Yaƹqub 5 - Ṯarifiṯ 2020

Ccarr n twajar iḍeǧmen iwḏan

¹ Yallaheṯ a twajar, ṣennṭeṯ mliḥ! Truṯ, sɣuyeṯ x lmuṣibaṯ iy xawem d ɣa ihwan.

² Agȓa nwem ixsar, arruḍ nwem ccin-ṯ ṯkeccawin.

³ Ddheb nwem ḏ nnuqarṯ nwem arcant, ṯarciṯ nni aḏ techeḏ ḍed nwem aḏ tecc aysum nwem am ṯmessi. Kenniw ṯxezznem agȓa s waṭṭas i yixef nwem ḏi ȓƹaheḏ-a aneggaru.

⁴ Iwa, kenniw war txeǧisem ca icewwaren iy ḏawem imejjaren ḏeg imarjeƹiwen nwem, texȓiseṯ nsen ṯesɣuyiw-d tceṯca zzaywem. Ṯɣuyyeṯ nni n icewwaren itsȓa-yas Siḏi Arebbi Lƹalamin.

⁵ Kenniw tƹicem ḏi ddunect-a s ufelles ḏ ccehweṯ nwem. Ṯḏewȓem ṯṣaḥḥem ṯwejḏem am iyenduzen ḏi nhar nni iy ḏi ḏasen ɣa ɣarṣen.

⁶ Ṯḥekmem x yinni iǧan nican, ṯenɣim-ṯen bȓa ma ḏawem ƹarrḍen.

Labud ṣṣbar ḏeg uƹeddeb

⁷ Ay ayṯma, ṣbareṯ aȓ d ɣa yas Siḏiṯneɣ. Xzareṯ ɣar ufeǧaḥ mammec itraja ṯafeǧaḥṯ n ṯmurṯ nnes, itraja-t s yijjen n ṣṣbar aȓ ɣa yuweṯ unẓar amezwaru ḏ wenni aneggaru.

⁸ Uȓa ḏ kenniw ṣbareṯ cejjƹeṯ ixef nwem minzi Siḏiṯneɣ ƹȓayen aḏ d iƹqeb.

⁹ Ay ayṯma, war ssawaȓeṯ ca ḏeg wayawya ḥima war twaƹiqibem ca; qa wenni iteḥkamen ibedd-d ɣar ṯewwarṯ.

¹⁰ Ay ayṯma, ḏfareṯ abriḏ n lʼanbiya yinni ig issiwȓen s yisem n Siḏi Arebbi niṯni twaƹeddben ṣebbaren.

¹¹ Aqa ṯessnem yinni iṣbaren nteḥsab-iṯen ɣarsen ssaƹḏ. Kenniw ṯesȓim x ṣṣbar nni n nnabi Ayub, ṯessnem mammec ṯ ibarek Siḏi Arebbi ḏeg uneggaru minzi Siḏi Arebbi netta ḏ aḥnin ḏ araḥim.

¹² Ay ayṯma, aqa min iǧan muhim. War tjaǧam ca s ujenna niɣ s ṯmurṯ niɣ s can ṯmesȓayṯ nneɣni. Iwa, xmi ɣa ṯinim wah, iniṯ wah. Xmi ɣa ṯinim lla, iniṯ lla. Ḥima war xawem d ihewwi ca lƹiqab.

Jjheḏ n ṯẓaǧiṯ

¹³ Meȓa ḏin can yijjen jarawem itwaƹeddab, itxeṣṣa-yas aḏ iẓẓaǧ. Meȓa ḏin can yijjen jarawem ifarreḥ, itxeṣṣa-yas aḏ iɣennej i Arebbi.

¹⁴ Meȓa ḏin can yijjen jarawem itnezbar, itxeṣṣa-yas aḏ d iȓaɣa x imeqqranen n jmaƹṯ n ȓmuminin axas ẓẓaǧen aṯ dehnen s zzect s yisem n Siḏiṯneɣ.

¹⁵ U ṯẓaǧiṯ nni ṯenni itqeddamen s lʼiman aḏ tesgenfa wenni iǧan ƹeyyan. Ssenni Siḏiṯneɣ aṯ isbedd. Meȓa igga ȓmuƹṣiyaṯ, aḏas iɣfar.

¹⁶ Ƹtarfeṯ s ȓmuƹṣiyaṯ nwem kenniw i wayawya, ẓẓaǧeṯ x wayawya ḥima aḏ tgenfam. Ṯẓaǧiṯ n bnaḏem ig iǧan nican nettaṯ ḏayes jjheḏ aṭṭas nettaṯ ṯefsus.

¹⁷ Tuɣa nnabi Ilyas netta ḏ bnaḏem am neccin, itẓaǧa aṭṭas ḥima war icciṯ bu unẓar. Ikka ṯeȓt snin ḏ uzyen war yuwṯi bu unẓar x ṯmurṯ.

¹⁸ Menbaƹd ƹaweḏ iẓẓuǧ, yuwṯa unẓar x ṯmurṯ ṯeṣȓaḥ ṯfeǧaḥṯ nnes.

^19-20 Ay ayṯma, can yijjen zzaywem iffeɣ abriḏ n lḥaqiqa. Meȓa yarri-ṯ-id can yijjen nneɣni, itxeṣṣa-kenniw aḏ tessnem belli wenni iy ṯiḏ yarrin zeg ubriḏ nnes n ȓbaṭeȓ ataf isenjem-iṯ zi ȓefna nnes ataf aḏ twaɣfarent aṭṭas n ȓmuƹṣiyaṯ.