Fa‘ata‘oto 2 - O LE TUSI PA'IA - Ekalesia Katoliko Roma

O le Aogā o le Poto

¹ Lo‘u atali‘i e, ‘āfai ‘e te talia a‘u ‘upu ma e teu i lou loto a‘u poloa‘iga,

² e ua‘i atu ai ou taliga i le poto, e fa‘asaga atu ai lou loto i le fa‘autauta.

³ ‘Āfai lava ‘e te vala‘au atu i le atamai ma e leo tele atu i le fa‘autauta;

⁴ ‘āfai ‘e te sā‘ili‘ili ‘iā te ia, e pei ‘ona sā‘ili‘ili i le ario; ‘āfai ‘e te su‘esu‘e i ai, pei ‘ona su‘esu‘e i le ‘oloa lilo;

⁵ ‘ona e lagona ai lea o le mata‘u i le ALI‘I ma e maua ai le poto i le Atua.

⁶ Auā o le ALI‘I na te foa‘i mai le poto mai lona fofoga le poto ma le fa‘autauta;

⁷ na te teua le poto mo e amio sa‘o; o le talitā o ia i ē ‘ua tonu lo latou savali,

⁸ ‘ina ‘ia leoleo i ala o le amiotonu; e tausi fo‘i e ia le ala o ona tagata amio Atua.

⁹ ‘Ona e lagona ai lea o le amiotonu ma le fa‘amasinoga ma le amio sa‘o, o ala lelei uma lava.

¹⁰ A o‘o le poto i lou loto ma ‘ua mālie ‘iā te oe le atamai;

¹¹ e fa‘afeao le mafaufau ‘iā te oe; e leoleo ‘iā te oe le fa‘autauta;

¹² ‘ina ‘ia lavea‘i ‘iā te oe a‘i le ala leaga; a‘i le tagata ‘ua tautala i mea fa‘api‘opi‘o.

¹³ O ē tu‘ua ala tonu, ‘ae ui atu i ala pogisā;

¹⁴ o ē fiafia e fai mea leaga; ‘ua latou ‘oli‘oli i le fa‘api‘opi‘o e leaga;

¹⁵ o ē fa‘api‘opi‘o i o latou ala ma vaogatatā ‘iā latou amio.

¹⁶ E lavea‘i ‘iā te oe a‘i le fafine ‘ese, o le fafine ‘ese na te fa‘a‘ole‘ole i ana ‘upu.

¹⁷ O lē na te tu‘ua lē na tausi ‘iā te ia a o teine muli; ‘ua galo fo‘i ‘iā te ia le feagaiga a lona Atua.

¹⁸ Auā e taunu‘u atu lona fale i le oti ma ona ala i agaga o ē ‘ua oti;

¹⁹ o i latou uma o ē ō atu ‘iā te ia, e lē fo‘i mai i latou; latou te lē maua ala o le ola.

²⁰ ‘Ina ‘ia e savali i le ala o ē lelei ma e tausiusi i ala o ē amiotonu.

²¹ Auā o ē amio sa‘o, latou te mau i le nu‘u; ma ē ‘ua sao a latou amio, e fa‘atotoeina ai i latou;

²² ‘ae vavae‘eseina o ē amio leaga ai le lau‘ele‘ele, e lia‘iina ai fo‘i o ē amio pepelo.