Fa‘ata‘oto 25 - O LE TUSI PA'IA - Ekalesia Katoliko Roma

O ‘Upu i Tupu; o Misa ma Mea e Tupu Ai

¹ O fa‘ata‘oto fo‘i nei a Solomona, na tusia mai e tagata o Esekia le tupu o Iuta.

² O le mamalu o le Atua ‘ia natia ai mea; a o le mamalu o tupu ‘ia su‘esu‘e ai mea.

³ O le lagi e maualuga lea ma le lalolagi e maulalo lea; o loto fo‘i o tupu e le ma su‘esu‘eina.

⁴ ‘Ia fa‘ate‘a le otaota i le ario, ‘ona maua ai lea o se ipu mo le tufuga fai mea u‘amea;

⁵ ‘ia fa‘ate‘a lē ‘ua amio leaga i luma o le tupu, ‘ona fa‘atumauina ai lea o lona nofoāli‘i i le amiotonu.

⁶ ‘Aua ‘e te fa‘alialia i luma o le tupu; ‘aua fo‘i ‘e te tu i le mea e i ai ali‘i sili.

⁷ Auā e lelei ‘ona ia fai atu ‘iā te oe, “Sau ia i luga nei;” ‘ae leaga ‘ona fa‘amaulaloina oe i luma o le ali‘i ‘ua e va‘ai i ai.

⁸ ‘Aua ne‘i e alu fa‘ata‘alise e fai le finauga; ‘ina ne‘i femēmēa‘i oe, pe a o‘o i lona i‘uga, ‘ina ‘ua fa‘amāina oe e lē lua te tuā‘oi.

⁹ ‘Ia fai la ‘oulua finauga ma lē lua te tuā‘oi; ‘ae ‘aua le fa‘aali atu le ‘upu fa‘alilo a le tasi tagata;

¹⁰ ne‘i fa‘alumaina oe e lē ‘ua fa‘alogo i ai; ‘ona lē te‘a lea ‘iā te oe ‘ona ta‘uleagaina.

¹¹ O le ‘upu ‘ua fai fa‘atatauina, o molī auro ia i ‘ato ario togitogi fa‘amamanuina.

¹² O le tagata ‘ua a‘oa‘i ma le poto i taliga ‘ua fa‘alogo mai, o le mama auro lea, ma le asoa auro lelei.

¹³ E pei o le malūlū o le kiona i ona po o le seleselegāsaito; e fa‘apea le ‘avefe‘au fa‘amaoni i ē ‘auina o ia; na te fa‘afoisia mai agaga o ona ali‘i.

¹⁴ O le tagata ‘ua tautala tele i ana mea e foa‘i, ‘ae pepelo, o ao ma matagi ia, ‘ae leai se timuga.

¹⁵ O le fa‘ato‘ato‘a e fa‘aoleoleina ai le ta‘ita‘i; ma le laulaufaiva filemū e gau ai le ivi.

¹⁶ ‘Ua e maua ‘ea le meli? ‘ia e ‘ai fa‘atatau i ai; ne‘i e mā‘ona tele ai, ‘ona e pua‘i ai lea.

¹⁷ ‘Ia seāseā ‘ona e alu atu i le fale o lē lua te tuā‘oi; ne‘i musu o ia ‘iā te oe ma ‘ino‘ino ‘iā te oe.

¹⁸ O le tagata ‘ua molimau pepelo i lē la te tuā‘oi, o le uatogi lea ma le pelu ma le ū fanafana e ma‘ama‘ai.

¹⁹ O le nifo ‘ua gau ma le vae ‘ua mapeva, o le fa‘atuatua lea i le tagata pepelo i le aso vale.

²⁰ O lē ‘ua ‘ave ‘ese le ‘ofu i le aso malūlū, i le ma le vineka i luga o le neteri, e fa‘apea i lē ‘ua lagi ni siva i le loto ‘ua fa‘anoanoa.

²¹ ‘Āfai e fia ‘ai lē ‘ua ita ‘iā te oe, ‘ia e fafaga ‘iā te ia; ‘āfai e fia inu o ia, ‘ia e fa‘ainu ‘iā te ia i le vai;

²² auā ‘e te ‘ava‘e ai malala ola i luga o lona ulu; e tauia fo‘i oe e le ALI‘I.

²³ O le matagi mai le itū i matū e tupu ai timuga; ma le laulaufaiva fa‘atuaupua e tupu ai mata ita.

²⁴ E lelei ‘ona nofo i le tumutumu i luga o le fale; ‘ae leaga ‘ona nofo ma le fafine fa‘amisa i le fale tele.

²⁵ O le vai malūlū i le tagata ‘ua lailoa i le fia inu, o le tala lelei lea mai le nu‘u mamao.

²⁶ O le vaipuna ‘ua fa‘agāepu ma le vaipuna ‘ua fa‘aleagaina, o le tagata amiotonu lea ‘ua pa‘ū i luma o lē ‘ua amio leaga.

²⁷ O le ‘ai tele i meli, e lē lelei lea; o le su‘esu‘ega fo‘i o lo latou mamalu, o le mea e mafatia ai lea.

²⁸ O le tagata ‘ua lē mafai ona ia pulea lona loto, ‘ua pei o le ‘a‘ai ‘ua fa‘atafunaina, ‘ua leai ni ona ‘aupā.