Ruta 1 - Biblija - Pe Baltitko Romani čib (Romanes) 2019

¹ Dre dolé dyvesá, kiéli xulaindle sendárja, jaciá bokh pe phuv. I gijá jekh manúš Judejákire Viflieimostyr, péskire romniása i péskire duje čhavénca te dživél pe Moavitoskire féldy.

² Lav odolé-Manušéskiro sys Jelimielieho, lav léskire romniakiro sys Noemin', a lav léskire dujengire čhavéngiro sys Mahlono i Xilieono; jone sys Jefrafiani Judejákire Vifliejemostyr. I javné jone pe Moavitoskire féldy, i jačnépe odój.

³ I myjá Jelimieho, Noeminjakiro rom, i jaciápe joj duje peskirenca čhavénca.

⁴ Jone lyné péske džuvlién Moavitiankendyr, jekhakiro lav sys e Orfa, a javirjakiro lav sys Ruf' (Rutá), i dživdé odój pašýl deš berš.

⁵ Ne korigedýr (poslie) i duj lákire čhavé, Mahlono i Xilieono, myné, i jaciápe doiá džuvlý bi péskire duje-čhavéngiro i bi péskire-romeskiro.

⁶ I uštyjá joj péskire bor'jenca, i gijá pale Moavitóskire feldendyr, pal-dová so joj šundiá pe Moavitóskire féldy so Devél porisija ke Péskire manušá i dyjá lénge maró.

⁷ I vygijá joj dolé štetóstyr, pe savó dživdiá, i duj borja lákire lása. Kiéli jone giné pir drom, risjovi pe Judejakiri phuv,

⁸ to Noemin' phendiá dujenge péskire bor'jenge: “Džán, risjon kažno dre péskire-dákiro kher; mek te kerél Raj Devél tuménca tangipén, syr tumé obginepe mulenca i mánca!

⁹ Mek te del tuménge Raj Devél, sob tumé te lathén džiibén kažno dre péskire-romeskiro kher!” I čamudia len. Ne jone ĥazdyné gódla i rondlé

¹⁰ i phendlé: “Nad, ame túsa risjovasa ke tyré manušá.”

¹¹ Noemin' phendiá: “Risjon, miré čhajale; pal so tuménge te džán mánca? Naúšto butýr isyn mánde čhavé dre miré masá, savé te javén by tuménge romenca?

¹² Risjon, miré čhajale, džán, pal-dová so me som phuri, sob (kaj) te javav paloróm. Mek, kóli b me i phendjom: ‘Isyn mánge butýr nadiéia”, i usajékh, kóli by me daja-pac' rat te javav romesa i korigedýr (pozže) te bijanav čhavén, –

¹³ tedy ci saštý tuménge te užakiren, paka jone vybarjona? Ci saštý tuménge te tyrden i te na vydžán paloróm? Nad, miré čhajale, me drieván piridživava pal tuménde, pal-dová so Ráskire-Devléskiro vast lathiá man.”

¹⁴ Jone ĥazdyné gódla i nevéstyr lyné te rovén. I Orfa roziaciape péskire sasiasa, a Ruta jaciápe lása.

¹⁵ Noemin' phendiá Rutake: “Ĥáda, tyrí bori risijá ke péskire manušá i ke péskire develá; risjov i tu palál pal tyré borjate.”

¹⁶ Ne Ruta phendiá: “Na začhuv man te jačkirav tut i te risjovav tútyr; ne karik tu džása, odorík i me džáva, i kaj tu javésa te dživés, odój i me javáva te dživáv; tyré manušá javéna miré manušénca, i tyró Devél – miré Devlésa;

¹⁷ i kaj tu merésa, odój i me meráva i javáva garady; mek dová i dová te kerél mánge Raj Devél, i iščo (inké) butýr keréla; jekh meribén man roziačkirela túsa.”

¹⁸ Noemin', dykhí, so joj drieván skedyjape te džal lása, pirijaciá te urakirel la.

¹⁹ I giné jone dujdžiné, paka javné dro Vifliejémo. Kiéli jone javné dro Vifliejémo, saró fóro zarakirdia pal lénde, i rakirdé: “Ake, Noemin'?”

²⁰ Joj phendiá lénge: “Na kharén man Noeminjasa, a kharén man Marasa, pal-dová so Sarezorjakire bičhadiá mánge baró kirkipen;

²¹ me vygijom adathýr barvalypnasa, a riskirdiá man Raj Devél čhučé vasténca. Sóske te kharén man Noeminjasa, kiéli Raj Devél začhudia man te stradynav, i Sarezorjákiro bičhadiá mánge bída?”

²² I risijá Noemin', i lása lákiri bori Ruta Moavitianka, saví javdiá Moavitóskire feldendyr, i javné jone dro Vifliejémo pe kónco (jagóro) dro giveskiro ukedyiben.