OBADAYA 1 - Mende Bible Portions

Iidɔm Mamani Yaa a Yeilɔ

¹ Obadaia hindahulɔlɛi. Hi mia Ndemɔi Ngewɔ i ndeni kɔlooni Iidɔm ma: Mu goo mɛninga a hiye Ndemɔi gama, tawao ti ngowiliyia lemɔi yoyonga kɛnyɛisia lia: “A hiye! A mu hiye mu lapi la!”

² A tɔnya nga bi yayeilɔ kɛnyɛisia lia; nga bi yayeilɔ.

³ Wu mamani i wu yalemanga, wa wu heini fawagɔtusia wumba, nasia ti heimɛisia ti yaguhangɔ. Wa nde wu liisia hu wue, “Ye mia a nya gula ndɔɔlɔmei?”

⁴ Kia bɛ wa guwo kia yibɛi na, kia bɛ wu leisia ti ndumbekɛisia lia, nga wu yayei naa, hi mia Ndemɔi ndenga.

⁵ Ina humablɛisia ti wailɔ wu gama, kɛ kapublɛisia a kpindii kia ti bi jukuunga la! Tɛɛ na huma lekee ti longɔ la? Ina ndɔyeyakɔ lɛmbablaa ti wailɔ wu gama, tɛɛ ye mɔnunga lo?

⁶ Kia ti Isɔ nyaninga la, ti ngi gbatɛisia wumbunga!

⁷ Wu magbɛlɛmablɛisia gbi ti wu wɛlɛnga, ti wu gbɛnga wu lɔɔlei hu; wu ndiamɔisia ti wu wɛlɛnga; nasia ti wu mɛhɛɛ mɛni ti maniyatɛnga wu va wuii hugɔɔ.

⁸ Foloi na ma, hi mia Ndemɔi ndeni Nga nɛmahuleweiblɛisia jukuulɔ Iidɔm hu, kɛ hindahugɔɔla Isɔ Yiyei hu.

⁹ Bi gɔgɔblɛisia ti hu a vayalɔ, O Teman, kɔ wɔi numu gbi lekee a hiye Isɔ Yiyei hu i jukuu.

Iidɔm i Nyamunga a Ngi Ndewei hindoi

¹⁰ Paa naa va kɛ kpaagba na bi ndaani bi ndewei hindoi Jekɔpi, gawufe a bi magbolelɔ, tawao nga gbelelɔ bi ma kunafɔ va.

¹¹ Foloi na ma bi looni gba, foloi na ma hotangɛisia ti lini a ngi gbatei, kɛ kɛnyɛblɛisia ti jɔkɔnga ngi gɔlɛi lamɛisia hu kɛ ti kɔhani gɔnga Jelusalɛmi va Wua bɛɛ wu yɛni a ti yila ye lɔ.

¹² Kɛɛ bii yɛ a ndiima nyamu gohunɛɛ wie bi ndewei hindoi mahu foloi na ma kpaagba ngi maleni; bii yɛ a kohunɛɛ wie Juda nungeisia mahu foloi na ma hunyani ti maleni; bii yɛ a mamani yɛpɛ le kpaagba voloi va.

¹³ Bii yɛ a jɔkɔ nya nungeisia ti gɔlɛi la ma foloi na ma kpundɛ gulani ti ma; bii yɛ gbɛlɛɛ nasia ma a ndiima nyamu hu wee Juda jukuulei va foloi na kpundɛ gulani ti ma. Bii yɛ a ngi hakeisia gapu foloi na ma kpundɛ gulani ti ma.

¹⁴ Bii yɛ a loo pelela gbameisia kɔɔ wu nasia waa ti wilama kɔi ma; bii yɛ a nasia ve ti mabawoni ndii nyani voloi ma.

Ngewɔ a Kɛnyɛisia Gbɛmbolɔ

¹⁵ Gbamaile Ndemɔi voloi lɔ gblanga kɛnyɛisia gbi va. Kia bi pienga hi, hi mia a wie bi gama; bi wie hindɛisia ta yamalɔ bi gama.

¹⁶ Ajifa kia wu ndɔ gbɔlenga nya yiyei magayemangɔi mahu, kɛnyɛi nasia gbi ti wu galangɔ ta ndɔi gbolelɔ; ta kpɔilɔ a kaka hu we, kɛ ti wienga kia bɛ ti ya wɔ gba a ndɔ gbɔlene.

Isleɛl Lemayɛi

¹⁷ Kɛɛ Saiɔn yiyei mahu nasia ta yɛlɔ na ta wila, tawao ma a gayeilɔ; kɛ Jekɔpi wɛlɛi a nasia houlɔ ti yɛ ti gbuani ti yeya.

¹⁸ Jekɔpi wɛlɛi a wielɔ a ngɔmbu, Josɛfi wɛlɛi i wie a ngɔmbu voo, tawao Isɔ wɛlɛi a wielɔ a ndawabɛ ta ti mɔlɔ foo, tawao numu gbi ɛɛ gbua hu Isɔ wɛlɛi bu; ajifa Ndemɔi i yɛpɛnga.

¹⁹ Nasia ti gbuani Nɛgɛbi Isɔ yiyei a yɛlɔ ti woo, kɛ nasia ti gbuani Sɛfila, Filistiablɛisia ti lɔɔlei; Ifileimi kɛ Samelia lɔɔlei a yɛlɔ a ti woo, tawao Gileadi a wielɔ a Bɛnjamin woo.

²⁰ Isleɛl gɔhuoisia nasia ti yɛ Halaa Fonisia a yɛlɔ a ti woo haaŋ i fo Salɛfati; kɛ Jelusalɛmi gɔhuoisia nasia ti yɛ Sɛfalad tei nasia ti Nɛgɛbi ta yɛlɔ a ti woo.

²¹ Nasia ti ma yɛ mbawoni ta lɛɛlɔ Saiɔn Yiyei mahu yɛva Isɔ Yiyei mahu; tawao mahawui a yɛlɔ a Ndemɔi ndɛi.