Fa‘ata‘oto 11 - O LE TUSI PA'IA - Ekalesia Katoliko Roma

¹ O fua fa‘atautau faimamago e ‘inosia ia e le ALI‘I; a o le ma‘a e fua a‘i e ‘ato‘atoa, o lona lea fiafia.

² A sau le fa‘amaualuga, ‘ona sau ai lea o le mā; a o i ai le poto i ē fa‘amaulalo.

³ O le amio sa‘o a ē ‘ua amiotonu e ta‘ita‘iina ai i latou; a o le fa‘api‘opi‘o o ē amioletonu e fano ai i latou.

⁴ E lē aogā le ‘oloa i le aso o le to‘asā; a o le amiotonu, e lavea‘i lea nai le oti.

⁵ O le amiotonu a lē ‘ua sa‘o e fa‘alauleleiina ai lona ala; a o lana amio leaga, e pa‘ū ai lē ‘ua amio leaga.

⁶ O le amiotonu a ē amio sa‘o e lavea‘iina ai i latou; a o ē fa‘api‘opi‘o, e maua i latou ‘iā latou amio pa‘a‘ā.

⁷ A oti le tagata amio leaga, ‘ua fano lona fa‘atuatuaga; e fano fo‘i le fa‘amoemoe o le tagata amioletonu.

⁸ E lavea‘iina lē amiotonu a‘i le puapuagā; ‘ae sau lē amio leaga e sui a‘i o ia.

⁹ O le gutu o lē fa‘alēmata‘u e fano ai lē la te tuā‘oi; a o lē poto e lavea‘iina a‘i ē amiotonu.

¹⁰ ‘Ua ‘oli‘oli le ‘a‘ai pe a manuia ē amiotonu; e ofo fiafia fo‘i pe a fano ē amio leaga.

¹¹ O le fa‘amanuia o ē amio sa‘o e fa‘amamaluina ai le ‘a‘ai; a o gutu o ē amio leaga, e lepetia ai.

¹² O lē ‘ua leai sona mafaufau na te ‘ino‘ino i lē la te tuā‘oi; a ‘ua fa‘alologo le tagata mafaufau.

¹³ O lē fealua‘i ma fe‘ave‘avea‘i, na te fa‘aali ‘upu fa‘alilo; a o lē ‘ua loto fa‘amaoni na te tanutanuma‘i le ‘upu.

¹⁴ A leai sē pule, ‘ua malaia le nu‘u; a o le to‘atele o faipule, e saogalemū ai.

¹⁵ E matuā tigāina lē ‘ua fai ma moni o le tagata ‘ese; a o lē ‘ua ‘ino‘ino i ē fetāgofi i lima mo isi, e filemū lava o ia.

¹⁶ E maua le mamalu e le fafine matagofie; a o tane malolosi e maua le ‘oloa.

¹⁷ O le tagata alofa ‘ua agalelei o ia ‘iā te ia lava; a o lē ‘ua sauā, na te fa‘atigāina lona lava tino.

¹⁸ O lē amio leaga ‘ua fai e ia le galuega pepelo; a o lē totō le amiotonu e ‘iā te ia le taui fa‘amaoni.

¹⁹ E pei ‘ona i‘u o le amiotonu i le ola, e fa‘apea fo‘i lē ‘ua tausisi i le leaga, e i‘u lea i lona lava oti.

²⁰ ‘Ua ‘inosia e le ALI‘I ē ‘ua fa‘api‘opi‘o o latou loto; a o ē ‘ua sa‘o a latou amio, e fiafia i ai o ia.

²¹ E tago lea lima i lea lima, e lē fa‘asaoina lē ‘ua amio leaga; a o le fānau a ē amiotonu, e sao i latou.

²² O le mama auro i le isu o le pua‘a, o le fafine lālelei lea ‘ua te‘a ma le mafaufau.

²³ O lē mana‘o o ē amiotonu, ‘ua na ‘ona lelei lea; a o le fa‘atuatuaga o ē amio leaga, e i‘u lea i le to‘asā.

²⁴ O i ai lē na te fa‘asalalauina ana mea, ‘ae atili ai ‘ona mau mea; o i ai fo‘i lē ‘ua tāofi ana mea, e sili i le mea ‘ua tatau ai, ‘ae mativa ai o ia.

²⁵ E fa‘atamao‘āigaina le tagata matamau; o ia fo‘i lē fa‘asūsū i nisi, e fa‘asūsūina lava o ia.

²⁶ O lē na te tāofia saito, e fetu‘uina o ia e le nu‘u; ‘ae i ai le fa‘amanuia i luga o le ulu o lē na te fa‘atauina mai ai.

²⁷ O lē na te sā‘ili‘ili i le lelei, na te sā‘ilia le alofa; a o lē na te sā‘ilia le leaga, e o‘o lava lea ‘iā te ia.

²⁸ O lē na te fa‘atuatua i lona ‘oloa, e pa‘ū lava o ia; a o ē amiotonu, e tupu matagofie i latou, pei o lau la‘au.

²⁹ O lē na te fa‘atigāina lona ‘āiga, e fai mōna tofi le matagi, e ‘au‘auna fo‘i le vale i lē ‘ua poto lona loto.

³⁰ O le fua o le amiotonu, o le la‘au o le ola lea; ma lē na te maua agaga, e poto ia.

³¹ Fa‘auta, e tauia le amiotonu i le lalolagi; e sili fo‘i ‘ona tauia o lē amio leaga ma lē agasala?