Fa‘ata‘oto 16 - O LE TUSI PA'IA - Ekalesia Katoliko Roma

¹ O lo‘o i le tagata sauniga o le loto; a o lo‘o mai le ALI‘I le tali a le laulaufaiva.

² O ala uma o le tagata, e lelei ia i lona lava manatu; a o le ALI‘I, na te fuatia loto.

³ ‘Ia e tu‘uina atu i le ALI‘I o au galuega; ‘ona fa‘amauina ai lea o ou mānatunatuga.

⁴ ‘Ua faia mea uma e le ALI‘I, e i‘u ai lona lava finagalo; o lē ‘ua amio leaga fo‘i mo le aso vale.

⁵ E ‘inosia e le ALI‘I ‘atoa uma ē ‘ua loto fa‘amaualuga; e tago lea lima i lea lima, ‘ae lē fa‘asaoina i latou.

⁶ ‘Ua togiolaina le amioletonu i le alofa ma le fa‘amaoni; o le mata‘u fo‘i i le ALI‘I, ‘ua ‘alo ‘ese ai tagata i le leaga.

⁷ A fiafia le ALI‘I i ala o le tagata, ‘ona fa‘atupuina lea e ia o le leleiga ma ia o ē ita ‘iā te ia.

⁸ E sili ‘ona lelei o se mea itiiti, a o i ai le amiotonu, i mea e tele pe a le o i ai le tonu.

⁹ E filifili i le loto o le tagata lona ala; a o le ALI‘I na te fa‘atonuina le mea e ui ai o ia.

¹⁰ ‘Ua se ‘upu a lē ‘i‘ite poto le ‘upu ‘ua i laugutu o le tupu; e lē tautala fa‘api‘opi‘o lona fofoga i le fa‘amasinoga.

¹¹ O le fua ma le fua fa‘atautau ‘ua tonu, o a le ALI‘I ia; o lana lava galuega o ma‘a uma e fua a‘i o i le taga.

¹² O le mea e ‘ino‘ino i ai tupu, e fai amio leaga; auā e fa‘atumauina le nofoāli‘i i le amiotonu.

¹³ O le mea e fiafia ai tupu, o laugutu e tautala i ‘upu tonu; ma lē ‘ua tautala i ‘upu sa‘o, e alofagia lea e i latou.

¹⁴ O le to‘asā o le tupu, o le sāvali o le oti lea; a o le tagata poto na te fa‘alaulelei i ai.

¹⁵ O lo‘o i ai le ola i le malamalama o fofoga o le tupu; o lona alofa mai, e tusa lea ma le ao o le uaga mulimuli.

¹⁶ ‘Ia maua le poto, e sili ‘ona lelei lea i le auro; ‘ia maua fo‘i le atamai, ‘ia sili ‘ona mana‘omia lea i le ario.

¹⁷ O le ala tele o ē amio sa‘o, o le ‘alo ‘ese lea i le leaga; o lē na te leoleo lona ala, na te fa‘asaoina lona ola.

¹⁸ E muamua le fa‘amaualuga i le malaia; e muamua fo‘i le loto fa‘asiasia i le pa‘ū.

¹⁹ E lelei ‘ona maulalo o le loto fa‘atasi ma ē ‘ua agamalū; ‘ae leaga ‘ona tufa le vete fa‘atasi ma ē fa‘amaualuga.

²⁰ O lē ‘ua fa‘autauta i se mea, e maua e ia le mea lelei; o lē fa‘atuatua fo‘i i le ALI‘I, ‘amu‘ia o ia.

²¹ O lē ‘ua poto le loto, e ta‘ua ia o lē mafaufau; o le suamalie fo‘i o laugutu e tupu ai pea lona poto.

²² O le puna o le ola le poto i lē ‘ua i ai; a o le a‘oa‘o atu o ē vālelea, o le valea lava lea.

²³ O le loto o lē ‘ua poto, e poto ai lona gutu; e fa‘aopoopoina ai fo‘i le poto i ona laugutu.

²⁴ O ‘upu matagofie, o le meli ‘ua sisina ifo ia; e suamalie i le loto ma le mea e mālōlō ai ivi.

²⁵ O i ai le ala ‘ua tonu i le manatu o le tagata; a o lona taunu‘uga, o ala ia e oti ai.

²⁶ O le tagata e galue, ‘ua galue o ia mo ia lava; auā ‘ua fa‘atauānauina o ia e lona gutu.

²⁷ O le tagata ulavale, na te matuā saunia le leaga; o lo‘o i ona laugutu o ‘upu e peiseaī o le afi mumū.

²⁸ O le tagata fa‘api‘opi‘o, e fa‘atupuina e ia le misa; ma lē fa‘atuaupua, na te fa‘ate‘a‘eseina uō.

²⁹ O le tagata fa‘asauā, na te fa‘a‘ole‘ole i lē la te tuā‘oi; na te ta‘ita‘iina fo‘i o ia i le ala e lē lelei.

³⁰ O lo‘o moe ona mata e mānatunatu ai i mea fa‘api‘opi‘o; o lo‘o memu ona laugutu e fa‘ataunu‘u ai le leaga.

³¹ O le pale matagofie le ulu sinā, pe a ‘ua i ai i le ala o le amiotonu.

³² E sili ‘ona lelei o lē ‘ua gesegese i le ita i lē ‘ua malosi; e sili fo‘i lē ‘ua pule i lona loto i lē na te ā‘ea le ‘a‘ai.

³³ E faia le vili i le fatafata o le ‘ofu; ‘ae mai le ALI‘I lona fa‘atonuga uma lava.