Ȓexḏayem 7 - Ṯarifiṯ 2020

Stifan itwajah Jmaƹeṯ n Lḥukkam n Ayṯ-Israʼil

¹ Ikkar arrayes n ȓfuqaha inna-as i Stifan: "Ma ḏ ṣṣaḥ manaya?"

² Inna-asen Stifan: "Ay ayṯma! A yinni imɣaren! Ṣennṭeṯ ɣari. Wami tuɣa iǧa jeddiṯneɣ Brahim ḏi ṯmurṯ nni n Misubuṭamya qbeȓ ma aḏ izḏeɣ ḏi ṯendint n Ḥaran, imeḍhar-as-d Arebbi Lƹaḍim

³ inna-as: Kkar, ffeɣ cek ssa zi ṯmurṯ-a nnec, ejj ȓeḥbab nnec ruḥ ɣar ṯmurṯ nni iy ḏac d ɣa seḍhareɣ.

⁴ Ikkar Brahim yuyur zi ṯmurṯ nni n ikaldaniyen, iƹni Misubuṭamya, iruḥ izḏeɣ ḏi ṯendint n Ḥaran. Wami immuṯ babas, yuwi-ṯ Arebbi ɣar ṯmurṯ-a mani ṯzeddɣem ȓexxu.

⁵ Walakin war ḏas yuci uȓa ḏ ccbar zi ṯmurṯ-a aṯ imlek. Ḏi ȓweqṯ nni Brahim war ɣares bu ṯarwa. Waxxa amenni iwƹeḏ-iṯ Arebbi inna-as: Aḏac uceɣ ṯamurṯ-a aḏ tiȓi nnec cek ḏ ddurriṯ nnec menbaƹd i cek.

⁶ Ammu iy ḏas inna Arebbi: Ddurriṯ nnec aḏ ƹicen ḏi ṯmurṯ n midden, aḏ iȓin ḏ isemɣan n ayṯbab n ṯmurṯ nni, axasen ssekken tamara arbeƹmiyya iseggwusa.

⁷ Walakin Arebbi iqqar: Aḏ ƹaqbeɣ iwḏan n ṯmurṯ nni iy ṯen iggin ḏ isemɣan, menbaƹd aḏ ffɣen ssenni ddurriṯ nnec aḏ tiȓi ƹebbḏen-ayi ḏeg umcan-a.

⁸ Fa Arebbi yuca-as ȓƹaheḏ nni n ṭṭahareṯ i Brahim. Brahim ijja-d Isḥaq, iṭehhar-iṯ nhar wis ṯmenyam. Isḥaq ijja-d Yaƹqub. Yaƹqub ijja-d ṯenƹac n ȓejḏuḏ nneɣ.

⁹ Ȓejḏuḏ nneɣ ḥessḏen umaṯsen Yusef, zzenzen-ṯ aḏ iḏweȓ ḏ ismeɣ ḏi Miṣra. Walakin Arebbi aqaṯ akiḏes,

¹⁰ ifekk-iṯ zi marra tamara nnes. Yuca-as lḥikma, isƹizz-iṯ ɣar Firƹun iƹni azeǧiḏ n Miṣra. Iggi-ṯ Firƹun aḏ iḥkem x Miṣra ḏ ȓeqṣar nnes ikmaȓ.

¹¹ Ṯumma iwqeƹ buheyyuf ḏi marra ṯimura n Miṣra ḏ Kanƹan. Ṯekka xasen tamara ḏ ṯameqqrant, ȓejḏuḏ nneɣ war ufin min ɣa ccen.

¹² Wami isȓa Yaƹqub Miṣra ḏayes ḏinni irḏan, issekk ȓejḏuḏ nneɣ ḏinni ṯwaȓa ṯamezwarut.

¹³ Wami ruḥen ḏinni ṯwaȓa wis ṯnayen, inna-asen Yusef i ayṯmas aqa nec ḏ umaṯwem Yusef, ȓexddenni ƹeqȓen-ṯ. Ssenni ig issen Firƹun ȓeḥbab n Yusef.

¹⁴ Yusef issekk aḏ d awin babas Yaƹqub ḏ ȓeḥbab nnes, ḏaysen xemsa u sebƹin iḏsen.

¹⁵ Ihwa-d Yaƹqub ɣar Miṣra mani immuṯ netta ḏ ȓejḏuḏ nneɣ.

¹⁶ Mmeysin-d ssenni uwin-ṯen ɣar ṯmurṯ n Cakim, neḍȓen-ṯen ḏinni ḏeg unḍeȓ nni iy tuɣa isɣa Brahim s can n nnuqarṯ x Ayṯ-Ḥammur ḏi Cakim.

¹⁷ Ṯumma wami d ṯqarreb ȓweqṯ nni iy ḏi ɣa ikemmeȓ Arebbi awaȓ nnes minzi tuɣa iwƹeḏ Brahim, ikṯar ccaƹb nneɣ ḏi Miṣra imarni-d aṭṭas.

¹⁸ Imeḍhar-d ijjen n uzeǧiḏ nneɣni ḏi Miṣra netta war issin ca Yusef.

¹⁹ Ixeddeƹ ccaƹb nneɣ issekk-it x ȓejḏuḏ nneɣ, itegg xasen bessif bac aḏ nḍaren iseyman nsen ɣar barra ḥima aḏ mmṯen.

²⁰ Ḏi ȓweqṯ nni ixȓeq-d Musa, netta ḏ aṣebḥan aṭṭas. Itwarebba ṯeȓt chur ḏi ṯeddarṯ n babas.

²¹ Wami ṯ nḍaren ɣar barra, ṯeysi-ṯ yeǧis n Firƹun ṯrebba-ṯ ṯarri-ṯ ḏ mmis.

²² Uca sȓemḏen-as i Musa marra min ssnen imiṣriyen, iḏweȓ ɣares jjheḏ ḏi min iqqar ḏ min itegg.

²³ Ṯumma wami ikemmeȓ arbeƹin iseggwusa, irezzu aḏ ifqeḏ ayṯmas iƹni Ayṯ-Israʼil.

²⁴ Iẓra ijjen n umiṣri iƹedd x yijjen n uʼisraʼili, iruḥ netta iḏafeƹ x wenni itwaḍeȓmen, intaqam-as inɣa amiṣri nni.

²⁵ Netta inwa ayṯmas Ayṯ-Israʼil aḏ fehmen belli aṯen isenjem Arebbi x ufus nnes, walakin niṯni war fhimen ca.

²⁶ Ṯiwecca nnes yufa ṯnayen israʼiliyen tmenɣan jarasen, ixes aṯen ismeṣȓaḥ inna-asen: Kenniw ḏ awmaṯen, mayemmi tƹeddam x wayawya?

²⁷ Ikkar-d wenni itƹeddan, iƹann-iṯ inna-as: Uw c iggin cek ḏ arrayes niɣ ḏ ȓqaḍi xaneɣ?

²⁸ Ma ṯrezzuḏ aḏayi ṯenɣeḏ am ṯenɣiḏ amiṣri nni n iḍennaṭ?

²⁹ Wami isȓa Musa manaya, ikkar yarweȓ iruḥ ɣar ṯmurṯ n Midyan iƹic ḏinni ḏ abarrani. Xeȓqen-d ɣares ḏinni ṯnayen n iḥenjiren.

³⁰ Ṯumma wami ƹḏun arbeƹin iseggwusa, ṯbedd-d ɣares ijjen n lmalaʼika zeg uḥaḏuq n ṯmessi ṯreqq ḏeg uxcab ḏi ṣṣaḥra zzaṯ i uḏrar n Sina.

³¹ Wami iẓra Musa manayenni itƹejjeb, iqarreb ɣares aḏ ixzar. Isȓa i ṣṣut n Siḏi Arebbi iqqar-as:

³² Nec ḏ Arebbi n ȓejḏuḏ nnec, ḏ Arebbi n Brahim ḏ Isḥaq ḏ Yaƹqub. Ibḏa Musa iterjiji s ṯiggwḏi war izƹim ca aḏ ixzar.

³³ Inna-as Siḏi Arebbi: Kkes ṯisiȓa zeg iḍaren nnec qa amcan-a mani ṯbeddeḏ netta muqeddes.

³⁴ Aqa ẓriɣ ȓaƹḏab n ccaƹb inu iǧan ḏi Miṣra, sȓiɣ i iɣuyan nsen aqa hwiɣ-d aṯen snejmeɣ. Ȓexxu araḥ-d cek ac ssekkeɣ ɣar Miṣra.

³⁵ Musa-ya nkaren-ṯ nnan-as: Uw c iggin cek ḏ arrayes niɣ ḏ ȓqaḍi xaneɣ? Walakin netta issekk-iṯ Arebbi aḏ yiȓi ḏ arrayes ḏ wenni iy ṯen ɣa isnejmen. Issekk-iṯ Arebbi x ufus n lmalaʼika nni iy ḏas d imeḍharen ḏeg uxcab nni.

³⁶ Musa-ya ḏ netta iy ṯen isufɣen s ȓaƹjayeb ḏ lmuƹjizaṯ iy igga ḏi Miṣra, ḏi Ȓebḥar azeggwaɣ, uȓa ḏi ṣṣaḥra arbeƹin iseggwusa.

³⁷ Ḏ Musa-ya iy ḏasen innan i Ayṯ-Israʼil: Aḏawem d yuc Arebbi ijjen n nnabi zeg ayṯmaṯwem am nec.

³⁸ Ḏ netta Musa iy igguren ak jmaƹeṯ n Ayṯ-Israʼil ig imunen ḏi ṣṣaḥra. Ḏ netta mikeḏ ṯessiweȓ lmalaʼika x uḏrar n Sina ḏ ȓejḏuḏ nneɣ. Ḏ netta iy xef d hwan wawaȓen iddaren ḥima aḏaneɣ ṯen yuc.

³⁹ Walakin ȓejḏuḏ nneɣ ugin aḏas ṭaƹen ugin aṯ qebȓen, nwan ḏeg wuȓawen nsen aḏ ḏewȓen ɣar Miṣra.

⁴⁰ Nnan-as i Harun: Ṣneƹ-aneɣ lʼaṣnamaṯ ḥima aḏ iȓin ḏ arebbiṯen nneɣ aṯen neysi ɣar zzaṯ nneɣ. War nessin ca manis ikka Musa-ya iy ḏaneɣ d isufɣen zi Miṣra!

⁴¹ Ḏi ȓiyyam nni ṣenƹen ijjen n lʼaṣnam x teṣwirṯ n uyenduz. Qeddmen-as dbiḥeṯ, farḥen aṭṭas x min ggin s ifassen nsen.

⁴² Ibeƹƹeḏ xasen Arebbi, ijji-ṯen aḏ ƹebbḏen iṯran n ujenna am mammec iqqar Lkitab n lʼanbiya: "Ay Ayṯ-Israʼil, wami tqeddamem dbiḥeṯ ḏ teḍḥiyeṯ ḏi arbeƹin iseggwusa nni ḏi ṣṣaḥra, ma ṯeggim-ayi-t i nec niɣ?

⁴³ Lla, ṯeysim aqiḍun n lʼaṣnam umi qqaren Mulux, ḏ yiṯri n arebbi nwem umi qqaren Rafan. Ḏ yina ḏ lʼaṣnamaṯ iy ṯeggim bac aṯen ṯƹebḏem! X manaya nec axawem azzȓeɣ aɣirin i ṯmurṯ n Babil."

⁴⁴ Ɣarsen ɣar ȓejḏuḏ nneɣ Ṯamziḏa uqiḍun n Arebbi ḏi ṣṣaḥra. Iggi-t Musa amec iy ṯ yumar Arebbi ƹlaḥsab cckel iy tuɣa iẓra.

⁴⁵ Ṯamziḏa nni uqiḍun ṯemmuc-asen i ȓejḏuḏ nneɣ. Niṯni ysin-t akiḏsen ak Yacuƹ ɣar ṯmurṯ-a n ȓegnus iy xef yuzzeȓ Arebbi zzaṯ i ȓejḏuḏ nneɣ. Ṯeqqim amenni aȓ wussan n Dawed.

⁴⁶ Dawed irḍa xas Arebbi inna-as: A Siḏi Arebbi n jeddiṯneɣ Yaƹqub, ejj-ayi aḏ ḏebbareɣ ijjen n umcan aḏayes ṯiȓi ṯzeddiɣṯ nnec.

⁴⁷ Walakin iruḥ Suliman ibna netta ijjen n ṯeddarṯ i Arebbi.

⁴⁸ Waxxa amenni qa Arebbi Yuƹȓan war izeddeɣ ca ḏi ṯuḏrin iy bennan s ifassen. Amec inna nnabi Icaƹya:

⁴⁹ Iqqar Siḏi Arebbi ajenna ḏ lƹarc inu, ḏ ṯamurṯ mix srusiɣ iḍaren inu. Mammec ṯegga ṯeddarṯ iy ḏayi ɣa ṯebnam? Mani ɣa yiȓi umcan n arraḥeṯ inu?

⁵⁰ Ma war iǧi ca ḏ fus inu iy d ixeȓqen manaya kuȓci?

⁵¹ Inna-asen Stifan: A yinni iy ḏi ṯeǧa ṯɣennant, qa uȓawen nwem ḏ imejjan nwem qqnen! Kenniw teggem mammec iy ggin ȓejḏuḏ nwem, kif-kif. Ȓebda tƹarraḍem-as i Arruḥ iqeddsen.

⁵² Ma injem can n nnabi war ṯ ƹeddben ca ȓejḏuḏ nwem? Niṯni nɣin uȓa ḏ lʼanbiya nni n zman iy innan qa aḏ d yas wenni iǧan ṣṣaliḥ, iƹni wenni ȓexxu ṯxeḏƹem kenniw ṯenɣim-ṯ.

⁵³ Ṯeṭṭfem ccariƹa x ufus n lmalaʼikaṯ, kenniw war zzayes ṯeggim ca."

Ȓmewṯ n Stifan

⁵⁴ Wami sȓin Jmaƹeṯ nni n lḥukkam n Ayṯ-Israʼil awaȓ n Stifan, xeyyqen ɣeḍben, tɣeẓẓaẓen ɣares ṯiɣmas.

⁵⁵ Stifan iccur s Arruḥ iqeddsen, ixzar ɣar ujenna iẓra lƹaḍama n Arebbi yufa Ƹisa ibedd x ufusi n Arebbi.

⁵⁶ Inna: "Aqa twaȓiɣ ajenna inurzem ḏ Mmis n bnaḏem ibedd x ufusi n Arebbi."

⁵⁷ Snekkaren ṯɣuyyeṯ s jjheḏ bellƹen x imejjan nsen, hejmen xas marra iḏsen.

⁵⁸ Sufɣen-ṯ barra i ṯendint bḏan rejjmen-ṯ s uzru. Sersen izeǧuba nsen ɣar iḍaren n yijjen n ccab qqaren-as Cawul.

⁵⁹ Qqimen rejjmen Stifan s uzru netta inna: "A Siḏiṯneɣ Ƹisa, qbeȓ buḥbeȓ inu!"

⁶⁰ Iwḍa x ifadden inna-as s jjheḏ: "A Siḏi, war xasen ḥesseb ca ȓmuƹṣiyeṯ-a!" Wami inna manaya ṣafi iffeɣ-iṯ buḥbeȓ nnes.