Fa‘ata‘oto 10 - O LE TUSI PA'IA - Ekalesia Katoliko Roma

O Fa‘ata‘oto a Solomona

¹ O fa‘ata‘oto a Solomona. O le atali‘i poto na te fa‘afiafia lona tamā; a o le tama valea e fa‘anoanoa ai lona tinā.

² E lē aogā le faulaiga‘oloa o le amio leaga; a o le amiotonu, e lavea‘i lea nai le oti.

³ E lē fa‘alāina e le ALI‘I o ē amiotonu; a o le mana‘o o amio leaga, e te‘ena lea e ia.

⁴ E mativa lē ‘ua galue ma le lima vaivai; a o ē lima malosi e mau‘oa i latou.

⁵ O lē fa‘aputu i le tausaga vevela, o le atali‘i poto lea; a o lē moegase i le tausaga e selesele ai saito, o le atali‘i lea e tupu ai le mā.

⁶ O fa‘amanuia ‘ua i luga o le ulu o lē amiotonu; a o gutu o ē amio leaga, ‘ua ufitia ia i le fa‘asauā.

⁷ O le fa‘amanatuina o le amiotonu, e vi‘ia lava lea; a o igoa o ē amio leaga, e pala ia.

⁸ O lē ‘ua poto lona loto, na te talia poloa‘iga; a o lē ‘ua gutu vale, e lafotūina ia.

⁹ O lē savali i le amiotonu, ‘ua savali ma le saogalemū o ia; a o lē fa‘api‘opi‘o ona ala, e fa‘aalia o ia.

¹⁰ O lē ‘ua genogeno ona mata, na te fa‘atupuina le tigā; o lē ‘ua gutu vale fo‘i, e lafotūina ia.

¹¹ O le gutu o le amiotonu, o le puna o le ola lea; a o gutu o ē amio leaga, ‘ua ufitia ia i le fa‘asauā.

¹² O le ‘ino‘ino e fa‘atupu ai misa; a o le alofa e ufiufi ai solitulafono uma lava.

¹³ ‘Ua iloa le poto i laugutu o lē mafaufau; a o le sasa, e tatau lea i le tua o lē ‘ua leai sona mafaufau.

¹⁴ O ē popoto latou te teua le poto; a o le gutu o le vale, ‘ua latalata i ai le malaia.

¹⁵ O le ‘oloa o le mau‘oa, o lona ‘olo malosi lea, a o le mativa o ē matitiva, o lo latou malaia lea.

¹⁶ O le galuega o lē amiotonu, e i‘u lea i le ola; a o mea e maua e lē ‘ua amio leaga, e i‘u lea i le sala.

¹⁷ ‘Ua i le ala o le ola o lē tausi i mea e a‘oa‘oina; a o lē ‘ua tu‘ua le a‘oa‘iga, ‘ua sesē lea.

¹⁸ O lē ‘ua ufiufi le ‘ino‘ino, ‘ua ‘iā te ia laugutu pepelo; ma lē ‘ua fai tala leaga, o le vale lava ia.

¹⁹ O le tele o ‘upu e fa‘aono solia ai le tulafono; a o lē ‘ua tāofi ona laugutu, o le tagata poto lea.

²⁰ O le laulaufaiva o lē amiotonu, o le ario e sili ‘ona lelei lea; o loto o ē amio leaga, e tusa ia ma se mea fa‘atauva‘a.

²¹ O laugutu o lē amiotonu e fagaina a‘i le to‘atele; a o ē vālelea, e oti i latou ‘ina ‘ua leai se mafaufau.

²² O le fa‘amanuia a le ALI‘I, o lea e fa‘atamao‘āiga ai; na te lē fa‘aopoopo i ai se tigā.

²³ E pei ‘ona fai ma mea e ‘ata‘ata ai le vale ‘ina ‘ua fai mea leaga; e fa‘apea fo‘i le poto i le tagata mafaufau.

²⁴ O le mea e mata‘u i ai lē amio leaga, e o‘o lava lea ‘iā te ia; a o le mana‘o o ē amiotonu, e foa‘iina mai lava lea.

²⁵ E pei ‘ona mavae atu o le asiosio, ‘ua fa‘apea fo‘i lē ‘ua amio leaga ‘ona leai; a o lē amiotonu, ‘ua i ai fa‘avae e fa‘avauvau.

²⁶ E pei o le vineka i nifo, e pei o le asu fo‘i i mata, e fa‘apea le paiē i ē ‘ua ‘auina o ia.

²⁷ O le mata‘u i le ALI‘I e fa‘alevaleva ai aso; a o tausaga o ē amio leaga, e fa‘aitiitiina ia.

²⁸ O le fa‘amoemoe o ē amiotonu o le ‘oli‘oli lea; a o le fa‘atuatuaga o ē amio leaga, e i‘u vale lea.

²⁹ O le ala o le ALI‘I o le malosi lea i ē ‘ua sao a latou amio; a o le malaia i ē fai amio leaga.

³⁰ O lē ‘ua amiotonu e le fa‘agae‘etia lava o ia e fa‘avavau; a o ē amio leaga, e lē mau i latou i le nu‘u.

³¹ O le gutu o lē amiotonu e fua mai ai le poto; a o le laulaufaiva fa‘api‘opi‘o, e vavae‘eseina lea.

³² O laugutu o lē amiotonu ‘ua iloa e ia o mea mālie; a o gutu o ē amio leaga, e fa‘api‘opi‘o ia.