Fa‘ata‘oto 17 - O LE TUSI PA'IA - Ekalesia Katoliko Roma

¹ E lelei si fāsi mea e ‘ai ‘ua magumagu, a o i ai le filemū; ‘ae leaga le fale ‘ua tumu i manu ‘ua fasia, a o i ai le misa.

² E pule le ‘au‘auna poto i le atali‘i na te fa‘atupu le mā; e fai lona vaega o le tofi fa‘atasi ma le ‘au uso.

³ E fai le ipu e tunu ai le ario ma le ‘ogāumu e tunu ai le auro; a o le ALI‘I, na te tofotofoina loto.

⁴ O lē fai mea leaga, ‘ua ua‘i atu ona taliga i laugutu leaga; o le tala pepelo e fa‘alogo o ia i le laulaufaiva ‘upu pa‘a‘ā.

⁵ O lē ‘ua tauemu i le tagata mativa, e fāifaia e ia Lē na faia o ia; o lē ‘ua fiafia i le mala, e lē fa‘asaoina o ia.

⁶ O le pale o toeaina, o fānau a latou fānau ia; o le fa‘amatagofie o le fānau, o latou tamā ia.

⁷ E le ono i laugutu o le vale ‘ona tautala i mea e sili ‘ona lelei; ‘ae matuā le ono i laugutu pepelo i le ALI‘I.

⁸ O le mea alofa, o le ma‘a matagofie lea i lē ‘ua i ai; o mea uma e fa‘asaga i ai, e manuia ai.

⁹ O lē ‘ua ufiufi le soliga o le tulafono, na te sā‘ilia le alofa; a o lē ‘ua finauvale, na te fa‘ate‘a‘eseina uō.

¹⁰ E sili ‘ona ogoogo o le a‘oa‘iga i le tagata mafaufau, i ta e selau i le vale.

¹¹ ‘Ua na o le leaga e sā‘ilia e lē ‘ua fouvale; ‘ae ‘auina atu ‘iā te ia le ‘au‘auna sauā.

¹² ‘Ia fetaia‘i ma le tagata se urosa ‘ua ‘avea lana toloa‘i; ‘ae ‘aua le fetaia‘i ma le vale i lona valea.

¹³ O lē na te taui atu le lelei i le leaga, e le te‘a le leaga i lona ‘āiga.

¹⁴ O le amataga o le finauga, o le tu‘uina atu lea o le vai; o le mea lea ‘inā tu‘u ai ia le misa, manū ‘ua lē tupu tele.

¹⁵ O lē na te ta‘uamiotonu atu i lē ‘ua amio leaga, ma lē ‘ua fa‘asala i lē ‘ua amiotonu, e fa‘atau ‘inosia i lā‘ua e le ALI‘I.

¹⁶ E i ai i se a le taui i le lima o le vale e maua ai e ia le poto, a ‘ua leai sona loto i ai?

¹⁷ E alofa le uō i aso uma lava; ‘ae fānau le uso mo le aso vale.

¹⁸ O le tagata ‘ua leai sona mafaufau, ‘ua fetāgofi o lā‘ua lima ma le tasi; ‘ua fai o ia ma moni i luma o lana uō.

¹⁹ O lē ‘ua mana‘o i le soliga o le tulafono, ‘ua mana‘o lea i le misa; o lē ‘ua fa‘amaualugaina lona faitoto‘a, ‘ua sā‘ili o ia le malaia.

²⁰ O lē ‘ua i ai le loto fa‘api‘opi‘o, e lē maua e ia se lelei; ma lē ‘ua fa‘a‘ole‘ole lona laulaufaiva, e pa‘ū ia i le leaga.

²¹ O lē na te fānaua le vale, e fai lea mōna fa‘anoanoaga; e leai fo‘i sē fiafia i le tamā o le ulavale.

²² O le loto fiafia, e fai ma vaila‘au aogā lea; a o le loto fa‘anoanoa e mamago ai ivi.

²³ E talia e le tagata amio leaga le mea alofa nai le fatafata, ‘ina ‘ia fa‘aliliu ‘ese e ia ala o le fa‘amasinoga.

²⁴ O lo‘o i ai i le tagata mafaufau le poto; a o mata o le vale, ‘ua i le tulu‘iga o le lalolagi ia.

²⁵ O le atali‘i valea o le fa‘atigā loto lea i lona tamā o le fa‘a‘ono‘ono fo‘i i lē na fānau mai o ia.

²⁶ E lē lelei ‘ona fa‘asala i lē ‘ua amiotonu; e lē lelei fo‘i ‘ona fasi i ali‘i ‘ona o le amio sa‘o.

²⁷ O lē ‘ua i ai le poto, e tāofia e ia ana ‘upu; o lē ‘ua agamalū fo‘i, o le tagata fa‘autauta lea.

²⁸ O le vale lava, a fa‘alologo o ia, fa tagata, o ia ‘ua poto; o lē ‘ua pupuni ona laugutu, fa tagata, o le tagata mafaufau ia.