Yaƹqub 1 - Ṯarifiṯ 2020

Arrasul Yaƹqub itseǧam x ȓmuminin

¹ Nec ḏ Yaƹqub ḏ ȓƹabḏ n Arebbi ḏ ȓƹabḏ n Siḏiṯneɣ Ƹisa Lmasiḥ, tseǧameɣ x ṯenƹac n ṯqebbaȓ n ȓmuminin iy itemzeǧaƹen x ṯmura.

Lʼiman ḏ ȓemḥayen

² Ay ayṯma, farḥem aṭṭas xmi ɣa ṯiȓim ḏi lʼanwaƹ n ȓemḥayen.

³ Kenniw ṯessnem marra ȓemḥayen-a iy ṯseƹḏum ƹlaḥsab lʼiman nwem tawint-id ṣṣbar.

⁴ U labud ṣṣbar-a aḏaywem ikemmeȓ ccɣeȓ nnes ḥima aḏ temɣarem aḏ tƹemmarem s lʼiman war ḏawem ṯneqqiṣ uȓa ḏ ijjen n ȓhajeṯ.

⁵ Meȓa can yijjen zzaywem itxeṣṣa-yas ȓefhameṯ, aḏas t ittar i Arebbi netta aḏas t yuc. Minzi netta ifassen nnes rezzmen war itḥeggar ḥadd.

⁶ Walakin manaya itxeṣṣa-yas aḏas ṯ ittar s lʼiman bȓa ma aḏ icekk ȓaḥeqqac wenni itcekkan igga am ȓmujeṯ n ȓebḥar ishaja-t arriḥ itawi-t itarra-t-id.

⁷ Bnaḏem-a itxeṣṣa-yas war itfekkir ca belli Siḏi Arebbi aḏas yuc can ȓḥajeṯ.

⁸ Itcekka, kuȓ ȓaƹqeȓ nnes min ḏas iqqar menbaƹd itḏewwax ḏeg ibriḏen nnes marra.

⁹ Fa itxeṣṣa-yas i ȓmeskin ig yumnen aḏ iftaxar minzi isgaƹƹeḏ-iṯ Arebbi.

¹⁰ Itxeṣṣa-yas i ttajar ig yumnen aḏ iftaxar minzi netta isehwa-ṯ Arebbi, ȓaḥeqqac ttajar igga am nwar n arbiƹ war itdummin ca.

¹¹ Tsummar-d ṯfuct, s ȓeḥmu nnes issecmaḍen tsazzaɣ arbiƹ, iweṭṭa nwar nnes itraḥ zzin nnes. Ammu iy ḏas itewqiƹ i ttajar-a, netta itisraw axmi ixeddem ccɣeȓ nnes.

¹² Ssaƹḏ n wenni iṣbaren x ȓemḥayen ataf xmi ɣa injeḥ aḏ iysi ttaj n ṯudarṯ wenni iy zi iƹaheḏ Arebbi yinni iy ṯ itḥibban.

¹³ Meȓa itwaɣarra can yijjen, itxeṣṣa-yas war iqqar ca qa ḏ Arebbi iy ḏayi itɣarran. Lla, Arebbi war itɣarri ḥadd, war itwaɣarri ca s ccarr.

¹⁴ Netta bnaḏem itwaɣarra s ssabab n ccehweṯ nnes ṯaƹeffant, nettaṯ iy ṯ itjarran nettaṯ iy ṯ ixeddƹen.

¹⁵ Ṯumma ccehweṯ-a wami ṯeysi aƹeddis ṯurew-d ȓmuƹṣiyeṯ, ṯumma ȓmuƹṣiyeṯ-a wami ṯemɣar ṯejja-d ȓmewṯ.

¹⁶ Ay ayṯma imƹizzen inu, war xeddƹeṯ ca ixef nwem.

¹⁷ Marra ṯimuca ṯiṣebḥanin ḏ lhadiyaṯ ikemȓen tekkent-id zeg ujenna, tasent-id zi Arebbi Babas n nnur. Netta war itbeddiȓ ca am ṯiȓi nni ig igguren.

¹⁸ Wami ixes netta, ikkar yarra-aneɣ ḏ ṯarwa nnes iy d ijja s wawaȓ n lḥaqiqa ḥima a niȓi neccin ḏ imezwura zi min d ixȓeq.

Wenni itṣennaṭen ɣar wawaȓ n Arebbi itxeṣṣa-as aṯ igg

¹⁹ Cuf ay ayṯma inu imƹizzen, itxeṣṣa kuȓ ijjen aḏ itsȓa aṭṭas, aḏ ifekkar qbeȓ ma aḏ issiweȓ, war itƹaṣṣib ca ḏeɣya.

²⁰ Minzi aƹeṣṣeb n bnaḏem war d isiwwiḍ ca min iǧan ḏ ȓḥaqq ɣar Arebbi.

²¹ Beƹƹḏeṯ x marra min iǧan ḏ aƹeffan ḏ min iǧan ḏ ccarr. Bȓa ttakebbur qebbȓeṯ awaȓ nni n Arebbi itwaẓẓun ḏaywem izemmar aḏ isenjem ȓaƹmar nwem.

²² Fa maci aḏ tesȓem i wawaȓ n Arebbi u ṣafi; Itxeṣṣa-kenniw azzayes ṯxeddmem ḥima war ṯxeddƹem ca ixef nwem.

^23-24 Maṯalan, ijjen ixezzar ḏeg uɣembub nnes mliḥ ḏi ṯisiṯ waha. Wami ixzar mliḥ, iruḥ ittu ḏeɣya ixef nnes mammec iǧa. Ammu ig iǧa wenni itsȓan i wawaȓ n Arebbi war zzayes ixeddem ca.

²⁵ Walakin wenni ixezzaren ḏi ccariƹa ikemȓen ṯenni iy ḏi ṯeǧa lḥurriya, iteṭṭef ḏayes war itettu ca min itsȓa ixeddem zzayes, ataf azzayes yawi lbaraka ḏi min itegg.

²⁶ Wenni itḥassaben ixef nnes ɣares ddin war iḥeṭṭi ca iȓes nnes, ataf ixeddeƹ ixef nnes waha war ɣares bu ddin.

²⁷ Ddin iṣfan iy inqan ɣar Arebbi Babaṯneɣ min iƹna? Iƹni bnaḏem itraḥ ɣar yujiȓen ḏ ṯajjaȓin aṯen iƹawen ḏeg uzeyyar nsen, aḏ iḥḍa ixef nnes ḥima war ṯ twessix ca ddunect-a.