ƐSLA 1 - Mende Bible Portions

Sailɔsi ndenga Juubleisia kɔɔ ti yama

¹ Paasia mahei Sailɔsi vooi yee halayei hu, kɔɔ nahi Ndemɔi layei na i yɛ Jɛlimaya la i wie, Ndemɔi pielɔ Sailɔsi Paasia mahei yafei i vulu, nahi i tutu yoyo ngi mahawui hu gbi, kɛ gbɔma a kɔlɔ nyɛingɔ hu yɛ:

² “Hi mia Sailɔsi Paasia mahei i ndeni yɛ: Ndemɔi ngelegohu Yewɔi i mahawuisia gbi ndunyei hu venga mbɛ; tawao i ndenga nya ma pɛlɛ loo va ngi wɛ Jelusalɛmi Juda lɔɔlei hu.

³ Nungei nasia gbi lekee ti wu lia, ti yɛni a ngi nungeisia, ti Yewɔi i yɛ ti wooma! Mahoungɔ naa ti li Jelusalɛmi Juda lɔɔlei hu, tawao ti Ndemɔi wɛlei loo gbɔma, Isleɛl Yewɔi i yɛni a Ngewɔ na lɔ i Jelusalɛmi hu;

⁴ tawao nungei nasia gbi ti mabawoni, mia gbi lekee ti yɛ heini na, nungeisia ti yee hindei na hu ti kpɔma hei ti ma a kanigole kɛ kanigbɔlu, ta hakangaa kɛ toohaningaa, i gbua ndiyekpe jaa hanisia ma Ngewɔ wɛlei va na i Jelusalɛmi.”

⁵ Juda kɛ Bɛnjamin mbondɛi wɛlɛbublaa ti mahubleisia kɛ saagbuableisia kɛ Livaitisia, nasia gbi Ngewɔ i ti lii looni, ti ti magbatɛlɔ li va Ndemɔi wɛlei loo va gbɔma Jelusalɛmi.

⁶ Ti heinyɔuisia ti gbɔilɔ ti ma a kanigole bolangaa taa kanigbɔlu taa hakangaa taa toohaningaa kɛ a boyahani yekpengɔngaa, i gbua nasia gbi ma ti kpuani a ndiiyekpe.

⁷ Mahei Sailɔsi vulii mia gbuani a Ndemɔi wɛlɛ hakei nasia Nɛbukadnɛsa i yɛ ti gbuani Jelusalɛmi, kɛ i toonga ngi yewɔisia ti yee pɛlɛ bu.

⁸ Sailɔsi Paasia mahei i pielɔ ti ti waa Mitlɛdati yeya, haaka lamagbatɛmɔi, na i ti gbawani i fe Sɛsbasaa Juda gulɔmɔi wɛ.

⁹ Tawao ti jikei lɔ a ji: kanigbɔlu galongaa nuu gbɔyɔngɔ mahu puu, kanigolei galongaa taosin yila; bowangaa nuu gbɔyɔngɔ mahu taalu;

¹⁰ kanigbɔlu bolangaa nuu gbɔyɔngɔ mahu puu, kanigole bola wekangaa, hɔndɔ naani kalɛ puu, haka wekangaa taosin yila;

¹¹ kanigbɔlu kɛ kanigole hakeisia gbi ti yɛ a taosin lɔɔlu kalɛ hɔndɔ naani lɔ. Sɛsbasaa wailɔ a jisia gbi, ji ti wani a nasia Jelusalɛmi ti yɛ wɔ kɔhou hu Babilɔn.