Zakob 1 - Pathian Lekhabū Ānthiang

Chubai Thōna

¹ Zakob, Pathian lē Puma Isuo Khristā suokin, mun tina antheka om nam sōmleianni ngāi kōma chubai ka thō.

Anthēmna lē Ansinna

² Ka ūnāi ngāi, anthēmna tin na tong u tika hava ha rāisānna kiara bē u ro.

³ Nei iam una ansinna hān dūkdiartheina ei rasuo ti riat u ro.

⁴ Hankēng, ītē ansama nei om u lāi nōkna ranga akip le anzuia azōkhieia nei om una ranga dūk adiarnā'n a sinthō mantung rase.

⁵ Tūkareng hianna ansam nā om u ten Pathian kōma zong rase. Amā'n tūkareng anphal taka, angō luia a pēk chachak. Ama kōma anpēka om in ti.

⁶ Tenchu malung ringna buia iamna dōn chunga zong rase. Asik chu malung ringna a dōn tak chu tipuia tiduar ansok thīnthī'n ei suka ei vōr ang kēng.

⁷ Havan tina mī chu, Puma kōm ātā ītē āman ranga sabei nō rase.

⁸ Malung anni chōi miring chu ei thōna tina takanchang nō ni.

⁹ Ūnāi annuoina dingmuna āom ngāi chu a rāi mansān rase, asik chu ansāngna dingmuna āom a ni u na.

¹⁰ Hanūk chu anchongpā chu a rāi mansān rase, asik chu annuoina dingmuna a om a ni, phila pār anga achuoia anpei rang kēng.

¹¹ Ani a hong āsuok a, a hong ālum a, a hong raem a, akung a manthēm a, apār a chul a, ei rīlna dōra asiata ei ānpei a ni. Hava anga han anchongpā chu asīng ansana tina ei chuoia, ei chul rang a ni.

¹² Tūkareng ansinna ādiar zām thei tak chu bōrsāng atung kēng, asik chu ansinna ādiar suo ngāiin chu damna rātpāk lukhū man u'n ti, ama āndit ngāi kōma Pumā'n apēk ranga hava ha a chongtin a ni.

¹³ Tū khatin mo anthēmna a tong le Pathian ātā anthēmna kei tong kēng ti nō rase, asik chu āsia thō hān Pathian chu mathēm thei ngāi mak. Hanūk chu Pathian um tūtē āsia le mathēm ngāi mak.

¹⁴ Tūkareng āsia ningōlnā'n lē a sākpār ningōlnā'n ei ruoia anthēmnāna ei masul chachak.

¹⁵ Hatuka chu hava ningōlna hān asūnga a vong a āsia a hong mazir a, hanūk chu āsia ha a hong ālian suole chu thīna a hong mazir chachak.

¹⁶ Ka ūnāi andit khīt ngāi, anhuonga om u nō ro.

¹⁷ Bōrsāng āsa le pēkna ākip dōra chu chung tianga raāng ngāi Pā kōm ātā a hong āchum kēng. Ama kōma chu anthot ngāilui le a ralīm anthot rēt ang ngala anthot ngāilui a ni.

¹⁸ Ama a kutsuok ngāi kāra mara mānsa khat nei ni theina ranga ama ei zōt anga chongtak chong le han ei na mazir kēng.

Chong Anngāi lē Āzom

¹⁹ Hasikhan ka ūnāi andit ngāi, hava ngāi ha nangnī'n na riat u, mitin hi chong anngāia anrap thei mi ni u ro, tenchu chong a ril a anrap theilui le a tak si anraplui mi ni rase.

²⁰ Asik chu miring taksitna hān Pathian dikna makhip thei mak.

²¹ Hasikhan nangnī'n ānnim le āsa nōka ābit tin pei u tānla koini na rathā a nā'n dam thei chong koini malunga āntū ha omannuoi taka pom u ro.

²² Chong anngāi duoia chong anril ngāi zom lui mī chu a ninga anhuong kēng, nangni chu hantin han om u nō ro.

²³ Tūkareng chong duoi anngāia chong zom lui mī chu dāpōna andang siei luia a mēl a en ang kēng.

²⁴ Nukhōna a sē suole han a mēl en anrapa anngil len ang kēng.

²⁵ Tenchu tūkareng zalēnna anā pēk dān ākip chu malung apēk le asadima anngāia anngil len nōk lē chong anril āzōm len mī chu a sinthōna tina bōrsāng a tung a ni.

²⁶ Nangni kāra tū khatin mo Pathian andon mi anga a phuo thei a, tenchu sakor mūra lākam ankhop anga a maleia lākam makhop lui mī chu a ninga anhuong kēng, ama a sākhuo biaknām akorong a ni.

²⁷ Koini na Pathian le Pā mitmūna sākhuo ānthiang le demna kāi lui chu hiva hi a ni: Antak huna sākāngchā le arōng ngāi kiavāng asak le maniapūra ītē manūbuia ālēng om hi a ni.