Efeso 6 - O LE TUSI PA'IA - Ekalesia Katoliko Roma

O Fānau ma Mātua

¹ O ‘outou le fānau, ‘ia ‘outou fa‘alogo i o ‘outou mātua i le Ali‘i, auā o le mea tonu lava lea.

² “‘Ia e āva i lou tamā ma lou tinā;” o le ulua‘i tulafono lea ‘ua i ai le mea ‘ua folafolaina:

³ “‘ina ‘ia manuia ai oe, ma ia ē nofo tulu‘i ai i luga o le lau‘ele‘ele.”

⁴ O ‘outou tamā fo‘i, ‘aua ne‘i tou fa‘a‘ono‘ono atu ‘iā ‘outou fānau, a ‘ia tausi atu i ai i a‘oa‘iga ma apoapoa‘iga a le Ali‘i.

O Pologa ma Ali‘i Pule

⁵ O ‘outou pologa, ‘ia ‘outou fa‘alogo i o ‘outou ali‘i i la le tino, ma le mata‘u ma le gatete, i le fa‘amaoni o ‘outou loto, e peiseaī ‘ua gaua‘i ‘iā Keriso.

⁶ ‘Aua ne‘i fa‘atagā ‘au‘auna, pei o ē fa‘afiafia i tagata, a ‘ia fa‘apei o ‘au‘auna a Keriso, o ē fai le finagalo o le Atua ma le loto,

⁷ ma le fiafia, o lo‘o ‘au‘auna atu ai i le Ali‘i, ‘ae lē o tagata;

⁸ o iloa e ‘outou o lē na te faia se amio lelei, e toe maua lea lava e ia mai le Ali‘i pe se nofo pologa o ia, po o se sa‘oloto.

⁹ O ‘outou ali‘i fo‘i, ‘ia ‘outou faia ia lava mea ‘iā i latou. ‘Inā tu‘u ia le fa‘amata‘u, ‘ina ‘ua ‘outou iloa o lo‘o i le lagi lē ‘ua fai ma lo latou Ali‘i ‘atoa ma ‘outou, e lē fa‘ailogaina fo‘i se tasi e ia.

O ‘Ofutau Fa‘aleagaga

¹⁰ O‘u uso e, o le toe ‘upu lenei, ‘ia ‘outou loto tetele i le Ali‘i, ma le malosi o lona mana.

¹¹ ‘Ia ‘o‘ofu ‘outou i ‘ofutau ‘ato‘atoa mai le Atua, ‘ina ‘ia ‘outou mafaia ‘ona tete‘e atu i togafiti a le tiapolo.

¹² Auā tatou te lē tau ma tagata, a o ali‘i sili, ma faipule, ma ali‘i o le pouliuli o lenei lalolagi, ‘atoa ma agaga leaga i mea o i le lagi.

¹³ O le mea lea ‘ia ‘outou tago ai i ‘ofutau ‘ato‘atoa mai le Atua, ‘ina ‘ia ‘outou mafaia ‘ona tutū ma tete‘e atu pe a o‘o i le aso vale, pe a uma fo‘i ‘ona ‘outou faia o mea uma tou te tūtūmau ai lava.

¹⁴ O lenei, ‘inā tūtūmau ia ‘outou o fusia o ‘outou sulugātiti i le fa‘amaoni, ‘ia ‘o‘ofu fo‘i ‘outou i le ufifatafata o le amiotonu;

¹⁵ ma ‘ia fa‘ase‘evaeina o ‘outou vae i le sauniga o le tala lelei o le filemū.

¹⁶ ‘Ia fa‘aopoopo i na mea uma ‘ona tago atu i le talipupuni o le fa‘atuatua, tou te mafai ai ‘ona tinei o ū fanafana mū uma lava a lē o lo‘o leaga.

¹⁷ Ma ‘ia ‘outou ‘ave le puloutau o le fa‘aolataga, ma le pelu a le Agaga, o le afioga lea a le Atua.

¹⁸ ‘Ia ‘outou tatalo i le Agaga i aso uma lava i talotaloga ma fa‘atoga uma; ‘ia ‘outou mataala pea i lenei lava mea, ma matuā tausisi i le fa‘atoga mo tagata pa‘ia uma lava;

¹⁹ mo a‘u fo‘i, ‘ina ‘ia tu‘uina mai le ‘upu ‘iā te a‘u, ‘ina ‘ia ‘ou fa‘amalosi ‘ona tautala atu ma fa‘ailoa atu le mea lilo a le tala lelei.

²⁰ O le ‘upu lava lea ‘ua noanoatia ai a‘u le sāvali, ‘ina ‘ia ‘ou fa‘amalosi ai ‘ona tautala, pei ‘ona tatau ‘ona ‘ou tautala atu ai.

O ‘Upu Mulimuli

²¹ O Tuiko, o le uso pele ia ma le ‘au‘auna fa‘amaoni i le Ali‘i, e fa‘ailoa atu e ia ‘iā te ‘outou o mea uma, ‘ina ‘ia ‘outou iloa mea uma o ‘iā te a‘u, o mea ‘ou te faia.

²² ‘Ua ‘ou ‘auina atu o ia ‘iā te ‘outou ‘ona o lea lava mea, ‘ina ‘ia ‘outou iloa a matou mea, ma ‘ia fa‘amatalalotoina ai o ‘outou loto.

²³ ‘Ia i le ‘au uso le manuia ma le alofa, ‘atoa ma le fa‘atuatua mai le Atua le Tamā; ma le Ali‘i o Iesu Keriso.

²⁴ ‘Ia i ai le alofa tunoa ‘iā i latou uma o ē, alolofa tumau i lo tatou Ali‘i o Iesu Keriso. Amene.