Esoto 40 - O LE TUSI PA'IA - Ekalesia Katoliko Roma

O le Fa‘apa‘iaga o le Malumalu

¹ ‘Ona fetalai mai lea o le ALI‘I ‘iā Mose, ‘ua fa‘apea mai:

² O le ulua‘i aso o le masina muamua ‘e te fa‘atūina ai le malumalu o le fale fetāfa‘i o le fa‘apotopotoga.

³ ‘E te tu‘uina ai fo‘i le ‘atola‘au o le tulafono ma puipui atu le ‘atola‘au i le ‘ie puipui.

⁴ ‘E te avane ai fo‘i le la‘o‘ai, ‘e te teuteu ai fo‘i o mea e teuteu i ai; ‘e te avane ai fo‘i le tu‘ugālamepa ma fa‘ae‘e ai ona lamepa.

⁵ ‘E te tu‘uina fo‘i le fata auro e mū ai le mea manogi i luma o le ‘atola‘au o le tulafono, ma e tautau le ‘ie puipui o le faitoto‘a i le malumalu.

⁶ ‘E te tu‘u fo‘i le fata e fai ai taulaga mū i luma o le faitoto‘a o le malumalu o le fale fetāfa‘i o le fa‘apotopotoga.

⁷ ‘E te tu‘u fo‘i le tanoa e mulumulu ai i le vā o le fale fetāfa‘i o le fa‘apotopotoga ma le fatafaitaulaga; ‘e te sasa‘a fo‘i i ai le vai.

⁸ ‘E te fa‘atūina fo‘i le lotoā e si‘osi‘oina ai ma ‘ia e tautau le ‘ie puipui i le faitoto‘a o le lotoā.

⁹ ‘E te ‘ave fo‘i le u‘u e fa‘au‘u a‘i, ‘e te fa‘au‘u a‘i le malumalu, ma mea uma lava e i ai, ma e fa‘apa‘iaina ai, ma ana mea uma lava, ‘ona pa‘ia ai lava lea.

¹⁰ ‘E te fa‘au‘u fo‘i le fata e fai ai taulaga mū, ‘atoa ma ana mea uma; ‘e te fa‘apa‘iaina fo‘i le fatafaitaulaga, ‘ona fai lea ma fatafaitaulaga e sili ‘ona pa‘ia.

¹¹ ‘E te fa‘au‘u fo‘i le tanoa e mulumulu ai ma lona tulaga ma e fa‘apa‘iaina ai.

¹² ‘E te fa‘alatalataina mai fo‘i Arona ma ona atali‘i i le faitoto‘a o le fale fetāfa‘i o le fa‘apotopotoga, ‘e te fa‘atā‘e‘ele fo‘i ‘iā i latou i le vai.

¹³ ‘E te fa‘a‘ofuina fo‘i Arona i ‘ofu sa ma e fa‘au‘uina o ia, ma fa‘apa‘iaina o ia, ‘ina ‘ia faia le faiva o ositaulaga ‘iā te a‘u.

¹⁴ O ona atali‘i ‘e te fa‘alatalataina mai fo‘i i latou ma e fa‘a‘ofuina i latou i ‘ofu tino.

¹⁵ ‘E te fa‘au‘uina fo‘i i latou, fa‘apei ‘ona e fa‘au‘uina lo latou tamā, ‘ina ‘ia latou faia le faiva o ositaulaga ‘iā te a‘u; e fai lava lo latou fa‘au‘uina ‘iā i latou ma tofiga i le faiva o ositaulaga e fa‘avavau i o latou tupulaga amulī.

¹⁶ ‘Ona faia lea e Mose e tusa ma mea uma lava na poloa‘i mai ai le ALI‘I ‘iā te ia, ‘ua fa‘apea lava ‘ona faia e ia.

¹⁷ O le ulua‘i masina i le tausaga e lua, o le ulua‘i aso o lea masina ‘ua fa‘atūina ai le malumalu.

¹⁸ ‘Ua fa‘atūina ai e Mose o le malumalu, ‘ua na tu‘u fo‘i ona lago, ma fa‘atū ona laupapa ma sulu atu ai ona fa‘alava, ma fa‘atūina ona pou;

¹⁹ ‘ua na fofola fo‘i le ufiufi i luga o le malumalu ma fa‘ae‘e ai le ufiufi o le fale fetāfa‘i i ona luga e aupito a luga; fa‘apei ‘ona poloa‘i mai ai o le ALI‘I ‘iā Mose.

²⁰ ‘Ua ia ‘ave fo‘i ma tu‘u papa ma‘a o le tulafono i le ‘atola‘au ma sulu atu amo i le ‘atola‘au, ma fa‘ae‘e le nofoa o le alofa i luga o le ‘atola‘au.

²¹ ‘Ona avatu lea e ia o le ‘atola‘au i totonu o le malumalu ma na tautau le ‘ie puipui, ma na puipui a‘i le ‘atola‘au o le tulafono; e pei ‘ona poloa‘i mai ai o le ALI‘I ‘iā Mose.

²² ‘Ua ia tu‘u fo‘i le la‘o‘ai i le fale fetāfa‘i o le fa‘apotopotoga i le itū i matū o le malumalu, i le itū mai o le ‘ie puipui.

²³ ‘Ua ‘iā teuteua fo‘i le areto i ona luga i luma o le ALI‘I; e pei ‘ona poloa‘i mai ai o le ALI‘I ‘iā Mose.

²⁴ ‘Ona tu‘u lea e ia o le tu‘ugālamepa i le fale fetāfa‘i o le fa‘apotopotoga i le itū i saute o le malumalu, e feagai ma le la‘o‘ai.

²⁵ ‘Ua na tutu fo‘i lamepa i luma o le ALI‘I; e pei ‘ona poloa‘i mai ai o le ALI‘I ‘iā Mose.

²⁶ ‘Ua ia tu‘u fo‘i le fata auro i le fale fetāfa‘i o le fa‘apotopotoga i luma o le ‘ie puipui.

²⁷ ‘Ua ia fa‘amū fo‘i i ona luga le mea manogi; e pei ‘ona poloa‘i mai ai o le ALI‘I ‘iā Mose.

²⁸ ‘Ua ia tautau fo‘i le ‘ie puipui o le faitoto‘a o le malumalu.

²⁹ O le fata e fai ai taulaga mū fo‘i na ia tu‘u ai i le faitoto‘a o le malumalu o le fale fetāfa‘i o le fa‘apotopotoga ma osi ai le taulaga mū ma le taulaga i mea e ‘ai; e pei ‘ona poloa‘i mai ai o le ALI‘I ‘iā Mose.

³⁰ ‘Ua ia tu‘u fo‘i le tanoa e mulumulu ai i le vā o le fale fetāfa‘i o le fa‘apotopotoga ma le fatafaitaulaga; ‘ua ia sasa‘a fo‘i i ai le vai e tā‘ele ai;

³¹ o Mose fo‘i ma Arona, ‘atoa ma ona atali‘i na mulumulu ai o latou lima ma o latou vae.

³² ‘Ua latou mulumulu ai ‘ina a ulufale atu i latou i le malumalu, pe fa‘alatalata i le fatafaitaulaga; e pei ‘ona poloa‘i mai ai o le ALI‘I ‘iā Mose.

³³ ‘Ua ia fa‘atūina fo‘i le lotoā e si‘osi‘oina ai le malumalu ma le fatafaitaulaga ma na tautau le ‘ie puipui i le faitoto‘a o le lotoā; ‘ua fa‘auma fo‘i e Mose le galuega.

‘Ua Ufitia le Fale Fetāfa‘i i le Ao

³⁴ ‘Ona ufitia lea o le fale fetāfa‘i o le fa‘apotopotoga i le ao, ‘ua tumu fo‘i le malumalu i le pupula o le ALI‘I;

³⁵ ‘ua lē mafaia fo‘i e Mose ‘ona ulufale atu i le fale fetāfa‘i o le fa‘apotopotoga, auā ‘ua nofo le ao i ona luga; o le pupula fo‘i o le ALI‘I ‘ua tumu ai le malumalu.

³⁶ A si‘itia fo‘i le ao ai luga o le malumalu, ‘ona ō atu ai lea o le fānauga a Isaraelu i la latou malaga uma.

³⁷ ‘Ae ‘āfai ‘ua lē si‘itia le ao, ‘ona lē ō malaga lea o i latou ‘ina se‘ia o‘o i le aso e si‘itia ai.

³⁸ Auā o le ao o le ALI‘I sa i luga lava o le malumalu i le ao, sa i ona luga fo‘i le afi i le pō, i luma o le ‘āiga uma o Isaraelu, i la latou malaga uma.