Fa‘ata‘oto 19 - O LE TUSI PA'IA - Ekalesia Katoliko Roma

¹ E sili ‘ona lelei o le tagata mativa ‘ua savali i lana amiotonu, i lē ‘ua laugutu fa‘api‘opi‘o, o ia fo‘i o le vale.

² E lē se mea lelei fo‘i ‘ina ‘ia aunoa le tagata ma le poto; o lē ‘ua fa‘ata‘alise fo‘i i ona vae e sesē o ia.

³ O le valea o le tagata e fa‘api‘opi‘o ai lona ala; ‘ua ita fo‘i lona loto i le ALI‘I.

⁴ O le ‘oloa e fa‘aopoopo mai ai uō e to‘atele; a o lē ‘ua mativa, e te‘a ‘ese o ia ma lana uō.

⁵ E lē fa‘asaoina le molimau pepelo; ma lē ‘ua tala pepelo, e lē sao lava ia.

⁶ E to‘atele latou te ole atu i luma o le ali‘i; e uō tagata uma lava ma le tagata foa‘i mea.

⁷ O uso uma o le tagata mativa, latou te ‘ino‘ino ‘iā te ia; a o ana uō, latou te fa‘amamao ma ia; na te tuliloa ‘iā te‘i latou i ‘upu, ‘ae lē maua i latou.

⁸ O lē ‘ua maua le poto, ‘ua alofa o ia ‘iā te ia lava; o lē ‘ua tausi le fa‘autauta, e maua e ia le mea lelei.

⁹ E lē fa‘asaoina le molimau pepelo; ma lē ‘ua tala pepelo, e fano lava o ia.

¹⁰ O mea fa‘afiafia, e le ono ia i le vale; e matuā le ono fo‘i i le ‘au‘auna ‘ona pule i ali‘i.

¹¹ O le mafaufau o le tagata e fa‘agesegese ai lona ita; o lona vi‘iga fo‘i lea, ‘ina ‘ua lē manatua lona agaleagaina.

¹² O le to‘asā o le tupu, e tusa lea ma le tagi o le leona ta‘anoa; a o lona alofa, e tusa lea ma le sau i le mutia.

¹³ O le atali‘i valea, o le malaia lea o lona tamā; o fa‘amisa fo‘i o le avā, o le tutulu so‘o lea.

¹⁴ O le fale ma ‘oloa, o le tofiga lea a mātua; a o le avā mafaufau, mai le ALI‘I lava ia.

¹⁵ O le paiē e tupu ai le moe gase; ma le tagata fa‘avaivai, e fia ‘ai lava ia.

¹⁶ O lē ‘ua tausia le poloa‘iga, ‘ua tausia e ia lona lava ola; a o lē ‘ua fa‘atalalē ona ala, e oti lava ia.

¹⁷ O lē ‘ua alofa i le tagata mativa, na te avatua ana mea i le ALI‘I; e tauia mai fo‘i e ia ana mea na avatu ‘iā te ia.

¹⁸ A‘oa‘i atu i lou atali‘i, manū o fai sou fa‘amoemoe; ‘ae ‘aua le naunau lou loto ‘ia oti ai o ia.

¹⁹ O le tagata ita tele e fa‘asalaina o ia; auā ‘āfai ‘e te lavea‘i ‘iā te ia, ‘e te toe fa‘apea fo‘i.

²⁰ ‘Ia e fa‘alogo i le fa‘atonu mai, ma e talia le a‘oa‘o atu; ‘ina ‘ia e poto ai pe a o‘o i ou tausaga amulī.

²¹ E tele mafaufau o lo‘o i le loto o le tagata; a o le pule a le ALI‘I, e tumau lava lea.

²² O le mea e mana‘omia i le tagata o lona alofa lea; e sili ‘ona lelei o le tagata mativa i le tagata pepelo.

²³ O le mata‘u i le ALI‘I e i‘u lea i le ola; o lē ‘ua i ai, e mā‘ona pea o ia; e le a‘afia o ia e le mala.

²⁴ ‘Ua fa‘alilo e le paiē lona lima i le tanoa; ‘ae lē fa‘afo‘i mai ai lava i lona gutu.

²⁵ ‘Ia e sasa i lē ‘ua tauemu, ‘ona tupu ai lea o le fa‘autauta o lē ‘ua faigofie; ma ‘ia e a‘oa‘i atu i lē ‘ua mafaufau, ‘ona iloa ai lea e ia o le poto.

²⁶ O lē ‘ua fa‘amaumau mea a lona tamā ma tuli ‘ese i lona tinā, o le atali‘i lea e tupu ai le mā ma le māsiasi.

²⁷ Lo‘u atali‘i e, sōia ‘e te fa‘alogo i le a‘oa‘o atu e fa‘asesē ai i ‘upu e poto ai.

²⁸ O le molimau ulavale, e tauemu o ia i le fa‘amasinoga; o gutu fo‘i o ē amio leaga e fologia ai le agasala.

²⁹ ‘Ua saunia fa‘amasinoga mo ē tauemu; o ta fo‘i mo tua o ē vālelea.