Fa‘aaliga 15 - O LE TUSI PA'IA - Ekalesia Katoliko Roma

O Agelu e To‘afitu ‘ua i ai Mala e Fitu e Fa‘auma Ai

¹ Na ‘ou iloa fo‘i i le lagi le tasi fa‘ailoga tele e ofo ai, o agelu e to‘afitu ‘ua i ai mala e fitu e gata ai; auā e fa‘ai‘uina ai le to‘asā o le Atua.

² Na ‘ou iloa atu fo‘i ‘ua peiseaī o se sami tioata ‘ua fefiloi ma le afi; o i latou fo‘i na manumālō i le manu fe‘ai, ma lona fa‘atagata, ma lona fa‘ailoga, ma le faitau aofa‘i o lona igoa, ‘ua tutū i latou i le sami tioata, ‘ua ‘iā te i latou kitara a le Atua.

³ ‘Ua latou pepese i le pese a Mose le ‘au‘auna a le Atua, ma le pese a le Tama‘i Mamoe, ‘ua fa‘apea atu, “Le Ali‘i e, le Atua e ou le malosi uma lava, na tetele au galuega e ofo ai; e tonu ma fa‘amaoni ou ala, le Tupu o augatupulaga e.

⁴ Le Ali‘i e, o ai sē lē mata‘u ma vivi‘i atu i lou suafa? Auā ‘ua nā o oe e pa‘ia. Auā e ō mai nu‘u uma lava, ma latou ifo i ou luma; auā ‘ua fa‘aalia au fa‘amasinoga tonu.”

⁵ ‘Ua mavae nei mea, ‘ona ‘ou va‘ai lea, fa‘auta fo‘i, ‘ua fa‘aavanoaina i le lagi le malumalu o i le fale fetāfa‘i o i ai le mau;

⁶ ‘ona ō atu lea nai le malumalu o agelu e to‘afitu ‘ua i ai mala e fitu, ‘ua ‘o‘ofu i latou i le lino e mamā ma le pupula, ‘ua fusia fo‘i o latou fatafata i fusi auro.

⁷ O le tasi fo‘i o mea ola e fa ‘ua ia avatu i agelu e to‘afitu o ipu auro e fitu, ‘ua tūtūmu i le to‘asā o le Atua o le soifua e fa‘avavau fa‘avavau lava.

⁸ ‘Ua tumu fo‘i le malumalu i le asu nai le pupula o le Atua ‘atoa ma lona mana; e lē mafaia fo‘i e se tasi ona ulu atu i le malumalu, se‘ia fa‘ai‘uina mala e fitu a agelu e to‘afitu.