Ióvo 1 - Biblija - Pe Baltitko Romani čib (Romanes) 2019

Nálačho Sprobinela Iovos

¹ Jekh manúš sys pe phuv Uc, léskiro lav sys Ióvo, jov sys bibangipnaskiro i devlýtko manúš. Jov darandyja (dardiape) Devléstyr i obrikirelas pes te kerél bibáht.

² I léste lathnepe eftá čhavé, i trin čhaja.

³ I léste sys dasavo mištypén: eftá bará (tysjoncy) bakré, trin bará vierbliudy, pandž šelá guruvengire pary tel ĥámo, pandž šelá oslicy i drieván but dynárja. I jov sys naj baredýr manúš pe Vastóko.

⁴ I léskire čhavé javénas i svenkinenas kažno (sváko) dro péskiro kher, dro dyvés, syr léske trej, i jone bičhavenas i kharenas ke pe péskire triné phenien te xan i te p'jen lénca.

⁵ I sys adiáke: syr svenkitka dyvesá končynenaspe, odová Ióvo bičhavelas pal čhavénde, sob (kaj) te osvencynen len. Jov uštelas tasiárles (ránes) pe zlóko (pe ránko), i jov xačkirelas svénto janybén pal kažnoné (svakone) čhavéste; pal-dová so Ióvo rakirdiá: “Miré čhavé, xaj, mogindlé te kerén gréhi i te košen Devlés dre péskire ile.” Adiáke ŭsády (sak) kerdiá Ióvo.

Nálačho Bangiakirela Iovos

⁶ I, ake, sys dyvés, kiéli Devléskire čhavé (Jangóly) javné te sykadjon angíl Raste-Devléste, i nálačho javdiá adiáke-pac' lénca.

⁷ I phendiá Raj Devél nalačheske: “Katýr tu javdián?” I nálačho otphendiá i phendiá: “Me psirdjom odorík i pale pir phuv i štadjom pir phuv upré i telé.”

⁸ I phendiá Raj Devél nalačheske: “Ci pridykhcianpe tu ke Miro pishári Ióvo? Nane manušés pe phuv, kon isyn adasavó bidošéngiro i devlýtko, savó daréla Devléstyr i obrikirela pes te kerél bibáht?”

⁹ I nálačho otphendiá Ráske-Devléske i phendiá: “Ci prostes Ióvo daréla Devléstyr?

¹⁰ Ci na Tu kerdián tyno trusciál léste, i trusciál léskiro kher, i trusciál kažno mištypén, so isyn léste? Tu bahtiakirdian léskire-vastengire butiá i léskiro barvalypén adiáke but, so rozbarija pe phuv.

¹¹ Ne Tu, ĥáda, féni (tóka) le Péskire vastésa i zakede saró, so isyn léste, i jov, čačes, na javéla te bahtiakirél Tut!”

¹² I phendiá Raj Devél nalačheske: “Ake, saró léskiro isyn dro tyró vast, féni na čilav Iovos kokores.” Tén'ci nálačho gijá krig odothýr, kaj sys Raj Devél.

Iovoste Xasiné Čhavoré i Saró Barvalypén

¹³ I sys dro jékh dyvés, kiéli léskire čhavé i čhaja xané i piné mol (vino) ke jekhe-pšaleskiro kher, savó sys pérvo (anglatunó) dadéste.

¹⁴ I, ake, javdiá jekh bičhadó manúš ke Ióvo i phendiá: “Guruva xané čar i oslicy pal lénde,

¹⁵ syr Sabakire manušá (Savejani) pyné pe lénde i lyné len – dykhén, jone muliakirdé tyrne-beršeskiren kurtalakire (miečoskire) čhinybnasa: i me jekhdžinó nascjom te phenáv túke.”

¹⁶ Kiéli jov iščo (inké) rakirdiá, javír bičhadó manúš javdiá i phendiá: “Devléskiri jag – bliskavica, pyjá bolybnástyr i shačkirdiá bakrén i terné-beršeskiren i vyhaia len, i me jekhdžinó jacjompe džidó te phenáv túke!”

¹⁷ Kiéli jov iščo (inké) rakirdiá, javír bičhadó manúš javdiá i phendiá: “E Xaldiéi kerdé trin šajki, pyné pe vierbliudende i lyné len, i čačó, – zamardé kurtalakire čhinybnaskiresa dynar'jén, i me jekhdžinó jacjompe džidó te phenáv túke!”

¹⁸ Kiéli jov iščo (inké) rakirdiá, tríto bičhadó manúš javdiá i phendiá: “Tyré čhavé i čhaja xané i piné mol ke léngiro pšal, kon isyn anglatunó;

¹⁹ i, ĥáda, jaciá bari balvál, so javdiá čhučé prahendyr i pekadiá pir štar kheréskire kunty i kher pyjá pe terné manušénde, i jone isyn mulé, i me, jekhdžinó, jacjompe džidó te phenáv túke!”

²⁰ I uštyjá Ióvo i riskirdiá péskiro uribén, i muradia sarésa péskiro šeró, i pyjá pe phuv, dyjá paklono,

²¹ i phendiá jov: “Nango me risjováva odorík pale: Raj Devél dyjá i Raj Devél lyjá krig; te javél šardo Ráskire-Devléskiro lav!”

²² Paló saró davá so kerdiápe, Ióvo na phendiá grehítko lav, ci adiáke-pac' jov na bangiakirdia Ras-Devlés ni dro so.