Fa‘ata‘oto 18 - O LE TUSI PA'IA - Ekalesia Katoliko Roma

¹ O lē ‘ua vavae ‘ese, ‘ua sā‘ili o ia i lona mana‘o; e finau o ia i le poto uma lava.

² E lē mana‘o le vale i le fa‘autauta; ‘ua na ‘ona ia fa‘aali o lona loto.

³ A sau le tagata agasala, ‘ua sau fa‘atasi ai fo‘i le ‘ino‘ino; e sau fo‘i le luma fa‘atasi ma le amio matagā.

⁴ O ‘upu a le gutu o le tagata, o vai loloto ia; o le puna o le poto, o le alia ola lava lea.

⁵ E lē lelei ‘ona ‘au ma le tagata agasala, ‘ina ‘ia faia‘ina i le fa‘amasinoga lē ‘ua amiotonu.

⁶ E ō atu laugutu o le vale i le misa; ‘ua vala‘au fo‘i lona gutu i ta.

⁷ O le gutu o le vale e fano ai o ia; o ona laugutu fo‘i, o le mailei lea o lona ola.

⁸ O ‘upu a lē fa‘atuaupua, e tusa ia ma mea suamalie; ‘ua o‘o ifo i totonu lava o le manava.

⁹ O lē ‘ua paiē fo‘i i lana galuega, la te uso ma lē na te fa‘amaumau mea.

¹⁰ O le suafa o le ALI‘I, o le ‘olo malosi lea; e sola atu i ai lē amiotonu, ‘ona sao ai lea o ia.

¹¹ O le ‘oloa o le mau‘oa, o lona ‘olo malosi lea; e pei o le pā maualuga fo‘i i lona lava manatu.

¹² E muamua ‘ona fa‘amaualuga o le loto o le tagata i le malaia o ia; ‘ae muamua le fa‘amaulalo i le mamalu.

¹³ O lē na te tali atu i le ‘upu, a o le‘i fa‘alogo i ai, e fai lea mōna valea ma mea e fa‘amāina ai o ia.

¹⁴ O le loto o le tagata, na te fa‘ato‘ato‘a ai lona ma‘i; a o le loto fa‘anoanoa, o ai sē na te lavā ‘onosa‘i?

¹⁵ O le loto o lē ‘ua mafaufau na te maua le poto; o taliga fo‘i o lē ‘ua poto, e sā‘ili ia i le poto.

¹⁶ O le mea alofa a le tagata e fa‘alauteleina ai se ala mōna; e ta‘ita‘iina ai fo‘i o ia i luma o ali‘i.

¹⁷ E tonu lē ‘ua muamua i lana finauga, ‘ae sau le tasi tagata, ‘ona su‘esu‘e ai lea o ia ‘iā te ia.

¹⁸ O le vili e i‘u ai misa; e māvae ai fo‘i ē fitafita.

¹⁹ O le tagata ‘ua agaleagaina e lona uso, e sili o ia ‘ona faigatā i le ‘olo; o misa fo‘i o uso e tusa ia ma fa‘amaufa‘alava o le ‘olo.

²⁰ O le fua o le gutu o le tagata e mā‘ona ai lona manava; e mā‘ona o ia i mea e tupu mai i ona laugutu.

²¹ O le oti ma le ola, o lo‘o i le pule a le laulaufaiva ia; o ē manana‘o i ai latou te ‘a‘ai i lona fua.

²² O lē ‘ua maua le avā, ‘ua maua e ia le mea lelei; ‘ua maua fo‘i e ia le alofa mai le ALI‘I.

²³ E tautala mai ma le ‘ai‘oi lē ‘ua mativa, a o le mau‘oa e tali atu o ia ma le fa‘asiasia.

²⁴ O le tagata ‘ua fai ana uō, e i‘u ‘ina tigāina ai o ia, a o i ai le tagata alofa e sili ona pipi‘i mai i lo le uso.