Antelna 1 - Pathian Lekhabū Ānthiang

Israel Antelna Mānsā

¹ Āigupta ram ātā ei hong suok u kum annina, a thā annina, ni mānsa khītna nikhuona han Antongna Puon-ina Sinai Mibuirama han Zehova'n Mōsi chu a chongpui a, a kōma,

² “Israel mipui ngāi dōra, a insūngkuo u ang chipa, a pā u insūngkuo ngāi ang chipa, a raming u ei āntel ang chipa, pasal dōra asang asanga tel tānla,

³ kum 20 nātā achunglam, Israel a anduināna āsē thei dōra chu tel ro. Nang lē Aron-in amāni chu a sipairuol anga tel tānla.

⁴ Na bila nam tin ātā mī khat ei om rang, a pā insūngkuona a lusi ei ni chip u rang.

Pānchī Ruoipū ngāi

⁵ “Hiva ngāi hi na bila ānding rang ngāi raming chu a ni: Ruben nam ātā Sediur a nāipasal Elizur;

⁶ Simeon nam ātā Zurisadai a nāipasal Selumiel;

⁷ Zuda nam ātā Aminadab a nāipasal Nason;

⁸ Isakhar nam ātā Zuar a nāipasal Nethanel;

⁹ Zebulun nam ātā Helon a nāipasal Eliab;

¹⁰ Zosef a nāipasal ngāi ātā, Efraim nam ātā Ammihud a nāipasal Elisama; Menase nam ātā Pedazur a nāipasal Gamaliel;

¹¹ Benzamin nam ātā Gideoni a nāipasal Abidan;

¹² Dan nam ātā Amisadai a nāipasal Ahiezer;

¹³ Aser nam ātā Okran a nāipasal Pagiel;

¹⁴ Gad nam ātā Deuel a nāipasal Eliasaf;

¹⁵ Naftali nam ātā Enan a nāipasal Ahira,” a tī na.

¹⁶ Hiva ngāi hi mipui ngāi ātā ānthang a ni u na, a pā u ngāi nam ātā ruoipū a ni u na, Israel ngāi kāra asāng lusī chu a ni u na.

Pānchi ngāi Ei Tamzāt

¹⁷ Hatuka Mōsi lē Aron-in a raming anchin ngāi chu a bila a ruoi u na.

¹⁸ Amānī'n thā annina nikhat changnāna, mipui ngāi dōra chu munkhata a manbūm u na. Mipui ngāiin a insūngkuo chipa, a pā insūngkuo chipa, a raming u ei āntel u ang chipa, kum 20 chunglam mī dōra, a miluvom chipa raming chu anziaka om a.

¹⁹ Zehova'n Mōsi kōma chong ei pēk anga, Sinai mibuirama amāni chu a tel a.

Ruben Pānchi Ngāi

²⁰ Israel a nāipasal ulian khīt Ruben a nāi ngāi, a khūk u insūngkuo anga, a pā insūngkuo anga, a raming ei āntel u anga, pasal dōra a miluvoma, kum 20 nātā chunglam, rālkāpa āsē thei dōra chu,

²¹ Ruben nama āntel ngāi dōra chu 46,500 a ni u na.

Simeon Pānchi Ngāi

²² Simeon a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, pasal dōra a miluvom chipa, kum 20 nātā achunglam, rālkāpa āsē thei dōra chu,

²³ Simeon nama āntel ngāi dōra chu 59,300 a ni u na.

Gad Pānchi Ngāi

²⁴ Gad a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 nātā achunglam dōra, rālkāpa āsē thei dōra chu,

²⁵ Gad nama āntel ngāi dōra chu 45,650 a ni u na.

Zuda Pānchi Ngāi

²⁶ Zuda a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 lē achunglam dōra, rālkāpa āsē thei dōra chu,

²⁷ Zuda nama āntel ngāi dōra chu 74,600 a ni.

Isakhar Pānchi Ngāi

²⁸ Isakhar a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 le achunglam dōra, rālkāpa āsē thei dōra chu,

²⁹ Isakhar nama āntel ngāi dōra chu 54,400 a ni.

Zebulun Pānchi Ngāi

³⁰ Zebulun a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 nātā achunglam dōra, rālkāpa āsē thei dōra chu,

³¹ Zebulun nama āntel ngāi dōra chu 57,400 a ni.

Efraim Pānchi Ngāi

³² Zosef a nāipasal ngāi ātā, Efraim a nāi ngāi, a khūk u insūngkuo anga, a pā insūngkuo anga, a raming ei āntel u anga, kum 20 nātā achunglam dōra, rālkāpa āsē thei dōra chu,

³³ Efraim nama āntel ngāi dōra chu 40,500 a ni.

Menase Pānchi Ngāi

³⁴ Menase a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 nātā achunglam dōra, rālkāpa āsē thei dōra chu,

³⁵ Menase nama āntel ngāi dōra chu 32,200 a ni.

Benzamin Pānchi Ngāi

³⁶ Benzamin a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 le achunglam dōra, rālkāpa āsē thei dōra chu,

³⁷ Benzamin nama āntel ngāi dōra chu 35,400 a ni.

Dan Pānchi Ngāi

³⁸ Dan a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 nātā achunglam dōra, rālkāpa āsē thei dōra chu,

³⁹ Dan nama āntel ngāi dōra chu 62,700 a ni.

Aser Pānchi Ngāi

⁴⁰ Aser a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 nātā achunglam dōra, rālkāpa āsē thei dōra chu,

⁴¹ Aser nama āntel ngāi dōra chu 41,500 a ni.

Naftali Pānchi Ngāi

⁴² Naftali a nāi ngāi ātā, a khūk u insūngkuo anga, a pā insūngkuo anga, a raming ei āntel u anga, kum 20 nātā achunglam dōra, rālkāpa āsē thei dōra chu,

⁴³ Naftali nama āntel ngāi dōra chu 53,400 a ni.

⁴⁴ Hiva ngāi hi Mōsi lē Aron-in, Israel ruoipū sōmleianni ngāi le ei tel u ngāi chu a ni, a pā insūngkuo rathūla ānding chip u na.

⁴⁵ Hantin han a pā insūngkuo ang chipa Israel nāi ngāi, kum 20 nātā achunglam, Israel-a rālkāpa a sē thei ngāi dōra chu,

⁴⁶ Antelnāna āom ngāi dōra chu 6,03,550 a ni.

Levi Nam ngāi Antel Lui

⁴⁷ Tenchu Levi nam ngāi chu, a pā u ngāi nam anga antel u mak a.

⁴⁸ Zehova'n Mōsi a kōma a ril a,

⁴⁹ “Levi nam ngāi rong tel nō ro, Israel nāi ngāi kārā'm tel nō tānla;

⁵⁰ Tenchu Levi mi ngāi chu Riatpuina Biakbūk, asūnga a tinratuo āom ngāi dōra lē asūnga neinun āom ngāi dōra chunga āenpūna phun tānla; amānī'n biakbūk le asūnga tinratuo ngāi dōra chu raput u'n ti; biakbūk chu kiavāng u'n tia, hatuka biakbūk anhīl vinga riabuk khuor u'n ti.

⁵¹ Biakbūk chu maton tiang a pan rang kiple han, Levi ngāiin masum chachak u'n ti; biakbūk ānding a nāng tik pei le, Levi ngāiin manding u'n ti. Mītei a kōla āhong dōra chu anthata om in ti.

⁵² Israel nāi ngāi chu tūkarengin a sipai ang chipa a riabuk le a puon-in u ngāi chu rīn u rase.

⁵³ Tenchu Levi mi ngāi chu Riatpuina Biakbūk anhīl vinga riabuk ei khuor u rang, Israel mipui ngāi chunga taksitna ei hong chul nōkna rang, Levi ngāiin Riatpuina Biakbūk chu kiavāng u'n ti,” a tī na.

⁵⁴ Hantin han Israel nāi ngāiin a thō u na; Zehova'n Mōsi kōma chong ei pēk anga, amānī'n a thō kiar u na.