Aanlyn Bybel

Матфеё 16 - Biblija - Pe Baltitko Romani čib (Romanes) 2019

Trébima pal Dívo

¹ I Farisiéi i Sadukiei podginé, i, sob (kaj) te propatiakiren Isusós, paldavá jone mangné te sykavél lénge ĥiertýk (znamiénijo) bolybnástyr.

² Ne, Jov otphendiá lénge, phení: “Kiéli da bel'vél', tumé rakiréna, ‘Javéla lačhí vedra (pogoda), pal-dová so bolybén isyn loló;’

³ i pe zlóko: ‘Adadyvés javrí isyn vihura, pal-dová so bolybén isyn loló i začhakirdo oblokénca.’ Tumé džinéna, syr te ĥaljon pir bolybén, ne tumé na džinéna te ĥaljon ĥiertyká (znamiénii) pir razno časo.

⁴ Tumé san bibahtaló i biladžaipnytko ródo, savó rodéla ĥiertýk, na javéla tuménge ĥiertýk, apríč Ionaskiri giertyk.” I Jov mekciá len i gijá péske.

Pal Farisiejengiro i Sadukiejengiro Sykliakiribén.

⁵ I kiéli sykliaibnýtka javné pe javír brégo, jone bistyrde te len pésa laby maró.

⁶ I Isúso phendiá lénge: “Dykhén ža, rakhénpe Farisiejengire i Sadukiejengire sykliakiribnastyr, savó isyn sýrby roščyna (zakvaska).”

⁷ Ne jone lyné te pirirakiren maškír péste: “Ame na lyjam laby maró.”

⁸ Isúso džindiá, so lénde sys pe godý, phendiá: “Tumé san manušá na baré patiaibnása, sóske ž tumé obrakirena maškír péste, so tuménde nane maró?

⁹ Naúšto tumé iščo (inké) na ĥaljona i na ripirena pal pandž laby maró vaš pandž tysjoncy, i kicý khudé tumé skedyné?

¹⁰ I pal eftá (bitrinéngiro deš) laby maró vaš štar tysjoncy, i kicý khudé tumé skedyné?

¹¹ Syr tumé na ĥaljona, so Me phendjom na pal maró: ‘Rakhénpe Farisiejengire i Sadukiejengire roščynatyr?’”

¹² Tén'ci jone ĥalyné, so Jov phendiá lénge te rakhénpe na marune roščynatyr, a Farisiejengire i Sadukiejengire sykliakiribnastyr.

Pétri Rakiréla, so Isúso isyn Xristóso

¹³ I kiéli Isúso javdiá pe phuvjá Kiesarija Filiposkiri, Jov phučelas Péskire syklytkonendyr, rakirí: “Pal Konéste manušá ginéna Man, Manušéskire Čhavés?”

¹⁴ I jone phendlé: “Vari-savé pal Ianoste Boldeipnariste, javír pal Ilijaste, javír pal Jeriemiejoste ci pal jekhéste prorokendyr”

¹⁵ Jov ža rakiréla lénge: “Ne tumé pal konéste Man ginéna?”

¹⁶ I Símono Pétri otphendiá i phendiá: “Tu san Xristóso, Čhavó Džidé Devléskiro, Savó dživéla viéčnes”

¹⁷ I Isúso otphenélas léske i phendiá: “Bahtaló tu san, Símono Ioninoskiro, pal-dová so na manúš, konéste isyn rat i masá, dyjá davá čačipén dre tyrí godý, ne Miro Dad, Savó isyn dro Bolybnáskiro Rajo.

¹⁸ I Me phenáva túke: Tu san Pétri, pe davá bar Me keráva Khangirí Mirí, i liunoskiri zor (meribén) na léla upralypén pe láte.

¹⁹ Me dáva túke klydyna vudarendyr, savé isyn Kralipnastyr dro Bolybnáskiro Rajo, Savésa xulainela Devél; i so tu zaphenesa pe phuv, dová javéla zaphendlo dro Bolybnáskiro Rajo, i so domekesa pe phuv, dová javéla domekno dro Bolybnáskiro Rajo.’”

²⁰ Tén'ci Jov priphendiá šylales sykliaibnytkonénge ni konéske te na rakirén, so Jov isyn Xristóso.

Isúso Rakiréla pal Péskire Mén'ki i Meribén

²¹ Dolé časostyr lyjá Isúso te rakirél jasnes Léskire sykliaibnytkonénge, so Léske trej te džal dro Jerusalimo i but mén'ki te piridživel godephurendyr i rašangirendyr i lylvaritkonendyr, i javéla Jov zamardo, i pe tríto dyvés Jov otdžidjola.

²² I khardiá Pétri Les dre rig, i lyjá te otrakirel: “Potangine Pes, Rajo Dévla! Mek te na javél davá Túsa.”

²³ Ne Jov risijá ke Pétri i phendiá: “Džá krig Mándyr, nálačho; tu Mánge san, syr bar pe drom, pal-dová so tu duminesa na pal Devlýtko, a pal manušýtko.”

²⁴ Tén'ci Isúso phendiá Péskire sykliaibnytkonénge: “Kóli vari-konéske pir iló te džal Mánca, mek te na duminel butýr pal péste, i mek te lel trušúl péskiro, i mek te džal pal Mánde.”

²⁵ Ne kóli vari-kon, savéske isyn drógo džiibén péskiro te zrakhél, kodová xasiakiréla les, i vari-kon, savó otdéla péskiro džiibén vaš Mánge, kodová lathéla Les.

²⁶ Savó lačhipén isyn manušéske, kóli léste javéla saró, so léske trej dalé svetóstyr, a jov xasiakiréla péskiro viéčno džiibén? Ne so manúš moginéla te otdél kučedyr dro paruiben pal péskiro džiibén?

²⁷ Pal-dová so javéla Čhavó Manušéskiro dre zorjakiri sláva Péskire Dadéskire Jangolenca, i tedy kažno (sváko) doreséla, so javéla mol pal péskiro dová, so kerdiá jov dro džiibén.

²⁸ Čačes, Me rakiráva tuménge: adáj isyn vari-savé manušá, savé na meréna, kóli angíl javéna te dykhén Čhavés Manušéskire, savó javéla syr Králi dro Kralipén Péskiro.”

« Vorige

maintained by the United Bible Societies for the Baltic Romani Mission

British & Foreign Bible Society

Volg ons:

Geborgde skakels

Advertensies