Ȓexḏayem 4 - Ṯarifiṯ 2020

Buṭrus ḏ Yuḥanna zzaṯ i Lḥukkam n Ayṯ-Israʼil

¹ Usin-d ȓḥizeb n iṣadduqiyen ḏ ȓfuqaha ḏ umeqqran n iƹessasen n ṯemziḏa ṯameqqrant n Ayṯ-Israʼil, ufin Buṭrus ḏ Yuḥanna ssawaȓen ak yiwḏan.

² War ḏasen iƹjib bu ȓḥaȓ qaƹ wami ufin Buṭrus ḏ Yuḥanna seȓmaḏen tḥeddaṯen i yiwḏan x Ƹisa qqaren belli iwḏan aḏ d kkaren zi ȓmewṯ.

³ Kkaren ṭṭfen Buṭrus ḏ Yuḥanna siḏfen-ṯen ḏi ȓeḥbes jjin-ṯen ḏinni aȓ ṯiwecca minzi iƹḏu ȓḥaȓ.

⁴ Aṭṭas n yiwḏan iy isȓin i wawaȓ nsen umnen. Iryazen nni iy yumnen ȓexxu uwḍen ɣar yijjen xemsaȓaf iḏsen.

⁵ Ṯiwecca nnes munen ḏi Lquds imeqqranen n Ayṯ-Israʼil ḏ arruyas nsen ḏ imseȓmaḏen n ccariƹa.

⁶ Tuɣa ḏinni Ḥanin ig iǧan ḏ arrayes n ȓfuqaha ḏ Qiyafa ḏ Yuḥanna ḏ Iskandar ḏ yinni iǧan zi ȓeḥbab n arrayes n ȓfuqaha.

⁷ Uwin-d Buṭrus ḏ Yuḥanna sbedden-ṯen ḏi ȓwesṭ nsen nnan-asen: "Man jjheḏ niɣ ḏ yisem iy zi teggem manaya?"

⁸ Buṭrus iccur-d s Arruḥ iqeddsen ȓexddenni inna-asen: "A lḥukkam ay imeqqranen n ccaƹb!

⁹ Ma teggem-aneɣ lʼistijwab nhara ƹlaḥsab ijjen n ȓxir iy negga ḏeg unecruf-a ƹlaḥsab mammec igenfa?

¹⁰ Iwa itxeṣṣa aḏ tessnem kenniw ḏ marra Ayṯ-Israʼil belli aryaz-a iy ḏa ibedden zzaṯwem igenfa s yisem n Ƹisa Lmasiḥ zi Naṣira. Kenniw ṯṣellbem-ṯ, walakin Arebbi isekkar-iṯ-iḏ zi ȓmewṯ.

¹¹ Ƹisa-ya netta ḏ azru nni iy ṯƹiffem kenniw ibennayen. Ȓexxu iḏweȓ ḏ azru aṣebḥan aqaṯ ḏi ṯɣemmarṯ n dsas.

¹² War izemmar ḥadd aḏ injem bȓa zzayes netta. Liʼanna war ḏinni uȓa ḏ ijjen n yisem nneɣni jar i iryazen ḏi ddunect-a azzayes netwasenjem illa netta."

¹³ Xzaren lḥukkam nni ḏi zƹameṯ n Buṭrus ḏ Yuḥanna ufin-ṯen war ɣrin ca niṯni ḏ iwḏan ƹadi. Qqimen tƹejjben, ƹeqȓen-ṯen tuɣaṯen ak Ƹisa.

¹⁴ Ƹaweḏ twaȓan aryaz nni igenfa ibedd ḏinni akiḏsen, war ufin min ɣa inin.

¹⁵ Lḥukkam nni umaren Buṭrus ḏ Yuḥanna aḏ ffɣen barra aḏ jjen Jmaƹeṯ nni n lḥukkam aḏ mcawaren waḥeḏsen.

¹⁶ Nnan: "Min ɣa negg i ṯnayen-a n iryazen? War nzemmar ca a nenkar lmuƹjiza-ya iy ggin aqa ṯmeḍhar-asen-d i marra imezḏaɣ n Lquds.

¹⁷ Walakin labud aḏasen neƹȓem bac ssa aȓ tsawent war ssiwiȓen ɣar ḥadd ƹlaḥsab isem n Ƹisa bac war itentacar ca useȓmeḏ-a ḏi ccaƹb."

¹⁸ Siḏfen-ṯen-d, umaren-ṯen nnan-asen war ssawaȓeṯ war seȓmaḏeṯ ḥadd ƹlaḥsab isem n Ƹisa.

¹⁹ Indeq-d Buṭrus ḏ Yuḥanna nnan-asen: "Ḥekmeṯ kenniw, ma mliḥ zzaṯ i Arebbi a nṭaƹ i wawaȓ nnes niɣ i wawaȓ nwem?

²⁰ War nzemmar ca a nejj x min neẓra niɣ x min nesȓa."

²¹ Arnin siggwḏen-ṯen, ȓexddenni ḍeȓqen-asen. War ufin mammec ḏasen ɣa ggen aṯen ƹaqben minzi marra iwḏan ḥemmḏen Arebbi x min iweqƹen.

²² Aryaz-a igenfan s lmuƹjiza nni ɣares ktar zi arbeƹin iseggwusa.

Ȓmuminin tettaren zƹameṯ zi Arebbi

²³ Ɣir ḍeȓqen-asen-d i Buṭrus ḏ Yuḥanna, ruḥen ɣar imeddukaȓ nsen ƹawḏen-asen marra min ḏasen nnan arruyas n ȓfuqaha ḏ imeqqranen n Ayṯ-Israʼil.

²⁴ Wami sȓin i manaya, ttaren i Arebbi ḏi ṯẓaǧiṯ marra iḏsen nnan-as: "Ya Mawlana ḏ cek ixeȓqen ajenna ḏ ṯmurṯ ḏ ȓebḥar ḏ marra min ḏaysen.

²⁵ Ḏ cek iy innan s Arruḥ iqeddsen s yiȓes n jeddiṯneɣ Dawed ȓƹabḏ nnec wami inna: Mayemmi ȓegnus ɣeḍben aṭṭas? Mayemmi iwḏan tciṭinen ḏi ȓxawi?

²⁶ Sewjaḏen izeǧiḏen n ṯmurṯ ixef nsen, munen arruyas ak wayawya, bac aḏ ƹarrḍen i Siḏi Arebbi ḏ Lmasiḥ nnes.

²⁷ Li'anna ḏ ṣṣaḥ azeǧiḏ Hirudus ḏ lḥakem Bunṭyus Bilaṭus munen ak Ayṯ-Israʼil ḏ yinni war iǧin ca zi Ayṯ-Israʼil ḏi ṯendint-a. Tafqen ḍed i uxeddam nnec iqeddsen Ƹisa iy ṯixḍareḏ.

²⁸ Ggin qaƹ min tuɣa ṯzemmmeḏ aḏ iwqeƹ s ufus ḏ ȓxaḍar nnec.

²⁹ A Siḏi, ȓexxu xzar mammec ḏaneɣ theddaḏen, uc-aneɣ i neccin lƹibad nnec a nessiweȓ s wawaȓ nnec s zƹameṯ.

³⁰ Sarreḥ fus nnec bac aḏ tesgenfiḏ aḏ tesbeyyneḏ lmuƹjizaṯ ḏ lburhanaṯ ƹlaḥsab isem n Ƹisa axeddam nnec iqeddsen."

³¹ Wami kemmȓen ṯẓaǧiṯ nni inhezz umcan nni mani munen, ccuren niṯni marra s Arruḥ iqeddsen ssawaȓen s wawaȓ n Arebbi s yijjen n zƹameṯ.

Ȓmuminin carrcen marra jarasen

³² Jmaƹeṯ nni n ȓmuminin ɣarsen uȓ nsen ḏ ȓaƹqeȓ nsen kif-kif. Uȓa ḏ ijjen zzaysen war iḥesseb min ɣares nnes waḥḏes, carrcen marra ṯimesȓayin jarasen.

³³ Cehhḏen arrusul s yijjen n jjheḏ ḏ ameqqran x lqiyama iy igga Siḏiṯneɣ Ƹisa wami ikkar zi ȓmewṯ. Arebbi igga xasen marra ijjen n lbaraka ṯemɣar.

³⁴ War iǧi uȓa ḏ ijjen zzaysen ma iḥḏaj. Li'anna yinni iy ɣar iǧa ṯimura ḏ ṯuḏrin traḥen znuzan-ṯent tawin-d tmenyaṯ nni,

³⁵ srusan-ṯent ɣar iḍaren n arrusul tferraqen-ṯent ƹlaḥsab mkuȓ ijjen min iḥḏaj.

³⁶ Ḏinni ijjen qqaren-as Yusef, ƹaweḏ semman-ṯ arrusul s Barnaba iƹni Netta zi ccurfa n Ayṯ-Lawi ḏ mmis n ṯendint n Qubruṣ.

³⁷ Ikkar izzenz ijjen n ṯmurṯ iy ɣares, yuwi-d tmenyaṯ nni isers-iṯent ɣar iḍaren n arrusul.