Ȓexḏayem 17 - Ṯarifiṯ 2020

Twaƹeddaben Bulus ḏ Silas ḏi ṯendint n Salunik

¹ Ƹḏun x ṯendint n Umfipulis ḏ ṯendint n Upulunya, uwḍen ɣar ṯendint n Salunik mani ṯeǧa ḏinni ijjen n ṯemziḏa n Ayṯ-Israʼil.

² Yuḏef Bulus ɣar ṯemziḏa nni mammec itegg ȓebda. Ṯȓaṯa n simanaṯ kuȓ nhar n ssebṯ n lƹibada itemnaqac akiḏsen iqqar-asen min yurin ḏi Lkutub.

³ Isefham-iṯen isbeyyan-asen ddalil x mammec u labud Lmasiḥ aḏ itwaƹeddeb aḏ d ikkar zi ȓmewṯ. Inna-asen qa Ƹisa-ya iy zi kenniw tbeccareɣ netta s yixef nnes ḏ Lmasiḥ.

⁴ Qtanƹen ȓebƹaḍ zzaysen munen ak Bulus ḏ Silas. Akiḏsen xarebbi n iyunaniyen iy iteggwḏen Arebbi. Akiḏsen ƹaweḏ aṭṭas n ṯemɣarin zi ṯinni iy ɣar ṯeǧa lmartaba.

⁵ Walakin israʼiliyen nneɣni ḥesḏen-ṯen, ruḥen smunen-d zi ssuq ijjen n lmejmuƹ n ikruccaren iƹeffanen bac aḏ ggen ssdaƹ, snekkaren ȓfawḍa ḏi ṯendint. Hejmen x ṯeddarṯ n yijjen qqaren-as Yasin rezzun x Bulus ḏ Silas ḥima aṯen sellmen i ȓɣaci.

⁶ Wami war ṯen ufin ca, jarren Yasin ḏ ȓebƹaḍ n ayṯmaṯneɣ ɣar lḥukkam n ṯendint. Snekkaren ṯɣuyyeṯ qqaren: "Iryazen nni iy ggin lfitna ḏi marra ddunect, ȓexxu aqaṯen ḏa

⁷ ḏ inewjiwen ɣar Yasin wanita. Marra yina ƹeṣṣan ȓqanun n Lmalik Qayṣar qqaren qa ḏinni ijjen n uzeǧiḏ nneɣni qqaren-as Ƹisa."

⁸ Wami ccaƹb ḏ lḥukkam n ṯendint sȓin i manaya, ikkar ijjen n ssdaƹ ḏ ameqqran.

⁹ Ssenni ṭṭfen lkafala zi Yasin ḏ inneɣni, ḍeȓqen-asen.

Arrasul Bulus ḏ Silas ḏi ṯendint n Birya

¹⁰ Ssenni s ǧiȓeṯ nni ayṯmaṯneɣ ssekken Bulus ḏ Silas ɣar ṯendint umi qqaren Birya. Wami uwḍen, uḏfen ɣar ṯemziḏa n Ayṯ-Israʼil.

¹¹ Ayṯ-Birya niṯni ḥsen zeg Ayṯ-Salunik, qebbȓen awaȓ n Arebbi ḏeɣya s ȓefraḥeṯ. Qqaren ḏi Lkutub kuȓ nhar bac aḏ ssnen awaȓ nni iy qqaren Bulus ḏ Silas ma ḏ ṣṣaḥ niɣ lla.

¹² Umnen aṭṭas zzaysen. Umnent xarebbi n ṯemɣarin ṯiyunaniyin ɣarsent lmartaba, umnen ƹaweḏ aṭṭas n iyunaniyen.

¹³ Israʼiliyen nni ḏi ṯendint n Salunik arrin-d ȓexbar Bulus itbeccar s wawaȓ n Arebbi ḏi ṯendint n Birya. Usin-d ɣar Birya bḏan teggen ixarwiḍen shajen xas ȓɣaci.

¹⁴ Ȓexddenni ayṯmaṯneɣ ssekken Bulus ɣar ȓebḥar, iqqim Silas ḏ Timutawus ḏi ṯendint n Birya.

¹⁵ Iryazen nni iy ruḥen ak Bulus ssiwḍen-ṯ ɣar ṯendint n Utina ssenni ḏewȓen-d. Iweṣṣa-ṯen Bulus inna-asen: Inim-asen i Silas ḏ Timutawus araḥem-d ɣari ḏeɣya.

Arrasul Bulus itbeccar ḏi ṯendint n Utina

¹⁶ Bulus wami tuɣa itraja Silas ḏ Timutawus ḏi ṯendint nni n Utina itwaȓa ṯandint nni ṯƹemmar s lʼaṣnamaṯ war ḏas iƹjib bu ȓḥaȓ.

¹⁷ Itemnaqac ḏi ṯemziḏa ak israʼiliyen ḏ inneɣni iteggwḏen Arebbi, itemnaqac ƹaweḏ ak yinni iy keḏ itemseȓqa kuȓ nhar ḏi ssaḥa n ṯendint.

¹⁸ Can n lfalasifa umi qqaren ibikuriyen ḏ can lfalasifa nneɣni umi qqaren iriwaqiyen bḏan temnaqacen ak Bulus nnan ȓebƹaḍ zzaysen, min ixes aḏ yini wanita itpeȓpiȓen waha? Nnan yiwḏan nneɣni imken itbeccar s arebbiṯen n dduwal. Nnan manaya minzi Bulus itbeccar s Ƹisa ḏ lqiyama.

¹⁹ Uwin Bulus nedhen-ṯ ɣar lmajlis nsen umi qqaren Aryubagus nnan-as: "Nrezzu a nessen ttaƹlim-a n jḏiḏ iy zi ṯseȓmaḏeḏ cek.

²⁰ Ṯimesȓayin-a netƹejjeb ḏaysent, ƹemmarṣ war nesȓi x min ṯeqqareḏ cek. Nexs a nessen ȓmaƹna nsent."

²¹ (Iwa marra imezḏaɣ n Utina niɣ ḏ ȓbarrani iy ḏayes izeḏɣen sƹeddun marra ȓweqṯ nsen ḏeg wawaȓ niɣ ḏeg uṣenneṭ n can ȓḥajeṯ ḏ jḏiḏ.)

²² Ȓexddenni ibedd Bulus ḏi ȓwesṭ n lmajlis inna-asen: "Ay iryazen n Utina, nec twaȓiɣ kenniw ṯceɣȓem aṭṭas ḏi ddin.

²³ Axmi tsariɣ nec, xezzareɣ mliḥ ḏi zzawyaṯ nwem mani ṯƹebbḏem. Ẓriɣ ḏinni ijjen n ȓmeḏbaḥ urint ḏayes ṯira, ṯira nni qqarent: Arebbi nni iy war itwassnen ca. Cuf, Arebbi nni iy ṯƹebbḏem kenniw war ṯ ṯessinem ca, aḏawem iniɣ nec min iƹna.

²⁴ Ixȓeq-d ddunect-a ḏ marra min ḏayes, netta ḏ Siḏi Arebbi n ujenna ḏ ṯmurṯ. War izeddeɣ ca ḏi zzawyaṯ nni ig bennan yiwḏan s ifassen nsen.

²⁵ War xas tsexxiren ca ifassen n bnaḏem, netta war iteḥḏiji walu. Ḏ netta iy d iticcen i marra iwḏan ṯuḏarṯ ḏ buḥbeȓ ḏ marra ṯimesȓayin nneɣni.

²⁶ Zeg yijjen n bnaḏem iy zi d ixȓeq marra ȓegnus bac aḏ zeḏɣen ḏi ddunect-a amen-ṯekmaȓ. Iḥedd-asen nhuraṯ n ttarix nsen ḏ mani iy ɣa zeḏɣen.

²⁷ Igga-asen ammu Arebbi ḥima iwḏan axas rzun aɣares swizzḏen s ifassen nsen aṯ afen. Innama, netta kuȓ ijjen zzayneɣ war xas iggwij ca.

²⁸ Zzayes netta iy neddar, zzayes netta iy ntenhezza, zzayes netta iy neǧa. Mammec nnan uȓa ḏ ȓebƹaḍ n ccuƹaraʼ nwem qa neccin ḏ ṯarwa nnes.

²⁹ Cuf, neccin meȓa ḏ ṯarwa n Arebbi, itxeṣṣa-yaneɣ war netfekkir ca belli wenni yuƹȓan qa netta am ddheb niɣ am nnuqarṯ niɣ am uzru. Arebbi war iǧi ca ḏ lʼaṣnam ig itṣennaƹ bnaḏem s lfikra nnes ḏ ṯzemmar nnes.

³⁰ Manaya Arebbi war t yuwi ca ḏi zman n ȓeqfaȓeṯ, walakin ȓexxu yumar marra iwḏan ḏi mkuȓ amcan bac aḏ tuben.

³¹ Mayemmi? Arebbi izemmem ijjen n nhar iy ḏi ɣa iḥaseb marra iwḏan s ȓḥaqq x ufus n bnaḏem nni ig ixḍar. Yuca-asen ddalil i marra iwḏan x manaya wami ṯiḏ isekkar zi ȓmewṯ."

³² Yina wami tesȓan x yiwḏan aḏ d kkaren zi ȓmewṯ ḏi Lqiyama ḍeḥcen ȓebƹaḍ xasen, walakin ȓebƹaḍ nneɣni nnan-as qa neccin nexs aḏac nṣenneṭ ṯwaȓa nneɣni x manaya.

³³ Ssenni iffeɣ Bulus zi ȓwesṭ nsen.

³⁴ Ȓebƹaḍ zzaysen umnen munen ak Bulus. Zzaysen Diyunisyus zi lmajlis n Aryubagus ḏ yijjen n ṯemɣarṯ qqaren-as Damaris ḏ inneɣni akiḏsen.