Ȓexḏayem 2 - Ṯarifiṯ 2020

Arruḥ iqeddsen ihewwa-d x ȓmuminin

¹ Wami d yuweḍ Ȓƹiḏ n nhar wis xemsin, munen marra ȓmuminin ḏeg yijjen n umcan.

² Ƹlaɣafla ihwa-d ijjen n ȓḥess zeg ujenna am arriḥ iy itṣuḍen s jjheḏ, yuḏef ḏi mkuȓ jjiheṯ n ṯeddarṯ mani qqimen.

³ Ẓrin iȓesawen am iṣfeḍawen n ṯmessi iruḥ kuȓ yiȓes waḥḏes imars ij ij x kuȓ ijjen zzaysen.

⁴ Ccuren s Arruḥ iqeddsen marra iḏsen, bḏan ssawaȓen s lluɣaṯ war iǧin bu nsen amecnaw mammec ḏasen yuca Arruḥ aḏ ssiwȓen.

⁵ Ḏinni can iryazen zi Ayṯ-Israʼil teggwḏen Arebbi tzuran ɣar Lquds, niṯni zi marra ṯimura n ddunect-a.

⁶ Iryazen nni wami sȓan i ȓḥess nni usin-d munen ḏinni qqimen tƹejjben, mkuȓ ijjen itsȓa i lluɣa nnes.

⁷ Ḏehhcen tƹejjben nnan jarasen: "Marra iwḏan-a iy ssawaȓen lʼaṣel nsen zi ṯmurṯ n Ljalil niɣ lla?

⁸ Mammec mkuȓ ijjen zzayneɣ itsȓa i lluɣa n ṯmurṯ nnes?

⁹ Iƹni ṯamurṯ n Bardaya ḏ Madya ḏ Ƹilam, ḏ imezḏaɣ n Misibuṭamya ḏ Yahuḏiya ḏ Kapdukya, ḏ Punṭus ḏ Asya,

¹⁰ ḏ Frijya ḏ Pamfilya, ḏ Miṣra ḏ jwayeh n Lqurina ḏi Libya, ḏ yinni itzuran zi ṯendint n Ruma.

¹¹ Ḏ Ayṯ-Israʼil ḏ yinni iseȓmen ḏi ddin n Ayṯ-Israʼil, ḏ Ayṯ-Krit ḏ waƹraben. Neccin marra netsȓa-yasen ssawaȓen s lluɣaṯ nneɣ x ṯmesȓayin ṯimeqqranin n Arebbi."

¹² Ḏehcen ccekken, bḏan ssawaȓen jarasen nnan: "Min ixes aḏ yini manaya?"

¹³ Ȓebƹaḍ ḍeḥcen xasen nnan qa swin aṭṭas n waman uḍiȓ.

Lxuṭba ṯamezwarut n arrasul Buṭrus

¹⁴ Buṭrus aqaṯ ak ḥiṭac nni n arrusul, ikkar issiweȓ s jjheḏ inna-asen: "Ay iryazen n Ayṯ-Israʼil ḏ marra imezḏaɣ n Lquds, itxeṣṣa aḏ tessnem aḏ tṣennṭem mliḥ i wawaȓen inu.

¹⁵ Iwḏan-a war swin ca war ɣellan ca s ccreb amecnaw mammec ṯḥessbem minzi ṯsaƹƹat-a ƹaḏ ḏ tesƹa n ṣbaḥ waha!

¹⁶ Lla, issiweȓ nnabi Waʼil x manaya ḏeg yijjen n zman wami inna:

¹⁷ Arebbi inna: Ḏeg wussan ineggura aḏ farɣeɣ Arruḥ inu x marra iwḏan. Ṯarwa nwem ḏ yissiṯwem aḏ ssiwȓen s min ƹeȓmen zi Arebbi. Iḥenjiren nwem aḏ ẓren lwaḥi, iwessura nwem aḏ arjan ṯirja.

¹⁸ Ḏeg wussan nni aḏ farɣeɣ Arruḥ inu x lƹibad inu iryazen ḏ ṯemɣarin, aḏ ssiwȓen s min ƹeȓmen zi Arebbi.

¹⁹ Aḏ ggeɣ ȓaƹjayeb ḏeg ujenna ḏ lƹalamaṯ ḏi ṯmurṯ, aḏ iȓin iḏammen ḏ ṯmessi ḏ waṭṭas n ddexxan.

²⁰ Ṯfuct aḏ teḏweȓ ḏ ṯaǧest, ṯaziri aḏ teḏweȓ ḏ iḏammen qbeȓ iy d ɣa yas Nhar nni ameqqran lƹaḍim n Siḏi Arebbi.

²¹ Ssenni marra wenni iy ɣa iȓaɣan s yisem n Siḏi Arebbi ataf aḏ injem.

²² Ay iryazen n Ayṯ-Israʼil, ṣennṭeṯ i min ḏawem ɣa iniɣ. Ƹisa-ya zi Naṣira min iƹna netta? Netta ḏ ijjen n uryaz itwaḍhar-d zi Arebbi i kenniw s lmuƹjizaṯ ḏ lburhanaṯ ḏ lƹalamaṯ ig igga Arebbi x ufus n Ƹisa jarawem mammec ṯessnem.

²³ Y kenniw min ḏas ṯeggim? Wami itwasellem ƹlaḥsab mammec ixes Arebbi ḏ mammec tuɣa issen netta, kenniw tṣellbem-ṯ ṯenɣim-ṯ s ifassen n lkuffar.

²⁴ Walakin Arebbi netta isekkar-iṯ-iḏ iḍȓeq-as zi ȓeḥriq nni n ȓmewṯ xmi tarew, aqa ȓmewṯ war ḏas ṯzemmar.

²⁵ Liʼanna issiweȓ xas nnabi Dawed ḏeg yijjen n zman wami inna: Qa twaȓiɣ Siḏi Arebbi zzaṯi i ȓebda, aqaṯ x ufusi inu bac war terjijiɣ.

²⁶ X manaya ifarreḥ wuȓ inu, izehhu yiȓes inu. Ddat inu aḏ tƹic ḏi lʼamal.

²⁷ War ṯsemmḥeḏ ca ḏi ȓaƹmar inu ḏi Lʼaxira, war tejjiḏ ca Lƹaḍim nnec aḏ ikiccew.

²⁸ Ṯseḍhareḏ-ayi-d ibriḏen n ṯuḏarṯ, aḏayi ṯesfarḥeḏ s waṭṭas xmi ɣa ẓreɣ aɣembub nnec.

²⁹ Ay ayṯma, aḏawem iniɣ ṣarraḥa: Dawed zi ssalaf ṣṣaliḥin, netta immuṯ itwanḍeȓ. Anḍeȓ nnes aqaṯ akiḏneɣ aȓ nhara.

³⁰ Azeǧiḏ Dawed tuɣa ḏ nnabi iƹni issen belli iwƹeḏ-iṯ Arebbi inna-as aqa aḏ sɣimeɣ ijjen zi ddurriṯ nnec x lƹarc nnec.

³¹ Dawed iƹȓem zi Arebbi min ɣa iweqƹen, issiweȓ x lqiyama n Lmasiḥ belli war ḏayes isemmeḥ ca ḏi Lʼaxira, war tkicciw ca ddat nnes.

³² Ƹisa-ya wanita isekkar-iṯ-iḏ Arebbi zi ȓmewṯ, aqa neccin marra ncehheḏ x manaya.

³³ Wami itwarfeƹ ɣar ufusi n Arebbi, iysi zi Babas Arruḥ iqeddsen iy zi ṯ iwƹeḏ, isfareɣ-d Ƹisa manaya iy twaȓam ȓexxu ḏ manaya iy ṯesȓam.

³⁴ Qa Dawed war itwarfeƹ ca ɣar ujenna, netta s yixef nnes iy innan: Siḏi Arebbi inna-as i Siḏi: Qqim-d x ufusi inu,

³⁵ aȓ d ɣa ggeɣ ȓƹaḏyan nnec swadday iḍaren nnec.

³⁶ Iwa kenniw itxeṣṣa aḏ tessnem marra Ayṯ-Israʼil mebȓa ccekk, qa Ƹisa-ya wanita iy ṯṣellbem iggi-ṯ Arebbi ḏ Siḏiṯneɣ ḏ Lmasiḥ."

³⁷ Iwḏan nni wami sȓin i wawaȓ-a, uȓawen nsen cemḍen. Kkaren nnan-as i Buṭrus ḏ arrusul nneɣni: "Ay ayṯma, min ɣa negg?"

³⁸ Inna-asen Buṭrus: "Tubeṯ, twaṭehhareṯ s waman kuȓ ijjen zzaywem ƹlaḥsab isem n Ƹisa Lmasiḥ ḥima aḏ twaɣfarent ȓmuƹṣiyaṯ nwem, ataf aḏawem immuc Arruḥ iqeddsen ḏ lhadiya.

³⁹ Liʼanna yuca-awem ȓƹaheḏ i kenniw ḏ ṯarwa nwem ḏ marra yinni iggwjen, iƹni i marra yinni iy xef d ɣa iȓaɣa Siḏi Arebbi."

⁴⁰ Iƹȓem-asen Buṭrus aṭṭas iweṣṣa-aṯen inna-asen: "Snejmeṯ ixef nwem zeg yiwḏan n ȓqewṯ-a ḏi ǧan ixarwiḍen."

⁴¹ Ssenni yinni iqebȓen awaȓ nnes ruḥen twaṭehharen s waman. Nhar nni marnin can ṯeȓtaȓaf iḏsen ɣar ȓmuminin.

Mammec tƹicen ȓmuminin imezwura

⁴² Ȓmuminin ȓebda tesȓan i ttaƹlim n arrusul, tmunen ag wayawya am wawmaṯen, tetten aɣrum ag wayawya, tẓaǧan.

⁴³ Arrusul teggen aṭṭas n lmuƹajizaṯ ḏ lburhanaṯ, yiwḏan tƹejjben zzaysen marra.

⁴⁴ Tmunen marra ȓmuminin carrcen marra ag wayawya.

⁴⁵ Znuzan agȓa nsen ḏ ȓeḥwayej nsen, ferrqen x mkuȓ ijjen min iḥḏaj.

⁴⁶ Tmunen marra iḏsen mkuȓ nhar ḏi ṯemziḏa ṯameqqrant n Ayṯ-Israʼil. Tetten aɣrum marra ḏi ṯuḏrin nsen, tetten mecca s ȓefraḥeṯ ḏ ȓxaḍar nsen.

⁴⁷ Ḥemmḏen Arebbi, reṭṭan xasen yiwḏan marra. Kuȓ nhar yarenni-yasen Siḏi Arebbi ḏi lƹadad n yinni inejjmen.