LEVITHOUC 1 - NTHANMEI BAIBAL (Revised) (BSI)

Kapwm Rawna Khaengmei

¹ Ringhpouc rui Mousi ta Ringhpouc tuang kalummei pheykai khou rui kawna kabangc khou hyloumei

² Isaraelmei rui khaeng pwkhou taanc nimei riak guay hei dinclou the. Thowkumhmei rui khouringh khaeng pwkhou, guaih pwni, lauziu pwni, ziuh pwni khaeng nuh e.

³ Kamei rui guaih rawna khaengpui ganv khou, hiaksuimei guaituamchic khaeng nina e. Ringhpouc rui kata laalou diu khang kamei rui hei tei Ringhpouc tuang kalummei pheykai kaimun khou guangna katlou nina e.

⁴ Mipu tei rui mi guaichic py khou tei kabaanc mbaenglou pwkhou, hei tei kapaap kuaklou khang katloumei ravkhaeng puat swna laalou puni.

⁵ Kamei guaituamchic tei mi bamv khou tei dowluai nina the, kumna Aron kaikhwangmei amuh nunc rui zei tei Ringhpouc khang katlou lana kalummei pheykai kaimun daeng khou naimei ravchapaeng naek padeih khou tei mi zei tei kazinhlou nina e.

⁶ Mi tangv tei kamei rui guaihgic tei luapna dim nina e.

⁷ Amuh nunc tei rui ravchapaeng khou tei thing tei peiclouna mai swthau nina e.

⁸ Zanh bangv guay tei kapy lev kathav kazauhna kaniw rui mai khou tei lou puni the.

⁹ Mipu tei rui kalungcna khatni katan guay tei khiu nina e kumna thouh sw bammei amuh tei rui mi kapwm tei ravchapaeng khou tei raw nina e. Mi hei rawna khaengmei e, mi rym rui Ringhpouc ta tipian e.

¹⁰ Thowkumhmei rui lauziu kat re thei, hiaksuimei chic kat nina e.

¹¹ Kamei rui hei tei ravchapaeng tuang dihpy biak thangc tei swluai nina e, kumna amuh nunc tei rui zei tei ravchapaeng naek padeih khou tei kazinhlou nina e.

¹² Mipu tei rui dimlou tang pw e thei, thouh sw bammei amuh tei rui kapy khatni kathav kazauhna mi zanc kapwm tei mai khou tei phaiclou nina e.

¹³ Mipu tei rui kalungcna khatni katan guay tei khiulou e thei amuh tei rui mi ravcha tei Ringhpouc khang katlouna mi kapumna tei ravchapaeng khou raw nina e. Mi hei rawna khaengmei e, mi rym rui Ringhpouc ta tipian e.

¹⁴ Thowkumhmei rui nruay rawna khaeng nii e thei, hei tei akhouhna hamh e thei aphyna nina e.

¹⁵ Amuh tei rui hei tei ravchapaeng khou katlouna, kaguang karai tapna, kapy tei mai khou raw nina e. Kazei tei ravchapaeng daeng khou tei nzuk keylou nina e.

¹⁶ Kamei rui kagangv khatni mi khou naimei guay tei laapatna ravchapaeng tuang neihpat biak thangc mbut loumei bamv khou tei hei tei ganclou nina e.

¹⁷ Kamei rui kaswkaeng kanei tei sinna, kaswkaeng tei thaek tap pat makna kapumc tei phaek raek pat nina e, kumlana mi kapumc kapwm tei ravchapaeng khou tei raw nina e. Mi hei rawna khaengmei e, mi rym rui Ringhpouc ta tipian e.