NƐHIMAYA 1 - Mende Bible Portions

¹ Nɛhimaya Hakalaya hindoloi layeisia. Kisilɛvi yalui hu, fooi yee numu gbɔyɔngɔi hu, ji ngi yɛ Susa la wai hu,

Nɛhimaya Gbeelei Jelusalɛmi va

² Hanani, nya ndewehingeisia yee ngila kɛ nungaa lɛnga ti hiyeni Juda lɔɔlei hu, ti wanilɔ kɛ ngi ti mɔlinga kɔlooni Juublei nasia ma ti mabawoni nasia tii yɛ ti wumbuni kɔhou hu, kɛ gbɔma kɔlooni Jelusalɛmi ma.

³ Ti poteilɔ tɛɛ, “Nasia ti mabawoni tatei hu, nasia ti wilani kɔhoui yeya, tia mɔnɛ waa hu kɛ ngufe hu; Jelusalɛmi bundi wolonga, tawao yee gɔlɔ lameisia kpɛlɛɛ ti mɔnga.”

⁴ Ji ngi njiei jisia humɛnini, ngi heilɔ kɛ ngi wɔlɔnga, tawao ngi wɔlɔilɔ folo gboto va, a suhou la kɛ hɛɛ weila ngelegohu Yewɔi gulɔ.

⁵ Ngi ndeilɔ ngɛɛ, “O Ndemɔi, ngelegohu Yewɔi, bia Ngewɔ wai a bie, tawao bi ma luwangɔ, na a hindayayilingɔ hou kɛ ndoma kpaukpau a nasia ti longɔ a ngie tawao ta ngi jaweisia hou;

⁶ bi woli i wolo, bi yameisia ti lawo, kɔ bi wolo bi bɔilopoi hɛɛ woi ma kia ngi hɛɛma bi gama a folo kɛ kpindii gbi, Isleɛl nungeisia, bi bɔilopoisia va, a gayeila a Isleɛl nungeisia ti jumbuisia, nasia mu ti wienga a bie. Nya kɛ nya mbondawui mu jumbu hinda wienga.

⁷ Mu bi gbalɛma hinda waa wienga, a gbahala bi jaweisia hou va, bi lahinsia, kɛ bi gaasia, nasia bi ndeni bi bɔilopoi Mojisi ma.

⁸ Gili a layei na bi ndeni bi bɔilopoi Mojisi ma, bɛ, ‘Ina wuii loni lanayahu nga wu vayafayalɔ kɛnyɛwuisia lia;

⁹ Kɛɛ ina wu woteilɔ nya gama, wu nya jaweisia hou, tawao wu ti wie, kia bɛ nasia wu ti wilinga polooŋ ngelengɛlɛmeisia, nga ti lɛlɔ ma ti gbua na, kɛ ngi waanga a tie miando hindei na ngi loko loonga na ma nya biyei hei va na.’

¹⁰ Ti yɛni a bi bɔilopoisia kɛ bi nungeisia lɔ, nasia bi ti wumawoni a bi gbaya wai kɛ bi loko gbayangɔi.

¹¹ O Ndemɔi, bi woli i wolo bi bɔilopoi hɛɛ woi ma, kɛ bi bɔilopoisia ti heisia ma, nasia ti gohunɛngɔ baagɔma ve va bi biyei wɛ. Bi bɔilopoi hindei lɛ gulɔ ma a foloi ji, tawao bi pie i manuma jɔɔ kenei ji yama!” A watii na ma, ngi yɛni a mahei bola houmɔ.