā ai, le tagata ‘ua ia tu‘u le fe‘au i le tagata valea.

⁷ E fetoso vae o le pipili; e fa‘apea fo‘i le fa‘ata‘oto i le gutu o le vale.

⁸ E pei o le taga o ma‘a tāua i le faupu‘egama‘a, e fa‘apea le avatu o le vi‘iga i le vale.

⁹ O le la‘au talatala ‘ua ‘ava‘e i le lima o lē ‘ua ‘onā, o le fa‘ata‘oto lava lea i le gutu o le vale.

¹⁰ O se ali‘i tāua, na te fa‘atigāina tagata uma lava; e fa‘apea le tagata na te fa‘a‘oloa le vale, na te fa‘a‘oloa fo‘i i ē solitulafono.

¹¹ E pei o le ta‘ifau ‘ua fo‘i i lona pua‘iga, e fa‘apea fo‘i le vale, ‘ua toe fo‘i atu i lona valea.

¹² ‘Ua e iloa ‘ea se tagata ‘ua poto i lona lava manatu? E fai le fa‘amoemoe o tagata i le vale, ‘ae lē ‘iā te ia.

¹³ ‘Ua fai ane le paiē, “O lo‘o i le ala le leona; ‘ua i malae le leona.”

¹⁴ E fealualua‘i le puipui i ona fa‘amau, e fa‘apea le paiē ‘ona feliuliua‘i i lona moega.

¹⁵ ‘Ua fa‘alilo e le paiē lona lima i le tanoa; e musu o ia e fa‘afo‘i mai ai i lona lava gutu.

¹⁶ E manatu le paiē ‘ua sili lona poto i tagata e to‘afitu, o ē ‘ua tali mai ma le mafaufau.

¹⁷ O lē na tago i taliga o le ta‘ifau, o le tagata lea ‘ua alu ane ma oso vale i le misa ‘ese.

¹⁸ E pei o le vale ‘ua fanafana i ū, ma tao, ma le oti.

¹⁹ E fa‘apea fo‘i le tagata na te ‘ole‘ole i lē la te tuā‘oi, ‘ona fa‘apea mai lea o ia, “E lē o la‘u mea ula ‘ea?”

²⁰ A leai se fafie, e mate le afi; a leai fo‘i se faitatala, e leai fo‘i se misa.

²¹ O le malala i le malala ola, ma le fafie i le afi, e fa‘apea le tagata fa‘amisa e tupu ai le misa.

²² O ‘upu a le tagata faitatala, e tusa ia ma mea suamalie, ‘ua o‘o ifo i totonu lava o le manava.

²³ O laugutu ‘ua tautala atu i ‘upu alofa, ‘ae leaga le loto. e pei o le siliva ‘ua ufitia ai le ipu ‘ele.

²⁴ O lē ‘ua ‘ino‘ino, ‘ua fa‘atagā tautala lelei o ia i ona laugutu; a ‘ua tu‘u le pepelo i lona loto;

²⁵ e ui lava ‘ona fa‘amalie mai lona leo, ‘aua ‘e te fa‘atuatua ‘iā te ia; auā e fitu ni mea e ‘inosia ‘ua i lona loto.

²⁶ E ufiufi e ia lona ‘ino‘ino i le pepelo; ‘ae fa‘aalia lona leaga i le fa‘apotopotoga.

²⁷ O lē na te ‘elia se lua, e pa‘ū o ia i ai; ma lē ‘ua fuli le ma‘a, e toe ta‘avale mai lea ‘iā te ia.

²⁸ O le laulaufaiva pepelo, ‘ua ‘ino‘ino ia i ē ‘ua momomo ai; ma le gutu molemole e tupu ai le malaia.