JONA 1 - Mende Bible Portions

Jona Ndemɔi layɛi Gbuanga hu

¹ Kiahuna naa Ndemɔi layɛi wailɔ Jona gama, Amitai hindoloi, yɛ,

² “Li yakpe Ninivɛ, ta wai na hu, tawao bi ti lahi; gbamaile ngi lii heinga ti wie hinda nyamui ma.”

³ Kɛɛ Jona i hiyeilɔ wela va Ndemɔi ma liva Tasisi. I liilɔ Jɔppa, kɛ i ndɛndɛ wa yila malenga na a li Tasisi; fale i ngi mapawei veilɔ, kɛ i lɛnga hu liva Tasisi ta tieni, wela va Ndemɔi ma.

⁴ Kɛɛ Ndemɔi i vivi wa yeilɔ gboyɛi ya, kɛ ye vivi na wailɔ gboyɛi ya na hi ndɛndɛ wai i loni kulo kɔ i woo.

⁵ Na wooma njawuliblɛisia ti luwailɔ, kɛ numui gbi i wɔlonga ngi nda yewɔi gama. Hakɛi nasia ti yɛ ndɛndɛ wai hu ti ti wililɔ gboyɛi hu, kɔ ndɛndɛ wai i yɛ vowo vowo ti va. A ye watii na Jona i yeilɔ ndɛndei ye sɔkui hu i lana njii wa hu.

⁶ Ndɛndɛwa mahumɔi i wailɔ ngi gama, kɛ i ndenga ngi ma yɛ, “Gbɔ bi piema bi njii waa hu? Hiye, bi wɔɔlɔ bi yewɔi gama! Kɛnga ta lee bɛ i gili a mue nahi maa jukuu.”

⁷ Njawuliblɛisia ti ndeilɔ ti nyɔunyɔu ma tɛɛ, “A wa mu tɔtɔi gbɛ, kɔ mu kɔɔ yeva lɔ kpundɛi ji mu malenga.” Fale ti tɔtɔi gbɛilɔ, kɛ i longa Jona ma.

⁸ Na wooma ti ndeilɔ ngi ma tɛ, “Hu ngɛɛ a mue gbɛ va lɔ kpundɛi ji i mu malenga? Ngenge ye gbɔ ba bie? Bi gbua mi lɔ? Bi ndɔlɛi ye gbɔɔ hu? Tawao kɛnyɛi ye gbɛ mɔ lɔ a bie?”

⁹ I kpɛmboilɔ yɛ, “Hiblumɔ mia a nge, nga luwa Ndemɔi ngelegohu Yewɔi lɔ ma, na i gboyɛi kɛ ndɔlɔmalambɛi gbatɛni.”

¹⁰ Na wooma ye hingeisia ti luwailɔ naa gboŋ, kɛ ti ndenga ngi ma tɛ, “Gbɔ a ji bi pienga!” Gbamaile ti kɔɔilɔ kɛ i wela ma Ndemɔi lɔ ma, ajifa i ndeilɔ ti ma.

¹¹ Na wooma ti ndeilɔ ngi ma tɛɛ, “Gbɔɔ ma pie a bie kɔɔ gboyɛi i gɔlɛ mu wɛ?” Gbamaile gboyɛi i yɛlɔ lekee a gbɛmgba.

¹² I ndeilɔ ti ma yɛ, “A nya wumbu, wu nya wili gboyɛi hu; na wooma gboyɛi a gɔlɛlɔ wu va; gbamaile ngi kɔɔlɔ kɛ nya va lɔ vivi wai ji gulanga wu ma.”

¹³ Na hu gbi ye hingeisia ti lapiilɔ a kpaya kɔ ti yama a ndɛndɛ wai kakpoi ya, kɛɛ tii guni, gbamaile gboyɛi i yɛlɔ lekee a gbɛmgba.

¹⁴ Na wooma ti wɔlɔilɔ Ndemɔi ma tɛ, “Ndae le, O Ndemɔi, mua bi manɛnɛ ma, baa pie maa jukuu kenɛi ji lɛvui va. Baa pie maa koto majɔɔ kenɛi ji halɛi va; ajifa bia, O Ndemɔi, na wienga a nɛ bi wɛ.”

¹⁵ Fale ti Jona wumbuilɔ, ti ngi wili gboyɛi hu; kɛ gboyɛi i gbeenga a lumbela.

¹⁶ Na wooma ye hingeisia ti luwailɔ Ndemɔi ma hulewɛngɔ; kɛ ti saa gbuanga Ndemɔi gama, ti lahedingaa wumbu.

¹⁷ Kɛɛ Ndemɔi i pielɔ nyɛ wa i Jona gbɔle; kɛ Jona i yɛlɔ nyɛin gohu njii sawa va.