Fa‘ata‘oto 12 - O LE TUSI PA'IA - Ekalesia Katoliko Roma

¹ O lē ‘ua fiafia ‘inā a‘oa‘oina, ‘ua fiafia o ia i le poto; a o lē ‘ino‘ino i le a‘oa‘iga, o le vale lea.

² O le tagata amio lelei, e maua e ia le alofa mai le ALI‘I; a o le tagata ‘ua fai togafiti leaga, e fa‘asalaina lea.

³ E le fa‘atumauina le tagata i le amio leaga; a o le pogai o ē amiotonu, e le fa‘agae‘etia lea.

⁴ O le avā amio lelei, o le pale lea i lana tane; a o lē fa‘amā, e tusa o ia ma le mea e pala ai ona ivi.

⁵ O mafaufauga a ē amiotonu, ‘ua tonu ia; o pulega a ē amio leaga, ‘ua pepelo ia.

⁶ O ‘upu a ē amio leaga e lamalama i le toto; a o gutu o ē ‘ua sa‘o a latou amio, e lavea‘iina ai i latou.

⁷ ‘Ua fa‘aumatia ē amio leaga, ‘ua leai lava i latou; a o le fale o ē amiotonu, e tumau lava lea.

⁸ E vi‘ia le tagata, e tusa ma lona poto; a o lē ‘ua loto fa‘api‘opi‘o, e ‘inosia lava o ia.

⁹ E lelei lē ‘ua ta‘ufa‘atauva‘aina, ‘ae fai lona tautua; ‘ae leaga lē na te vivi‘i o ia ‘iā te ia, ‘ae fia ‘ai.

¹⁰ ‘Ua fa‘apelepele le tagata amiotonu i lana manu; a o le alofa o ē amio leaga, o le sauāga lea.

¹¹ O lē galue i lona fanua, e mā‘ona o ia i mea e ‘ai; a o lē mulimuli i tagata fa‘atauva‘a, ‘ua leai sona mafaufau.

¹² E mana‘o lē amio leaga i mea ‘ua maua e tagata amio leaga; a o le pogai o ē amiotonu, e fua mai lea.

¹³ ‘Ua i ai le mailei leaga; i le solitulafono o laugutu; ‘ae sao lē amiotonu a‘i le puapuagā.

¹⁴ E mā‘ona le tagata i mea lelei a‘i le fua o lona gutu; e taui atu fo‘i i le tagata o mea na faia e ona lima.

¹⁵ O le ala o le vale, ‘ua tonu lea i lona manatu; a o lē ‘ua fa‘alogo i le pule, e poto ia.

¹⁶ E vave iloa le ita o le vale; a o le tagata mafaufau, ‘ua ufiufi e ia lona mā.

¹⁷ O lē tautala fa‘amaoni, ‘ua fa‘aali mai e ia le tonu; a o lē molimau pepelo, ‘ua fa‘aali mai e ia le fa‘a‘ole‘ole.

¹⁸ O i ai le so‘ona tautala, e pei o tutu‘i i le pelu; a o laulaufaiva o ē popoto e mālōlō ai.

¹⁹ O laugutu fa‘amaoni, e fa‘atumauina ia e fa‘avavau; a o le laulaufaiva pepelo, ‘ua se ‘emo o le mata lea.

²⁰ O lē fa‘a‘ole‘ole, ‘ua i ai lea i loto o ē fai togafiti leaga; a o ē pule ‘ia filemū, e i ai le ‘oli‘oli.

²¹ E lē o‘o se mea leaga e tasi i lē amiotonu; a o ē amio leaga, e tūtūmu i latou i le leaga.

²² E ‘inosia e le ALI‘I o laugutu pepelo; a o ē fai mea fa‘amaoni, e fiafia i ai o ia.

²³ O le tagata mafaufau, na te ufiufi lona poto; a o loto o ē vālelea e fa‘alaua‘itele lo latou valea.

²⁴ E manumālō lima o ē filigā i galuega; a o lē paiē, e fai taulaga o ia.

²⁵ O le atuatuvale i le loto o le tagata ‘ua fa‘avaivai ai o ia; a o le ‘upu lelei e fa‘a‘oli‘oliina ai.

²⁶ O le tagata amiotonu, na te fa‘aali le ala i lana uō; a o le ala o ē amio leaga, e fa‘asesēina ai i latou.

²⁷ E lē tunua e le paiē lana manu sa tuli; a o le ‘oloa tāua a tagata, e i ai lea i lē ‘ua filigā i galuega.

²⁸ O le ala o le amiotonu, o i ai le ola; e leai fo‘i se oti i ona magāala.