Матфеё 15 - Biblija - Pe Baltitko Romani čib (Romanes) 2019

Isúso Rosphenéla pal ĥaratuné Judytka Sykliakiribena

¹ Paló davá javné ke Isúso Farisiéi i lylvarítka Jerusalimóstyr i phendlé:

² “Sóske Tyré sykliaibnýtka na kandéna godephurengire priphenybená? Pal-dová so na morena péskire vastá, angíl syr te xan maró.”

³ I Jov otphendiá lénge, rakirí: “Sóske ž tumé na kandéna Devléskire priphenybená pal péskiro prisykliakiriben?

⁴ Paldová so Devél ž phendiá: ‘Kutiakir dadés i da’, i, ‘Kon rakiréla čoripén pe péskire Dadéste i date, te merél adavá manúš.’

⁵ Ne tumé rakiréna: Kóli manušéste isyn dáro, savó jov moginelas te del dadéske ci dáke, tedy jov na déla, ne jov rakiréla: ‘Davá isyn Devléskiro’,

⁶ adasavó manúš na kutiakirela péskire dadés ci peskirjá da. Adiáke tumé parude lav Devléskiro pe péskiro prisykliakiriben.

⁷ Tumé san, dujemuitka! Šukár angilphendia pal tuménde Isajo:

⁸ ‘Kadalé manušá kutiakirena Man ušténca peskirenca, ne iló léngiro isyn dur Mándyr;

⁹ ne ivjá (naprásnes) kloninenape Mánge, pal-dová so jone sykliakiréna priphenybená, so manušá pridumindle.’

Isúso Piriphenela, Sóstyr Manúš Jačélape Andrál Nažužo Angíl Devléste

¹⁰ I khardiá Jov manušén ke Pe, i phendiá lénge: “Šunén i ĥaljon:

¹¹ ‘Na dová, so zadžála dre manušéskire uštá, keréla Les magirdesa angíl Devléste, ne dová, so džála javrí léstyr, ake, isyn, davá, so keréla Les magirdesa.”

¹² Tén'ci podginé sykliaibnýtka i rakiréna Léske: “Tu na džinésa, so Farisiéi, syr šundlé davá lav, mekné te patián Túke?”

¹³ Jov ža otphendiá: “Kažno raslina, saví Miro Bolybnáskiro Dad na čhudiá dre phuv, javéla riskirdy korniénca (rukhénca).

¹⁴ Mek len; jone isyn kororé lydžaibnáskire. Kóli kororó manúš lydžála korores, dujdžiné peréna dre ĥanbín (jama).”

¹⁵ Ne Pétri otphendiá Léske: “Rosphen aménge, so davá primiéro značynéla”

¹⁶ Jov ža phendiá: “Naúšto i tumé adiáke-pac' na ĥaljona?

¹⁷ Na ĥaljona tumé, so saró, so zadžála dro muj, džála duredýr dro per i čhurdelape javrí?

¹⁸ Ne so džála javrí móstyr, dová-pac' džála iléstyr, i kadavá keréla manušés magirdesa.

¹⁹ Paldová so čoré dúmy, zamariben, biladžaipén, bléndo, čoribena, xohanó dophenybén, kaliakiriben.

²⁰ Kadavá saró keréla manušés magirdesa angíl Devléste, ne te xal namorde vasténca na keréla manušés magirdesa.”

Džuvliákiro Patiaibén

²¹ I gijá péske Isúso odothýr i durija pe Tiroskire i Sidonoskire štéty;

²² i, ake, Xananiejengiri džuvlý, saví sys do-pac' štetóstyr, gijá angíl i zadyja gódla: “Potangine (požalin) man, Rajo Dévla, Čhavó Davidóskiro, nálačho dúho (fáno) drieván rikiréla zor pe miré čhate.”

²³ Ne Jov nisó na otphendiá láke. I Léskire sykliaibnýtka podginé ke Jov i pomangne Les: “Otmek la, pal-dová so joj adiáke déla gódla pal aménde.”

²⁴ Ne Jov otphendiá: “Me som bičhadó féni ke xasibnýtka bakré Izrailjoskire kheréstyr.”

²⁵ Ne joj podgíia i poklonindiape Léske i rakirdiá: “Rajo Dévla! Pomogin mánge!”

²⁶ Ne Jov otphendiá: “Namišto te les maró čhavorendyr i te čhurdes džuklenge.”

²⁷ Ne joj phendiá: “Čačó, Rajo Dévla; ne i džukela xána krohendyr, so peréna léskire-xuláskire skamindestyr.”

²⁸ Tén'ci Isúso otphendiá láke: “Džuvlíje, baró isyn tyró patiaibén; mek te javél, syr tu kamésa.” I jekhátyr lákiri čhaj jaciá sasty.

Isúso Vysastiakirela Buté Manušén

²⁹ I gii odothýr, Isúso džálas pašýl mórjo (derjáv) Galilejakiro i gijá upré pe bérga i besciá odój;

³⁰ i but manušá javné ke Jov, jandlé pésa langalen, kororen, kaliečnonen, bičibitkonen i javire nasvalen, i čhudé len telé angíl Isusóskire ĥerá, i Jov vysastiakirdiá len;

³¹ adiáke, so manušá drieván divindlépe, kiéli dykhné, so bičibitka rakiréna, kalieki saste, langale psiréna, i kororé dykhéna; i jone slavindle Devlés Izrailjoskires.

Isúso Čaliakirela Štar Tysjoncy Manušén

³² I Isúso khardiá ke Pe Leskiren sykliaibnytkonén i phendiá: “Mánge isyn tango (žalko) adalé manušén: pal-dová so uže trin dyvesá jone jačenaspe Mánca, i nane nisó lénde te xan, i Me na kamám te mekav Péstyr len dro drom bokhalenca, sob (kaj) jone te na zden zorjátyr dro drom.”

³³ I sykliaibnýtka rakiréna Léske: “Kaj te las aménge adákicy laby maró pe čhučí phuv, sob (kaj) te čaliakiras adákicy manušén?”

³⁴ I phendiá lénge Isúso: “Kicý laby maró tuménde isyn?” I jone phendlé: “Eftá (bitrinéngiro deš) i nábut mačhore.”

³⁵ I priphendiá manušénge te bešén pe phuv;

³⁶ i lyjá kadalé eftá laby maró i mačhore, i bahtiakiri parikiribnasa Devlés, rosphagirdiá, i délas sykliaibnytkonénge, a sykliaibnýtka dyné manušénge.

³⁷ I jone saré xané, i čalyne; i jone skedyné koterá, so jačnépe, eftá pherdé korzíny (khudé);

³⁸ i xané štar tysjoncy muršá, apríč džuvliende i bijatende.

³⁹ Tén'ci Jov rozmekcia manušén, besciá dre bárka i javdiá pe štéty Magdalinoskire.